Miðstöðin er sameiginleg rytmadeild nokkurra tónlistarskóla í Reykjavík þar sem krakkar á aldrinum 12 ára til tvítugs með bakgrunn í klassísku tónlistarnámi fá tækifæri til að skipta yfir á rafmagnsgítara, trommur og hljómborð, syngja dægurlög og stofna popphljómsveitir. Nemendur hafa tekið þátt í ýmsum keppnum svo sem Músiktilraunum og Nótunni og nefna má að hljómsveitir á vegum deildarinnar hafa þrisvar sinnum borið sigur úr býtum í Jólalagakeppni Rásar 2. Ólafur Elíasson deildarstjóri Miðstöðvarinnar kom í þáttinn og sagði okkur frá í þættinum í dag.

Við heyrðum í Marco Pizzolato í þættinum, en hann var útnefndur, ásamt Kamilu Walijewska, Reykvíkingur ársins 2022. Reykvíkingur ársins var útnefndur í fyrsta sinn árið 2011. Tilgangurinn var að leita að einstaklingi sem hafði, með háttsemi sinni eða atferli, verið til fyrirmyndar á einhvern hátt og þakka fyrir þeirra framlag. Þau Marco og Kamila standa fyrir svokölluðum frísskáp í miðbæ Reykjavíkur, þar sem markmiðið er að draga úr matarsóun og byggja upp sterkara samfélag í kringum það að deila umframmat í gegnum þessa frísskápa.

Við fengum póstkort frá Magnúsi R. Einarssyni í dag og í póstkorti dagsins velti Magnús fyrir sér veðrinu í Vestmannaeyjum, en það hefur tekið miklum stakkaskiptum frá því í vetur þegar stormur og bylur geysaði í hverri einustu viku. Nú sér til sólar vikulega og það er minni fart á vindinum. Sjómennskan er líka til umfjöllunar og sú mikla fórn sem við Íslendingar höfum fært við lífsbaráttuna út á sjó. Í lokin segir hann frá vatnsskortinum í Eyjum sem er meira áhyggjuefni en sjóræningjar og eldgos.

Tónlist í þættinum í dag:

Draumaprinsinn / Ragnhildur Gísladóttir (Magnús Eiríksson)

Spegilmynd frosin í hel /Dóra og döðlurnar (Bára Katrín Jóhannsdóttir)

Harvest Moon / Krummi Björgvins, KK, Ragnheiður Gröndal, Einar Scheving (Neil Young)

Undir stórasteini / Katrín Halldóra og Páll Óskar (Jón Múli Árnason og Jónas Árnason)

UMSJÓN: GUNNAR HANSSON OG BRYNHILDUR BJÖRNSDÓTTIR