Les Fartures

Comenzamos el programa falando con Mayte y Paco, el relevu nel nuevu Tendejón de Fernando, tres la xubilación de Fernando y Rosa. Un relevu natural porque ya se conocen dende va años, y amás Mayte y Paco son vecinos del mesmu Tendejón. Vamos falar con ellos del relevu, de cómo caltienen la ganadería de Fernando, y de los distintos tipos de clientes que tienen elli cola llegada los peregrinos.

Acabamos el programa con Engel y Fulgencio Argüelles, que vienen a falanos de Cervesía. El primer festival de Cerveza Artesano y Poesía ¿del mundu? Van facelo'l sábadu que vien en Cenera (Mieres) y van cuntanos tolo que tienen elli preparáu.

Comenzamos el programa falando con Monchi Álvarez, l'home pegáu a una radiu que podemos esfrutar toles tardes na RPA dende cuantayá, y qu'acaba d'espublizar namás y na menos que dos llibros sobre Xixón.

"Rincones de Gijón", con ilustraciones de Miguel Watio; y "Gijón en la Memoria", con semeyes de Juanjo Arrojo.

Acabamos el programa con Xurde Morán, col que siguimos percorriendo'l Camín a Santiagu. Ya dexamos Fonsagrada, y vamos conociendo pueblinos y, dalgún de los sitios históricos onde paraba l'afición del Sporting camín de Lugo.

Comenzamos el programa falando con César Casado, cocineru del Married. Married foi una ayalga que taba va años n'Uviéu, ufiertando cocina distinta, mui creativa, a perbon preciu. Agora, n' Ḥontoria, Llanes; cocinando nun pequeñu y preciosu hotel, alloñáu de los focos mediáticos y cola tranquilidá del pueblu, pero con un Sol Repsol. Ún de los meyores cocineros d'Asturies.

Acabamos el programa con Marcos Cienfuegos, que vien a la radiu con Julio Fernández, presidente de la IXP Miel d'Asturies. Vamos falar de tolos usos que tien el miel, amás de los llambiones, de dalguna creación que fizo Marcos pa llevar a congresos gastronómicos al rodiu'l miel.

Comenzamos el programa falando con Pedro Morán, 4ª xeneración de Casa Gerardo, ún de los restaurantes más afamaos d'Asturies, cola Estrella Michelín más vieya que tenemos, y que continua na so quinta xeneración col so fíu, Marcos.

Vamos falar con él de la hestoria la so casa de comíes, de cómo llegó la cocina creativa a Asturies, y de cómo conformaron una xeneración que sentó los pegollos de la nueva cocina asturiana.

Y de lo de siempre, a lo nuevo. Vamos falar tamién con Héctor Fandiño, premiu Talento by Abril 2026. Un concursu entamáu per una marca d'aceites gallega qu'acaba de ganar un cocineru mozu de la escuela d'hostelería de Morea.

Comenzamos el programa falando con Jon Tillman, que mudó cola so familia de los Apalaches norteamericanos a Asturies, y lleva escribiendo dende entós una wikipedia sobre la gastronomía asturiana. Vamos falar con él de cómo ve la nuesa, que ya ye suya, gastronomía; y tamién de les conexones entre la so fastera y la nuesa por cuenta la emigración de mineros asturianos a trabayar el cinc.

Acabamos el programa con Guillermo, Paloma, Isabel y Elvira, de 1901 Cocina Gustosa, y Hotel Las Indianas. Un hotel indianu preciosu en Nueva de Llanes, onde Guillermo y Paloma, del Parador del Rey, mudaron la so cocina.

Comenzamos el programa falando con Enol, de Xagó Surf. Acaben d'empezar la so séptima temporada na sablera de Xagón, en Gozón, rescatando'l míticu Bar Quedevo y convirtiéndolo nun sitiu d'alcuentru pal pueblu, pa los turistes, pal mundu cerveceru y pal mundu del surf. Cerveces propies, pizzes de Zio Pig, surf y una montonera d'eventos y conciertos n'un de los sitios de moda d'Asturies.

Acabamos el programa falando con Barbara y Yareah, d'El Trasgu la Fronda, una granxa escuela y muncho más en Llaviana. Sé granxeru per un día, o xúnete a les sos rutes teatralizaes de "L'Aldea Perdía". Pero tamién encarga ún de los sos menús, onde la estrella ye la so sidra y'l corderu a la estaca.

Comenzamos el programa falando con Edén Jimenez, del Grupu Divenire. Edén forma parte de La Esquina del Peso, L'Amasería, Las Terrazas de Sardalla y El Balcón de Bueño. Una charra sobre hostelería, gastronomía, cómo xestionar negocios, y la vida en xeneral, con una de les persones más inquietes nesti mundiu n'Asturies.

Acabamos el programa con Xurde Morán, tamos ya saliendo d'A Fonsagrada, que ye un conceyu per grande, y tien munchos rincones ainda por descubrir.

Comenzamos el programa falando con Jose Álvarez, de la Taberna Narciso, Mónica Armantina, y Xuan F. Piloñeta, de la Fundación Belenos, que vienen a falanos de la Escuela de Teitáu, que van entamar esti branu pa Teberga. Una convivencia onde vas remocicar un teitu mientres unos díes arrodiáu n'andecha d'espertos na materia. Amás vienen a falanos qu'el próximu día 1 convoquen a tolos que se quieran apuntar na braña'l Rebe ḷ ḷón con folixa, charres y tamién gastronomía.

Acabamos el programa con Javi Solís y Verónica García-Peña, que vienen a la radiu cola so Casa Gris a falar de lliteratura y gastronomía. Nesta ocasión, de Jane Eyre, de Charlotte Brontë.

Comenzamos el programa con Borja Alcázar del Abrelatas, que vien a la radiu a falanos de les males crítiques que reciben los restaurantes nes redes sociales. Un tema polémicu nel que vas acabar llorando de risa por cuenta dalguna crítica qu'arrecibió Borja.

Acabamos el programa con Sara Ceballos que vien colos sos Entremeses Repunantes. Falaremos d'OTEA, de llambionaes de Selmana Santa y de si somos más de bocartes o de sardines.

Comenzamos el programa falando con Bea y Dani, Umami. Dos hermanos que ya lleven 9 años al frente del únicu teppanyaky d'Asturies. Cocina xaponés, con toque de plancha, saliéndose de los tópicos del país y cola posibilidá d'acompañalo de bebíes sorprendentes, ya inclusive cócteles.

Acabamos el programa con Marcos Cienfuegos, que vien acompañáu d'Elena Gómez, presidenta de la IXP Choscu de Tinéu. Vamos falar con ellos del choscu, al que-y lleven años dándo-y un bon emburrión, pero qu'aínda sigue siendo abondo desconocíu pa munchos y munches asturianes.