Ina revista da la pli gronda festa da musica populara da noss pajais.

L'emprima ura da l'Artg musical dad oz è deditgada plainamain a la Festa federala da musica populara dals 21 fin ils 24 da settember. Quella ha gì lieu per la 14avla giada – e per l'emprima giada en il Tessin a Bellinzona. Da gievgia fin dumengia han passa 80'000 visitadras e visitaders pudì giudair musica populara preschentada da var 2'000 musicantas e musicants e da 250 furmaziuns. Quellas han sunà sin 14 tribunas passa 400 concerts.

Da la partida: bleras furmaziuns e chapellas da tut la Svizra, mintgina cun ses stil e quai ha procurà per gronda variaziun. Però questa giada hai era dà blera musica dal sid da las Alps, cun bandellas, furmaziuns da mandolina e chanzuns popularas tessinaisas. RTR ha registrà diversas da quellas chapellas e furmaziuns e perquai udis Vus oz in Artg musical deditgà a la festa da Bellinzona. Nus avain preparà in'ura cun blers tocs sco: La Lingera, Grappa di Gordola, La bella Ernestina, Auf dem Plomberg, I campan da Bellinzona e La bucca è scu'na porta. E sunar sunan las chapellas Ländlerkompass, Quartetto Prisma, Wybergstürm, ils Fränzlis da Tschlin, Ohalätz e Lisa Stoll, Vent Negru e Flavio Calderari.