Morgunkaffið var á peppaðari nótunum þennan morguninn. Íslensk tónlist í öndvegi enda tónlistarmenn að gera frábæra hluti. Gestir eru ekki heimilir í hljóðverinu á þessum tímum, þannig að Gísli Marteinn og Björg Magnúsdóttir voru ein síns liðs.

Þjóðin þarf pepp og Morgunkaffið svarar kallinu með dúndrandi skemmtilegri tónlist úr öllum áttum og spjalli um allt milli himins og jarðar. Ellý Vilhjálms og Bob Dylan stytta okkur stundir ásamt fjölmörgum öðrum.

Björg Magnúsdóttir og Gísli Marteinn eru í laufléttu stuði á vorjafndægrum. Engir gestir eru í húsi vegna samkomubanns og sóttvarna, en þau skötuhjú heyra í Bubba Morthens, Dröfn Ösp Snorradóttur og Helga Björnssyni í síma. Mikið af góðri tónlist og gírandi sönglögum.

Morgunkaffið er svart og sykurlaust í dag þótt sólin hækki á lofti. Til að lyfta andanum eru spiluð lög sem eru svokallaðar neglur og koma blóðinu á hreyfingu. Listafólkið Saga Sigurðardóttir og Valdimar Guðmundsson sem sækja orku til æskustöðva á Suðurnesjum, Þingvöllum, Skálholti og víðar koma með sína sjarmerandi framkomu og barmafull af hæfileikum og deila með okkur sigrum og sorgum.

Morgunkaffið er í góðu helgarstuði þennan laugardaginn, spilar mikið af góðri tónlist, gamalli bland við nýja. Pálmi Gestsson leikari og Eydís Blöndal skáld líta í heimsókn og ræða leikritið Útsending sem frumsýnd var í gær með Pálma Gestssyni í aðalhlutverki og Eydís segir okkur frá baráttu sinni fyrir veganisma og betri heimi. Spaugstofan og pólitískur aktivismi er til umræðu, samfélagsmiðlar, kynslóðabil og skotveiði. Eitthvað fyrir alla!

Á fyrsta söngvakeppnislaugardegi ársins vakna Björg Magnúsdóttir og Gísli Marteinn í rífandi stuði og spila eingöngu lög sem einhverja tengingu hafa við Söngvakeppnina eða Eurovision. Þar er af nógu að taka. Gestir þáttarins eru Tolli Morthens listmálari og Andrean Sigurgeirsson dansari. Báðir eru einnig virkir aktívistar í baráttu fyrir betri heimi og fara með himinskautum í spjalli um innra landslag og sjálfsrækt.