Nog ʼn verdwyning skud almal. Wie raak tussen neus en ore soek? Volgens Madame Tomorrow is dit nog nie naastenby die einde van die slegte nuus nie.

Skokkende inligting oor Monique Daniels se ontvoering kom aan die lig. Wie is verdagte nommer een? Aletta de Jongh word tot in haar fondamente geskud. Dit word ʼn dag wat sy nie gou sal vergeet nie.

Eben de Jager kan nou maar net nie aan Griet Kotze se regte kant kom nie. Dis asof hy aanmekaar die verkeerde ding sê en doen. Maar daar is meer sake as Griet wat vandag in sy kop woel. Hy voel dis tyd om op te tree.

Theuns Malan voel dis nodig om ʼn sekere hok ʼn goeie skud te gee om te sien wat daaruit spring. Die buitegeboue op die grond wat Arnoldus de Jongh destyds gekoop het, is weer ter sprake. Theuns Malan kry die wind van voor.

Lionel Peters steek ʼn vuur aan die brand wat tot ʼn hewige argument aanleiding gee. Elmari Neethling voel genoodsaak om as vredemaker op te tree. Maar maklik is dit gewis nie.

Die vraag kan met reg gevra word of Michael Daniels regtig sy dogter, Monique Daniels, ontvoer het soos beweer word. Wat doen Lionel Peters om sy susterskind op te spoor? Griet Kotze word by die haarkappersalon verras. Dit gee haar baie stof tot nadenke.

Madame Tomorrow van Cullinan is nie skaam om die toekoms te voorspel nie. Griet Kotze is baie ongelukkig omdat Aletta de Jongh haar nie saamgevat het soontoe nie. Veral nie omdat dit boonop lyk of sommige van Madame se voorspellings begin waar word nie.

Elmari Neethling is op ʼn missie. Sy het ʼn blink plan. Wie loop sy storm daarmee? Maar die dag het ʼn lelike nadraai vir haar. Hoekom?

Eben de Jager maak vir ʼn slag sy bors goed skoon. Hy is in die proses ʼn bietjie moedswillig ook. Die onvoorspelbare Griet Kotze doen weer die onverwagse. Wat vang sy dié keer aan?

Hoe hanteer Theuns Malan die misdaadtoneel en watse onthullings doen hy terwyl hy daar is? Elmari Neethling is vas van plan om haar werkerskorps ʼn goed opgeleide korps te maak. Sy tree doelgerig op om dit te verwesenlik. Wie help haar daarmee?