Musica, enavant, marsch – uschia tuna quai la proxima fin d'emna ad Arosa cura che las musicas sa mettan en concurrenza da marschar. En L'instrumentala dad oz faschain nus gust sin la festa da musica chantunala ad Arosa. Nus tadlain ina selecziun da marschs che las musicas participantas vegnan a sunar a la concurrenza da marschar.

D'udir èn enconuschents marschs sco «Schwyzer Soldaten» u il «Bundesrat Gnägi-Marsch». Sper blers marschs da cumponists svizzers vegn era sunà in u l'auter da cumponists internaziunals sco William Rimmer u era Kenneth J. Alford.

Redacziun: Christa Soliva

Bellas chanzuns rumantschas tschentadas per chor e brass band – in project interdisciplinar che collia trais furmaziuns, dus linguatgs e duas culturas. Ils trais ch'èn da la partida: Il cantus firmus surselva (dir. Clau Scherrer), l'ensemble vocal incantanti (dir. Christian Klucker) e la Brass Band Berner Oberland (dir. Corsin Tuor).

Sco quai ch'il titel tradescha gia, è quai il terz disc cumpact e tant la culminaziun sco era la finiziun dal project «Perlas rumantschas III». Il project è vegnì inizià da Corsin Tuor.

En l'instrumentala dad oz pudais vus tadlar bleras da questas bellas chanzuns e cun in zichel cletg, schizunt gudagnar il disc. Bun divertiment e buna fortuna!

Redacziun: Christa Soliva

Sin noss viadi musical visitain nus differents pajais. Mintgin da vus po siemiar durant L'instrumentala da vacanzas u laschar reviver bellas regurdientschas. Nus cumenzain il viadi en il Grischun e tadlain sco emprim il «Graubündner Marsch» ina cumposiziun da Heinrich Steinbeck. Alura udin nus l'enconuschent saut Grec, «Zorba's Dance», il medley «Vive la France», ina chanzun populara da la Scandinavia, intgins enconuschents marschs ed anc bleras autras melodias.

L'instrumentala dad oz è deditgada cumplainamain a la societad da musica da Glion. La musica è vegnida fundada l'onn 1844 ed uschia è ella suenter la musica da Domat, la musica dals cadets e la musica da Tusaun la quart veglia musica dal Grischun. L'instrumentala dad oz è emplenida cun tocs da pag e cun registraziuns da repertori dals davos 30 onns. Dapli da la musica da Glion ed inqual istorgia raquinta a Vus il president actual Marcus Walder.

Dapi il 2005 è el al timun da la BBS – la Brass band Sursilvana. Suenter 14 onns, tschients d'exercizis, blers concerts e numerusas participaziuns a concurrenzas da brass ha Roman Caprez decidì da dar giu la batgetta da la BBS. Per prender cumià da sia BBS ha Roman Caprez survegnì maun liber per metter ensemen il program dal concert primavaun. Uschia è naschì in vast concert cun ses tocs preferids che tanschan da la litteratura originala per brass enfin tar la musica da film e da divertiment.

In concert ch'era RTR ha visità – nus avain registrà quai concert per vus, e preschentain quel en L'Instrumentala dad oz. E sa chapescha vegn era il protagonist principal da quai concert a pled. Roman Caprez raquinta da ses onns sco dirigent, da la scena da brass e da ses futur.

L'Eurovision Song Contest, ina da las pli grondas concurrenzas da musica internaziunala, ha lieu questa fin d'emna a Tel Aviv. L'Instrumentala dad oz è pronta cun hits e semperverds che derasan gia oz atmosfera dad ESC. Nus tadlain hits sco «Rise Like a Phoenix», «Heroes», «Fairytale» e semperverds sco «Puppet on A String», «Swiss Lady» e natiralmain era la chanzun «Viver senza tei» dals Furbaz, ils participants da l'onn 1989. Interpretadas na vegnan questas chanzuns dentant betg da Conchita Wurst, da Pepe Lienhard u da Sandie Shaw, mabain dad enconuschentas furmaziuns da brass ed armonia.

In tema ch'inspirescha adina puspè ils cumponists.  L'instrumentala demussa ch'era la notg stgira ha sias bellas varts. Nus tadlain in pau musica cun in tema che porscha blers differents aspects: per exempel in viadi tras la notg, in'istorgia, ina parti, in sentiment da notg u simplamain l'unica atmosfera d'ina notg.

Dal marsch «Durch den Wald» fin a la polca «Blumengrüsse». En l'instrumentada dad oz faschain nus bainvegni al mais da matg e giudain numerusas cumposiziuns davart la natira, saja quai melodias da flurs, dad utschels, da la plievgia ni simplamain dad ina bella spassegiada or en la natira.

Redacziun: Christa Soliva

En l'instrumentala dad oz pudais vus tadlar ina selecziun da medleys dad enconuschentas chanzuns da rock e pop. Igl uschè numnà medley è ina moda d'integrar gist pliras chanzuns ensemen en in arranschament. Ina retscha da chanzuns da Frank Sinatra unidas en in toc lung e lura avain nus noss emprim titel da l'emissiun dad oz, numnadamain il medley «A Tribute To Frank Sinatra». Plinavant tadlain nus il medley «Abba Gold», «Brilliant Beatles», il medley «Best of Polo Hofer», lura inqual hit da Queen, dad Elton John, dad Elvis, da Whitney Houston e da Stevie Wonder.

Redacziun: Christa Soliva

Emna sontga, l'emna nua ch'il temp para quasi da star airi ed ins è en ina fasa pli calma. Era l'instrumentala dad oz vegn per ina giada pli ruassaivla. D'ina vart pudais tadlar chorals fins e pensivs. E da l'autra vart, chanzuns da saira, chanzuns meditativas, imnis, motettas e psalms.

Redacziun: Christa Soliva