Kompas

Athina Jansen gesels met die uitblinkers van die Mentor My-program. Akteur Viljé Maritz, een van die mentors, vertel meer oor die program. Die deelnemers vertel wat dit vir hulle beteken.

Chrislynn Sias gesels met jongmense wat die jeug bemagtig en toerus met die nodige vaardighede om hulleself te bevorder. Henriette Cook het saam met ander jong onderwysers en fasiliteerders ‘n kunsklub vir leerders in die hartjie van Kraaifontein begin. Geronimo de Klerk vertel van sy niewinsgewende organisasie, Feed The Future. Dié organisasie verskaf nie net voeding aan die gemeenskap nie, maar skep ook geleenthede vir die jeug.

Predikante, pastore en priesters bring mense bymekaar om hulle te lei in hulle geloof. Wat behels die studierigting Teologie?

Arehan Brand kuier by die Nasionale Jeug Ontwikkelings Agentskap (NYDA) se kantore in die Goue Akker in Kaapstad, en gesels met Marvonia Cupido, ‘n Besigheids Adviseur vir Ekonomiese Ontwikkeling. Sy vertel vir hom meer van die rol wat hulle in jong mense se lewens vervul en die werk wat hulle doen. Katlego Chillenje & Matthew Blauw, twee van die Top 10 van die Maak My ‘n Miljoenêr – Entrepreneur van die Jaar kompetisie kuier ook saam en gesels oor hul ondernemings & entrepreneurskap.

Mar-li van der Merwe praat met Dawn Cozett van die Wes-Kaap Departement van Onderwys oor perseptuele leer en hoe perseptuele vaardighede ontwikkel kan word. Heike Brink, ‘n kinderkinetikus, vertel wat haar beroep alles behels. Kinderkinetikus Aleesha Zoutendyk vertel wat handoog-koördinasie is, en gee oefeninge om groot motoriese handoog-koördinasie te verbeter.

Athina Jansen gesels met die skrywer en akteurs van die teaterproduksie, Vloeibare Moed. Hulle wil bewusmaking skep vir geslagsgebaseerde geweld deur hulle kuns. Ons gesels ook met musiekuitblinker Marsha Bothma, wat haar liedjie, Stronger, onlangs vrygestel het.

Arehan Brand gesels met Twanel Botha, ‘n hoërskoolonderwyser met ‘n agtergrond in dieregedrag. Sy vertel van die ooreenkomste tussen troeteldiere en hoërskoolleerders - toemaar, dis nie so erg soos wat jy dink nie! Oriana van der Westhuizen, ‘n sangeres wat ook naels doen, verduidelik hoe dames met lang naels take kan verrig, en sy vertel ook ‘n paar snaakse staaltjies uit haar dae as lugwaardin.

Daar word in die Griekse metologie melding gemaak van aptekerswese. Dit is ‘n ou veld wat al baie ontwikkel en bygedra het tot vandag se moderne en effektiewe mediese sorg. Wat behels aptekerswese? Wat kan jy alles doen met die graad? Dis ‘n groot veld met baie inligting. Kom vind uit of dit die loopbaan vir jou is.

Arehan Brand praat met Christopher Julius, ‘n finansiële beplanner en makelaar, oor finansiële verantwoordelikheid. Dané Schönborn en Mia de Beer, twee van die Top 10 van die Maak My ‘n Miljoenêr Entrepreneur van die Jaar-kompetisie, gesels oor hulle ondernemings en entrepreneurskap.

Mar-li van der Merwe praat met Sanel Vos, ‘n opvoedkundige sielkundige, oor die welstand van graad 12 leerders. Sy vertel hoe leerders angstigheid kan beheer en hoe ouers en opvoeders hulle kan ondersteun. Dieetkundige Aleché Barnard deel eksamen eetwenke, en Len-Barry Simons, ‘n jogainstrukteur, verduidelik  asemhalingstegnieke.