十八世紀法國經濟興盛，頗為得力於海上貿易。里昂係當時全世界嘅絲織品中心，產品外銷歐洲各國以至其他地區。綿織品在1730年代以後有每年平均百分之四嘅升幅，法國南部嘅羊毛業亦係當時得令。更重要嘅係，法國成為中、北美洲產品暢銷歐洲各國嘅樞紐，咖啡同蔗糖等等大有市場嘅物產令法國商人賺得盤滿缽滿。咖啡室嘅興旺，二手衣飾市場嘅蓬勃，顯示除了上層社會喺經濟增長中得利，中、下層都沾到油水，但1770至1780年間嘅連番經濟衰退，卻使到唔少人彷如從天堂掉進地獄。法國因為連年戰爭，政府已經財政緊拙，不得不謀加稅，但美國...