Dit voel kompleet vir Aletta de Jongh of sy deesdae meer tyd in hospitale as by haar woonstel deurbring. En die onheil wil nie wyk nie. Trouens, vir haar is dit of die onheilswolke dikker en dikker saampak, nes Madame Tomorrow voorspel het.

Lionel Peters se planne ken geen perke nie. ʼn Mens kan maar net wonder wat sy agenda alles behels. Niks stuit hom nie. Hy stoomroller net voort met die een plan ná die ander. Eben de Jager word met ʼn voorstel gekonfronteer wat hom gooi.

Binne die raamwerk van al die onlangse raaiselagtige gebeure begin drie woorde uitstaan: Moord, Posbus en Beulah. Patricia de Villiers word tot in haar fondamente geskud.

Theuns Malan se motorfiets brul weer, maar hierdie keer ry hy nie alleen nie. ʼn Posbussleutel is skielik kritiek belangrik. Vir wie?

Die buitegeboue op Elmari Neethling se ekstra stuk grond spook skielik weer by haar. Dis erger nadat Eben de Jager rottegif op sy plafon gooi en op iets afkom.

Nes jy dink jy het alles beleef waarmee Lionel Peters vorendag kan kom, verras hy jou nog eens. Elmari Neethling besluit om meer aanvallend te wees. Dit word ʼn dag wat Eben de Jager nie gou sal vergeet nie.

Hoekom is Anton de Villiers regtig tronk toe? Met watter sleutelpersoon het sy paaie gekruis voordat hy tronk toe is? Wie begin haar lyf pure speurder hou?

Aletta de Jongh help Eben de Jager om in sy nuwe huis in te trek. Sy kom op iets af wat vir haar verdag voorkom. Wie beland in die hospitaal? Die dag lewer nog ʼn skok op.

Dit lyk of die duiwel los is. Met wie jaag die ambulans nog eens deur die strate van Pretoria? Wat gebeur met Lionel Peters se sekretaresse, miss Potter? Die aand het nog ʼn skokkende en lelike nadraai.

Lionel Peters is steeds op ʼn missie. Hierdie keer druk hy vir Theuns Malan in ʼn hoek en gooi ʼn reuseknuppel in sy spreekwoordelike hoenderhok. Onverwagse dinge gebeur by die Touch of Lavender-fabriek ... en sake loop skeef vir Theuns.