Talið er að um þriðjungur fólks sem fær heilablóðfall fái málstol, sumir jafna sig ágætlega en aðrir sitja uppi með mikla fötlun út ævina. Málstol getur verið mikil hindrun, t.d. í atvinnuþátttöku, námi, félagslegum tengslum og fleira. Evrópudagur talþjálfunar verður 6. mars nk. og við fengum Þórunni Hönnu Halldórsdóttur, forstöðutalmeinafræðing á Reykjalundi, til að koma í þáttinn í dag og segja okkur nánar frá starfi talmeinafræðinga þar, málstoli og nýrri síðu á facebook Málstol á Íslandi.

Tilurð er hugarfóstur tveggja kvenna sem þekkja ófrjósemi af eigin raun. Þær stofnuðu umræðu og upplýsinga síðu á Instagram. Þar kemur meðal annars fram að almennt er klíníska skilgreiningin á ófrjósemi sú að árangurslausar tilraunir gagnkynhneigðs par til þungunar hafi varað í heilt ár með reglulegu kynlífi án getnaðarvarna. Hugtakið nær einnig yfir ítrekaðan fóstumissi. Ófrjósemi er algeng og talið að eitt af hverjum sex pörum glími við hana. Karen Ösp Friðriksdóttir er önnur stofanda þessarar nýju síðu og við ræddum við hana í þættinum í dag.

Tækninni fleygir fram, stundum til góðs og stundum ekki. En eitt sem tæknin gerir mögulegt er að hægt er að stunda nám í sama skóla þótt nemendur séu mögulega staddir í mikilli fjarlægð hver frá öðrum og skólanum sjálfum. Fyrir stuttu var Esther Ösp Valdimarsdóttir ráðin skólastjóri Ásgarðsskóla, sem er einmitt rekinn alfarið á netinu og nemendur mæta heima hjá sér, hver við sína tölvu hér og þar á landinu og jafnvel í öðrum löndum. Kristín okkar Einarsdóttir hitti Esther á skólastjóraskrifstofunni á Hólmavík og fékk að vita hvernig hægt er að reka skóla í skýjunum.

UMSJÓN GUÐRÚN GUNNARSDÓTTIR OG GUNNAR HANSSON