Morgunkaffið fagnar febrúarbyrjun og ræðir kórónaveiru, brexit og skjálftavirkni. Gunnar Helgason og Felix Bergsson kíkja í kaffi og segja frá aldarfjórðungs ferli sínum. Allir léttir.

Síðasti þáttur janúarmánaðar. Nýtt tungl. Vaðandi stemning. Aníta Briem leikkona og Hilmar Guðjónsson leikari komu í heimsókn og ræddu um verkin sem þau hafa verið að vinna í: Ráðherrann, Helgi Þór rofnar, Skjálfta og fleira.

Morgunkaffið var á sínum stað í dag, 11. janúar. Björg Magnúsdóttir og Helgi Seljan voru á vaktinni að þessu sinni, í fjarveru Gísla Marteins. Gestir þáttarins voru leikskáldið Tyrfingur Tyrfingsson, sem er nú búsettur í Amsterdam og ritlistarneminn Ugla Egilsdóttir. Á næstunni verður frumsýnt nýtt leikrit eftir Tyrfing, Helgi Þór rofnar í Borgarleikhúsinu. Það mál var rætt sem og ýmislegt fleira, meðal annars reiprennandi frönskukunnátta Uglu og skiptinám hennar í París.

Fyrsti þáttur nýs árs. Bestu lög 2019 spiluð. Árni Vilhjálmsson og Ragnar Ísleifur Bragason úr leikhópnum Kriðpleiri litu við og spjölluðu meðal annars um jólaleikrit Rúv sem þeir sömdu og fluttu.

Gestastjórnandi þáttarins í fjarveru Bjargar Magnúsdóttur var Hafdís Helga Helgadóttir. Jólalög og stemning. Viðtal við Stefán Jón Hafstein.

Þátturinn var í jólaskapi í miðbænum og fékk til sín fjölda góðra gesta sem sögðu okkur frá jólasiðum og stemningu í kringum hátíðirnar. Pétur Gunnarsson rithöfundur sagði okkur frá bók sinni HKL ástarsaga, Ólafur Örn Ólafsson veitingamaður talaði um jólamatinn, Ása Baldursdóttir talaði um jólakvikmyndir og Teitur Magnússon spilaði fallegt lag.

Morgunkaffið var í hátíðarskapi og öll lög þáttarins voru jólalög, nema tvö en þau fjölluðu bæði um Vigdísi Finnbogadóttur sem var einmitt annar gesta þáttarins en hinn var Rán Flygenring sem hefur nýlokið við að skrifa bók um Vigdísi. Þær stöllur töluðu um bókina, kjör Vigdísar, eftirminnilegt samferðafólk hennar, æskustöðvar og fólkið í landinu.

Morgunkaffi-teymið var með óvæntu sniði í dag, því Viktoría Hermannsdóttir fjölmiðlakona stóð vaktina í fjarveru Gísla Marteins. Björg var á sínum stað og tóku dömurnar á móti Manuelu Ósk Harðardóttur athafnakonu og fegurðardrottningu og Jóni Mýrdal eiganda skemmtistaðarins Röntgen á Hverfisgötu. Farið var um víðan völl í spjallinu, samfélagsmiðlar, siðferði, Pepsi Max og heilaæxli svo fátt eitt sé nefnt.

Á síðasta degi nóvembermánaðar er Morgunkaffið í skammdegisstemningu. Vetrarlög eru spiluð, farið í kringum jólalög einsog köttur í kringum heitan graut en engin slík spiluð. Páll Baldvin Baldvinsson hefur nýlokið við að skrifa bók um Síldarárin og sagði hlustendum frá hinum mörgu síldarævintýrum okkar Íslendinga og Maríanna Clara bókmenntafræðingur og leikkona talaði um jólabækur og uppskeruhátíð skálda og bókaunnenda. Bæði hafa þau svo mikinn áhuga á söngleikjum, sem fá drjúgan tíma í þættinum.