"Ману саги оворагард" яке аз новеллаҳои беҳтарини Шариф Халил аст, ки ҳаёти мураккаби муҳоҷирони корӣ, мушкилоти рӯзгори онҳоро дар бар мегирад. Муаллиф талош варзидааст, ки ҳолати равонии як муҳоҷири дур аз ватанро дар моварои маргу зиндагӣ́ муассир бақалам бидиҳад. Ба таъкиди адиб, баъзан дар назди баъзеҳо саги дайдуе аз одам ҳам бақадртар аст. Бахусус, агар ин одам муҳоҷир бошад, Новеллаи мазкур аз маҷмӯаи "Ширмолаҳои маҳтобӣ" - и қаламкаш интихоб гардид. 

Бояд таъкид кард, ки Шариф Халил аз соли 2017 ба ин сӯ узви Иттифоқи нависандагони Тоҷикистон аст. Маҷмуаи аввалини ҳикоёти ӯ бо номи "Дар пошнаи кӯҳи баланд" аз чоп баромадааст. Навиштаҳои қаламкаш боз дар маҷмуаҳои  дастаҷамъии "Се барги сабз" ва "Суғдиёна" ҷой гирифтаанд.

"Олими мактабхон, сатилҳои хурмо ва давлати Гуптҳо" яке аз аввалин асарҳои нависандаи ҷавон Шодӣ Раҷабзода мебошад. Мавзӯъи навиштаҳои ӯ асосан иҷтимоӣ буда, воқеъаҳои замони моро дар бар мегирад. Чопи ҳамагӣ ду китобаш ("Растагорӣ" ва "Ранҷиш") кофӣ буд, ки қаламаш шинохта шавад ва узви Иттифоқи нависандагони Тоҷикистон гардад. Дар соли 2018 "Растагорӣ", ки ҳикояи "Олими мактабхон, сатилҳои хурмо ва давлати Гуптҳо" аз он гирифта шудааст, аз ҷониби Вазорати фарҳанги кишвар "Китоби сол - 2018" эътироф шудааст. Ҳикояи пешниҳодшуда аз зиндагии мактаббачаест, ки бинобар вазъи молиявии бади оилааш аз таҳсил дур мондааст. Падари ӯ муҳоҷири меҳнатӣ буда,  модараш хонашин аст, ки ба мадад ниёз дорад.

Аудио-ҳикояи мазкур бо дастгирии Институти "Ҷамъияти Кушода" - Бунёди Мадад дар Тоҷикистон омода шудааст.

Ровӣ: шоир ва рӯзноманигор Масъуд Мирзо.