Lionel Peters weier om bes te gee oor sy fabriek in Rosslyn, Pretoria. Hy werk onverpoos aan ʼn paar sake wat noodwendig eers in plek moet wees voor dinge kan gebeur. Wie werk tans in dié fabriek in Rosslyn? Wie doen ʼn ondersoek ter plaatse?

Theuns Malan kom op ʼn belangrike nuwe feit af. Met wie deel hy dit? Aletta de Jongh geniet haar nuwe motor. Sy val in die pad en ry na ʼn vreemde bestemming, met ʼn rede.

Dis ʼn bedrywige Saterdag en weer tyd vir Griet Kotze se volgende besoek aan die kopdokter. Wie trek die metropolisie van die pad af? Iemand beland in die hospitaal.

Lionel Peters bly bedrywig en hy gee duidelik nie maklik bes nie. Daar kan met reg gevra word wat sy agenda eintlik is. Watter kontrakte word alles onderteken?

Sake verloop nie soos Griet Kotze hoop dit moet nie. Maar sy is nie die enigste een wat ʼn versterking nodig het nie. Aletta de Jongh word self verras. Wat veronderstel was om ʼn mooi dag te wees, eindig met ʼn wanklank.

Theuns Malan vra vir nog ʼn parkgesprek. Wat jaag hom? Vir wie het Simon Setúke gebel toe hy in die hospitaal was om sy motor vir hom te bring? Met watter skokkende nuus kom Griet Kotze vorendag?

Patricia de Villiers se verdwyning maak meer as een van haar vriendinne morbied. Elmari Neethling kan nie langer sit en niks doen nie. Sy besluit om in te spring en dinge te laat gebeur.

Elmari Neethling wil ʼn kontrak hernieu. Aletta de Jongh besluit om op haar eie manier na Patricia de Villiers te soek. Waarop kom sy af?

Op die vooraand van Griet Kotze en Eben de Jager se eerste besoek onder toesig aan hulle dogtertjie Maggie, stamp die twee gesellig koppe. Hoe lyk dit of die besoek op ʼn ramp afstuur? Eben kry ʼn groot verrassing.

Theuns Malan maak ʼn goeie bottel rooiwyn oop. Die wyn begin praat en hy bring sy geliefde Tersia op hoogte van die jongste gebeure in sy lewe.