Helena Jónsdóttir sálfræðingur og fyrrverandi skólastjóri Lýðskólans á Flateyri kom í þáttinn í dag, en hún rekur ráðgjafafyrirtækið Mental ráðgjöf þar sem hún hjálpar vinnustöðum og stjórnendum að styðja við geðheilbrigði starfsfólks. Ómeðhöndlaður geðvandi getur haft miklar afleiðingar með tilheyrandi kostnaði, veikindafjarvistum, minnkandi framleiðni, aukinni veltu á starfsfólki svo ekki sé talað um skerðingu á lífsgæðum. Helena sagði okkur betur frá þessu í þættinum.

Við sendum beint út frá starfsemi Hugarafls í Síðumúla í gær og kynntumst því starfi sem þar fer fram og er öllum að kostnaðarlausu. Við heyrðum hversu margir koma þangað í mikilli vanlíðan og hvernig sameiginleg reynsla og samtal getur hjálpað fólki að ná bata. Við náðum ekki að segja frá karlahópi sem hittist reglulega til að ræða um sína andlegu líðan því fengum við Grétar Björnsson, sem sagði sögu sína í gær, til að koma til okkar í dag og segja okkur frá.

Edda S. Jónasdóttir hefur komið víða við í matargerð, hún fékk fyrst áhuga á matreiðslu þegar hún fór sem skiptinemi til Bandaríkjanna og kynntist þá framandi hráefnum eins og ferskum ananas og hnetusmjöri. Hún eldaði ofan í laxveiðimenn, bjó í Skotlandi og hefur safnað uppskriftum héðan og þaðan um ævina í bókina, Eftirlætis réttir Eddu, sem hún gefur sjálf út fyrir jólin.

Tónlist í þættinum í dag:

Vetur rís / Brek (Jóhann Ingi Benediktsson, Harpa Þorvaldsdóttir, Guðmundur Atli Pétursson og Sigmar Þór Matthíasson)

Vetur / Egill Ólafsson (Egill Ólafsson)

Næsta vetur / South River Band (Kormákur Þráinn Bragason)

Vetur / Rósa Guðrún Sveinsdóttir (Rósa Guðrún Sveinsdóttir og Sveinn Kristinsson)

UMSJÓN: GUNNAR HANSSON OG GUÐRÚN GUNNARSDÓTTIR