Í tilefni af Bleikum október verður Kraftur, stuðningsfélag fyrir ungt fólk sem greinst hefur með krabbamein og aðstandendur, með kröftuga kvennastund í Hörpu á morgun klukkan 17:00. Þar munu kraftmiklar konur deila reynslu sinni, hvert þær sækja sinn styrk og hvernig þær hafa tekist á við áskoranir hvort sem er í starfi eða persónulega lífinu. Við fengum í dag til okkar þær Huldu Hjálmarsdóttur framkvæmdastjóra Krafts og Láru Guðrúnu Jóhönnudóttur, sem greindist með brjóstakrabbamein og hefur síðan vakið athygli á þeim málefnum sem betur mega fara í þeim efnum.

Einurð ehf.var stofnað 2010 og hefur sinnt ráðgjöf, stefnumótun, ritstjórn og verkefnastjórnun og býður upp á aðstoð til verkefna tengdum samfélagsþróun, nýsköpun og menntun. Tilgangur félagsins er að vinna að samfélagsþróun og nýsköpun. Erasmus+ styrkir verkefni sem Einurð leiðir og vinnur í samstarfi við Jafnréttishús og fleiri alþjóðleg samtök í Austurríki, Kýpur, Litháen og á Spáni. Markmið verkefnisins er að auka vitund erlendra starfsmanna um þau réttindi, stuðning og þjónustu sem þeir geta nýtt sér í samstarfslöndunum og samkvæmt Evrópskri vinnulöggjöf. Elva Björt Stefánsdóttir, framkvæmdastjóri og stjórnarmaður hjá Einurð kom í þáttinn í dag.

Gunnar Hrafn Jónsson kom í þáttinn í dag með sitt innslag, Skrýtin veröld. Hann er fundvís á skemmtilegar, skrýtnar og umfram allt áhugaverðar fréttir víða að úr heiminum og í dag sagði hann okkur meðal annars frá dularfullu hljóði sem hefur vakið fólk í San Fransisco undanfarið, opinberum galdrakarli Nýja Sjálands sem hefur verið á launaskrá hins opinbera í 23 ár sem seiðskratti, merkri uppgötvun þýskra uppfinningamanna og fleiru.

UMSJÓN GUÐRÚN GUNNARSDÓTTIR OG GUNNAR HANSSON