Moiesstudio

D’Ukrain sollt integral an den europäesche Verteidegungssystem integréiert ginn. Dat hat déi lescht Woch den ukrainesche President Wolodymyr Selenskyj gefuerdert.

Net géint déi Iddi weist sech elo den EU-Kommissär fir d’Verteidegung.

D’Europäesch Unioun misst ee System op d’Bee setzen, deen iwwer just d’Länner vun der Unioun erausgeet. An d’Ukrain hätt duerch hir Experienz mam Krich an der Waffeproduktioun Kapazitéiten, déi d’EU net huet, seet den Andrius Kubilius op eis Nofro. De Litauer schléisst net aus, datt d’Ukrain och kéint Deel vun enger europäescher Arméi ginn.

Den EU-Kommissär fir d’Defense stoung Journalisten a Journalistinne vum Radios-Reseau Euranet Plus, an deem den 100,7 Member ass, Ried an Äntwert. D’Danièle Weber war beim Interview derbäi a mécht de Resumé vum Gespréich.

An der Lëtzebuerger Press gouf hien als Dauernörgler oder Querulant beschriwwen. Eisen Archivist Gilles Schreurs kuckt op d'Liewe vum verstuerwene Lokalpolitiker a Jurist zeréck.

A Frankräich gouf et no der Ouschtervakanz zum Deel laang Waardeschlaangen op de Raschtstätten fir E-Autoen ze lueden. Aschätzunge mam ACL Mobilitéitsexpert Frank Maas

115 Schrëftsteller wëllen d'Editions Grasset verloossen. Déi Konsequenz zéie si aus der Entloossung vum Direkter Olivier Nora duerch de Milliardär a Proprietär Vincent Bolloré. Am Milieu gëtt vun der Trumpiséierung vum franséische Verlagswiese geschwat. De Jeff Schinker aus eiser Kulturredaktioun huet den Detail.

Dat ass den Titel vun engem humoristesche Buch iwwer de schwéieren Alldag vu franséische Frontalieren. En Interview mam Auteur Pierre Théobald

D'Kläranlag zu Schëffleng gëtt aktuell vergréissert. Dat fir dem Wuesstem vun de 6 Südgemenge Rechnung ze droen, deenen hiert Ofwaasser hei traitéiert gëtt. Ee weideren Ausbau ass um aktuelle Site vun der Kläranlag dann awer aus Plazmanktem net méi méiglech. D'Sich no engem zousätzleche Standuert huet ugefaangen. Ee Reportage vum Pia Oppel

Vu moies fréi bis owes spéit huet d’Verkéierspolice uechtert d’ganzt Land verstäerkt d’Vitess vun de Gefierer kontrolléiert. Zil vun der paneuropäescher Campagne ass et all Joer d’Leit aus dem Verkéier op d’Gefore vun der Vitess opmierksam ze maachen. De Pit Beffort war fir eis bei enger Policekontroll op der Nationale 5 tëschent Bartreng an Dippech mat dobäi.

Et gëtt Hoffnung, datt eng nei Ronn Gespréicher tëschent den USA an dem Iran schonn dës Woch kéint stattfannen. Éischt héichrangeg Negociatiounen zënter dem Ufank US-israeelesche Krich géint Teheran ware jo leschte Weekend ouni Succès op en Enn gaangen. Eng Wafferou vun zwou Woche besteet weiderhin, mee d'Tensiounen tëschent Washington an Teheran loossen net of, besonnesch an der Strooss vun Hormus, wou d'USA eng Blockad vun iraneschen Häfen annoncéiert hunn.