En la Svizra franzosa è Max Jendly ina persunalitad enconuschenta. El ha marcà l'istorgia dal jazz en il chantun Friburg ed è vegnì undrà il 2022 dal chantun cun il premi da cultura per si'ovra da vita.

Il 2017 ha el fundà la «Max Jendly Big Band» (MJBB), in orchester professiunal permanent per musica moderna. La direcziun da «sia» Big Band ha el entant surdà al mexican Gerry Lopez. Sco concert da cumià ha Max Jendly gì l'idea da far ina saira da gala a la Schubertiade d'Espace 2, la MJBB ensemen cun in orchester da chombra da musicistas e musicists professiunals da l'Ucraina ch'èn fugids en Svizra.