Kompas

Athina Jansen gesels met sport-, akademiese- en kultuuruitblinkers.

Hoekom besluit al hoe meer jongmense om oorsee te gaan werk? Watter werksgeleenthede is in die buiteland beskikbaar? Arehan Brand vind meer uit oor die werk van ‘n au pair in Europeuse lande. ‘n Woordvoerder van ‘n au pair-agentskap beantwoord sy vrae, en ‘n paar jongmense gesels oor hulle oorsese werkservaring.

Hoe minder ons nou doen om klimaatsverandering aan te pak, hoe meer sal ons in die toekoms moet doen. Hoekom is klimaatsverandering ‘n probleem? Hoe kan jongmense die probleem aanpak?

Arehan Brand gesels met Elzáhn Dorfling, ‘n lewens- en verhoudingsafrigter, oor hoe om tydsbestuur baas te raak. Hulle gee tegnieke wat vir oud en jonk kan werk, en kyk na steurnisse wat jou aandag kan aftrek en momentum kan breek. Kyle Vernon Hendricks, projekbestuurder van Youth Voices in Grabouw in die Wes-Kaap, vertel van hulle jeugberaad wat op Jeugdag plaasgevind het om aktiewe burgerskap onder die jeug te bevorder.

Mar-li van der Merwe gesels met Susan Hanekom oor die dienste wat EDULIS, die Wes-Kaapse Onderwysdepartement se biblioteekdiens. bied. Hulle kyk ook na die belangrikheid van lees. Jongmense vertel of hulle elektroniese of regte boeke verkies. Hulle gesels ook oor hul gunsteling herinnering van die biblioteek, en vertel of hulle steeds die biblioteek gebruik.

Athina Jansen gesels met sportiewe uitblinkers van Kakamas, Worcester en Mitchellsplain, en met ‘n dramauitblinker Tiffany Saterdaght van Outshoorn, wat onlangs aangekondig is as deel van die NATI jong sterre-mentorskapprogram vir 2022.

Chrislynn Sias gesels met Ryan Daniels en Natasha Rooi, wat terugploeg in hulle gemeenskappe. Soms word ons so vasgevang in ons eie wêreld, dat ons nie dink aan iemand wat dalk honger gaan slaap of iemand wat ‘n drukkie nodig het nie. Of sommer net iemand wat hulp benodig om die een of ander aansoek te voltooi. Hierdie twee jongmense inspireer ons om meer te doen!

Die modebedryf is een van die grootste bedrywe in die wêreld. Mart-Leen Oosthuizen vind uit modeontwerp as ‘n studie- en beroepsrigting behels.

Arehan Brand vind meer uit van ‘n organisasie wat haweloses en werklose jongmense help. Hy gesels ook met die Top 10 finaliste van die Maak My ‘n Miljoenêr Entrepreneur van die Jaar-kompetisie, en vind uit wanneer die wenner aangekondig word.

Mar-li van der Merwe gesels met Elzette Brown van die Wes-Kaapse Onderwysdepartement se e-leer-direktoraat, oor digitale hulpbronne. Aktrise Des-Lee McKenzie klets oor haar ervarings as onderwyseres, en die groot rol wat tegnologie in die klaskamer in Suid-Korea speel.