Gísli Marteinn Baldursson og Björg Magnúsdóttir leiða hlustendur inn í nýjan dag með góðri tónlist og spjalli um daginn og veginn. Steinunn Sigurðardóttir skáld kemur í heimsókn og ræðir um Listaskáldin vondu, hlutskipti skáldkvenna á áttunda áratugnum og síðast en ekki síst nýja bók Steinunnar Dimmumót sem fjallar um breytingarnar á jöklunum, hamfarahlýnun og ábyrgð mannfólksins. Bókin er líka með sjálfsævisögulegu ívafi og Steinunn talar um æsku sína og unglingsár.

Í þættinum leiða Björg Magnúsdóttir og Gísli Marteinn Baldursson hlustendur inn í nýjan dag og spila skemmtilega tónlist sem hefur tengingar inn í ýmis málefni líðandi stundar. Donna Cruz og Högni Egilsson líta í heimsókn og ræða um kvikmyndina Agnesi Joy þar sem Donna fer með aðalhlutverk og tónlist og kvikmyndaverk sem Högni vinnur að. Þau ræða líka hvers vegna ekki eru fleiri Íslendingar af erlendum uppruna í kvikmyndum.

Björg og Gísli Marteinn voru í banastuði á þessum ágæta laugardagsmorgni þegar tveir mánuðir eru til jóla, takk fyrir! Barnahornið datt inn sem og umræður um póstnúmer og ýmislegt fleira æsispennandi. Gestir dagsins að þessu sinni voru þau Ari Bragi Kárason, trompethöfðingi og Íslandsmethafi í 100 m spretthlaupi karla og Júlíana Sara Gunnarsdóttir leikkona sem var að frumsýna aðra seríu af Venjulegu fólki í vikunni. Gleði og gaman, íþróttir, leiklist, útlönd og afturendar!

Við heyrðum líka í Matthíasi Má kollega okkar sem var staddur á Húsavík í tilefni listviðburðar sem tengist jóga og tónlist.

Rithöfundurinn Halldór Armand Ásgeirsson og Birta Björnsdóttir fréttamaður kíktu í morgunkaffi til Bjargar og Gísla Marteins í dag. Halldór býr í Berlín þar sem hann er nú við skriftir á sinni þriðju skáldsögu. Birta er umsjónarmaður nýs þáttar á Rás 1, Heimskviða.

Björg og Gísli Marteinn voru í geggjuðum gír þrátt fyrir harkalega haustlægð og gula viðvörun víða um landið. Góð tónlist, hugguleg stemning - er hægt að fara fram á meira?

Gestir þáttarins voru rithöfundurinn Andri Snær Magnason sem var að gefa út bókina Um tímann og vatnið, sem þegar hefur verið seld til útgáfu í sjö löndum og Arndís Hrönn Egilsdóttir leikkona, sem hefur fengið lofsamlega dóma fyrir hlutverk sitt í kvikmynd Gríms Hákonarssonar Héraðinu.

Bræðurnir og tónlistarmennirnir Jón og Friðrik Jónssynir mættu í rjúkandi kaffi til Gísla og Bjargar á þessum ágæta laugardagsmorgni. Auk þess voru haustlög spiluð og lög sem tengdust rauða þræði þáttarins: íslenskri kvikmyndatónlist!

Gestir Morgunkaffisins í dag voru rithöfundurinn Auður Ava Ólafsdóttir og útvarps-, tónlistar- og leikaramaðurinn Jóhann Kristófer. Við ræddum bækur, leikhús, óperur, fíkniefni og allskonar við þau og höfðum öll gaman að!

Rykið var síðan dustað af söngleikjahorni Bjargar og Gísla Marteins og fyrsta lagið úr Book of Mormon eftir Trey Parker og félaga, Hello!, var sett á fóninn. Sem sagt góð erlend tónlist í bland við eðalíslenska smelli.

Björg og Gísli Marteinn voru hress og kát mætt í stúdíó 1 Efstaleiti í dag. Smá haustgír í loftinu, þar sem vel er komið inn í september.

Gestir dagsins voru sambýlingarnir og listakonurnar Steinunn Ólína Þorsteinsdóttir og Margrét Kristín Blöndal. Þær voru ferlega skemmtilegar og ræddu allt milli himins og jarðar. Sambúð sína, barnauppeldi, tæki frá djöflinum, list og massatónleika sem Magga Stína stendur fyrir í október.

Morgunkaffið drakk sitt kaffi í Reykjanesbæ í dag í tilefni Ljósanætur. Aðstandendur hátíðarinnar, framkomendur og íbúar á svæðinu kíktu í heimsókn.

Björg og Gísli lögðu land undir fót og flugu þráðbeint til Akureyrar til þess að vera viðstödd Akureyrarvöku, menningarhátíðina norðan heiða. Gríðarleg stemning var í bænum og gestagangur í stúdíói RÚV í bænum mikill.