சோழ மன்னரை இழிவாகப் பேசுகின்ற விஷயத்தை இத்தோடு விட்டுவிடு. எல்லாம் தெரிந்தவனாய் பேசுகின்ற திமிரை உடனே கைவிடு. நீ புத்திசாலியாக இருக்கலாம். உனக்குள் ஆயிரம் குறைகள் இருக்கலாம். ஆனால், சோழ மன்னருக்கு எதுவும் தெரியாது. எதுவும் செய்ய லாயக்கற்றவர் என்கிற மாதிரி பேசுகிறாயே, இதை என்னால் பொறுத்துக் கொள்ள முடியாது. நான் உள்ளத்தில் இருந்து பதில் சொல் என்று கேள்வி கேட்க, நீ சொல்கிறாய் என்பதால் நான் உன்னை மன்னித்தேன். மற்றபடி நீ ஏதேனும் ஒரு இடத்தில் வேறு ஏதேனும் ஒரு விதமாய் இதைப் பேசியிருந்தால் உனக்கு மரண தண்டனை நிச்சயம். ஏன் என்னால் உன் குறைகளைத் தீர்க்க முடியாது என்று நினைக்கிறாய்.

காளியினுடைய நெற்றியிலே சார்த்திய மஞ்சளும், குங்குமமும் இருந்தன. அதனை எடுத்துக் கொண்டு ஓடிவர, பூசாரியின் கையிலிருந்த பிரசாதங்கள் பெரியவரிடம் மாறின. பெரியவர் மாலையை இராஜேந்திரரின் கழுத்தில் போட்டார். செண்பக வட்டத்தை இராஜேந்திரரின் வலது கையில் வளையல் போல் மாட்டினார். மஞ்சளை எடுத்து நெற்றில் பொட்டாக இட்டு மார்பில் தடவினார். குங்குமமிட்டார். பூசாரி உடுக்கையை வேகமாக முழக்கினான். கையிலிருந்த விபூதியைப் பிடியெடுத்து இடமும், வலமுமாக சுற்றி 'பூ' என்று முழு பலத்தோடு இராஜேந்திரரின் தலைக்கு மேல் ஊதினான். கையிலிருந்த விபூதியை நாலாபுறமும் வீசினான்.

உடையார் ஸ்ரீ இராஜராஜத்தேவர் செய்வது அற்புதமான காரியம். ஒரேயொரு சாக்கு வைத்து எல்லோரையும் ஒன்றாக்க முயற்சி செய்கிறார். கங்கர்களை, ராஷ்டிரகூடர்களை, சாளுக்கியர்களை, கோயிலின் பொருட்டு நெருக்கமாகச் சேர்க்கிறார். ஸ்ரீ இராஜராஜர் முயற்சி செய்தால் போதுமா. அவர்கள் முன்னுக்கு வரவேண்டாமா. வேறு யாராவது அவர் களை இந்த மையம் நோக்கி நகர்த்த வேண்டாமா. இதற்கு எந்த இடைஞ்சலும் இல்லாமல் இந்தக் காரியம் நிறைவேற வேண்டாமா. வேறு என்ன உதவிகள் செய்வது. வேறு எப்படி இங்கு கட்டுக்கோப்புகள் கொண்டு வருவது.