Kynbundið ofbeldi í íslenskum þjóðsögum er yfirskrift erindis sem haldið verður á Landnámssýningunni í Aðalstræti á morgun. Þar ræðir Dagrún Ósk Jónsdóttir, doktorsnemi í þjóðfræði við Háskóla Íslands, niðurstöður rannsóknar sinnar á birtingarmyndum kvenna í íslenskum þjóðsögum. Þá einkum um ofbeldi gegn konum, í hvernig sögum það birtist, hvaða tilgangi þessar sögur gætu hafa þjónað og hvort það hefur áhrif hver segir söguna og hverjum. Þá verður umræðan tengd viðhorfum til kynferðislegs ofbeldis í samtímanum. Dagrún Ósk kom í þáttinn og sagði okkur meira frá erindinu.

Í dag var komið að síðasta pistli í þáttaröð ?Að fjallabaki? í umsjón Mao Alheimsdóttur. Pistlarnir voru á dagskrá í Sumarmálum í sumar og þessi síðasti tafðist í nokkrar vikur. Í þessum lokapistli sláumst við í för með Mao að Laufaleitum. Við fáum einstakt tækifæri til að fylgja Steini Mássyni, fjallkóngi og öðrum smölum í heila viku í fyrstu göngu á Rangárvallaafrétti. Ingimar Grétar Ísleifsson fyrrverandi fjallkóngur og Sigurgeir Valmundsson, höfundur greinarinnar Skot á Laufaleitum, segja okkur frá hrakningum sem áttu sér stað á Rangárvallaafrétti árið 1963.

UMSJÓN GUÐRÚN GUNNARSDÓTTIR OG GUNNAR HANSSON