Felisitamos el Día del padre ke selevramos mañana, Domingo 19, ansí eskojimos una poesía dedikada en djudeo-espanyol a todos los padres, de Matilda Gini de Barnatán "El Padre" akompanyamientos al piano de Darío Meta.En patrimonio muzikal sentimos "Por la tu puerta", kante tradisional interpretado por Fortuna.

En Luz de Sefarad partajamos literaturas sefardim i un enshemplo poétiko sefardí kontemporáneo del poeta sefardí Haim Vitaly Sadacca, kon su poema dedikado a Sefarad 'Mis sentimientos por Espanya' onde konta la istoria de sus antepazados en la Djuderías de Sefarad.Patrimonio muzikal: kante sefardí tradisional "Una matika de ruda", del Cd Sephardic Inspiration.

En Luz de Sefarad informamos sovre la deskuverta en serka de una Sinagoga en Utrera, Sevilla, avlamos kon José María Villalobos, Alcalde de Utrera. Se trata de una importante Sinagoga onde se izieron ekskavasiones por parte del Ayuntamiento de Utrera, ke se konta kon su konosensia por investigasiones de Rodrigo Caro en 1604, una deskuverta de valor istóriko sovre el pazado djudió i sefardí, de siglos XIV, XV o puede ser ke desde antes, S XIII.En Patrimonio muzikal ofresemos el kante tradisional sefardí "Esta montanya d'enfrente" en la versión de la kantadera Yasmín Levy.

Las Nonas son las grandes transmisoras de las kumidas tradisionales sefardim, rechetas konservadas  ke partieron de Sefarad kon los djudiós espanyoles i se enrikesieron kon savores diversos al igual ke akontesió kon la lingua.  Azemos musafires en la "Kuzina de Luz de Sefarad" a todos muestros oyentes para ke se ambezen la recheta de "Fritadas de prasa kon karne mulida" una recheta a baze de puero ideal para kualker fiesta o kumida. En Patrimonio muzikal sentimos el kante gastronómiko sefardí de bodas "La komida del aní" interpretado por Paco Díez, en boz i Raúl Olivar en guitarra, del Cd Aromas de Sefarad.

El 12 de Febrero es el "Día Mundial Contra el Uso de los Niños Soldado", ofresemos informasión sovre este tema. En este data se rekodra los ninyos soldado ke son uzados i abusados en varios paízes del mundo por entero, una data de refleksión onde daremos informasión de los ninyos soldados ke son uvligados a komvatir, azer uso de armas i sometidos a sufryensas ke marakarán sus vidas.

Ninyos ke deverían tener una famyia, djogar, ir a la eskola, son esklavizados i uvligados a aktos terivles. Nana sefardí dedikada a todos los ninyos ke sufrieron violensia: "A la Nana y a la Buba", interpretada por María Berasarte, Iris Azquinezer (chelo) i Rainer Seiferth (guitarra).

 

En Luz de Sefarad ofresemos poesía sefardí kontemporánea i un gran karar de kantikas, kantes, romanses i kantes festivos i litúrjikos. Partajamos poesía de David Fintz Altabé "Elejiya a los ke santifikaron el Nombre del Dió en 1492", dedikada a esos djudiós ke pedrieron la vida ma no trokaron su fe, rekodrando a Sefarad.

Kante: Viesho Poema sefardí sovre la amor a la lingua "A tí, lengua florida", en la interpretasión de Mónica Monasterio.

 

Programa Recuerdo del Holocausto, de la Shoá, kon testimonios del sefardí nasido en Saloniki Jack Handeli. El 27 de Enero se konmemora el "Día de la Memoria de la Shoá, Holocausto y de la Prevención de los Crímenes contra la Humanidad", se rekodra kada anyada kon distintos aktos en el mundo por entero. El 27 de Enero de 1945 fue la data de la liverasión del kampo de eksterminio de Auschwitz.

Rekodrando a 6.000.000 de víktimas djudías de la Shoá prezentamos un programa kon testimonios de Jack Handeli, sefardí nasido en Saloniki, ke avla muestra lingua, el djudeo-espanyol desde su chikez.

De modo milakroso Jack Handeli resuhó a sobrebivir, pasando por Auschwitz i unotros kampos de konsentrasión. Despedimos el programa kon un kante en lingua sefardí dedikado en onor de las víktimas gregas de la Shoá "Oh, mis ermanos", interpretado por Judy Frankel.

Kada anyada es de djustisia rekodrar a las víktimas del Olokasto, para rendir un omaje a sus benditas memorias, Z'L.

 

En Luz de Sefarad prezentamos un programa kon istoria de los sefardim i su kultura en la España musulmana. Ofresemos informasiones istórikas sovre la vida de los djudiós en la Peninsula Ibérica en la anyada 700 i en adelantre, la defensa de los djudiós de las sivdades, la koeksistesia en esos tiempos de las tres kulturas, la ovra i kultura en presonajes sefardim. Mos adentramos en detalyios istórikos dokumentados i poko konosidos, el progreso intelektual, kultural i ekonómiko en las Komunidades Djudías i sus aportes a Sefarad. En Patrimonio muzikal sentimos el romanse "Tres ermanikas eran", Janet & Jak Esim.

 

En Luz de Sefarad rekodramos kon un chiko Omaje a Moshé Haelión, sefardí nasido en Saloniki, Grecia, ke sobrebivió a la Shoá, Olokasto, i ke pedrimos en serka. Moshé fue yevado a los kampos de eksterminio de Auschwitz, Mauthausen, Melk i Ebensee, en su lingua djudeo-espanyola relata su istoria para perpetuar la memoria de los ke pedrieron la vida. Konosemos por sus testimonios komo pasó esas anyadas en los kampos, kual era su lavoro i komo reushó en konservar su vida. En Patrimonio muzikal sentimos el kante "A la una yo nasí" en la boz de la kantadera Fortuna. Moshé Haelión Z"L ke en Gan Eden esté.

 

Partajamos la kultura sefardí en Melilla en un Akto Insitusional kon múzika sefardí, kon palavras de Elena Fernández, Consejera de Educación, Cultura, Festejos e Igualdad, i Rafael Robles, Director de Relaciones Interculturales de la Consejería de Educación, Cultura, Festejos e Igualdad. En medio de un akto Institusional selevando la Festividad del Kalendario Evreo de Januka, se asendió la janukia en prezensia de otoridades komo el Presidente de la Ciudad Autónoma de Melilla Eduardo de Castro, Mordejay Guhanich, Presidente de la Comunidad Israelita de Melilla, ansí komo un variado púvliko i membros de la Comunidad Israelita de Melilla ke se toparon selevrando la kultura sefardí kon un resital de múzika sefardí por el Grupo Luz de Sefarad.

En Patrimonio muzikal sentimos el kante litúrjiko "Bendigamos", boz Viviana Rajel Barnatán.