राज तन में करै, भक्ति जागीर लै,

ज्ञान से लड़ै, रजपूत सोई।

छमा-तलवार से जगत को बस्सि करै

प्रेम की जुज्झ मैदान होई।।

लोभ औ मोह हंकार दल मारिकै

काम औ क्रोध ना बचै कोई।

दास पलटू कहै तिलकधारी सोई,

उदित तिहुं लोक रजपूत सोई।। 5।।

गाय-बजाय के काल को काटना,

और की सुनै कछु आप कहना।

हंसना-खेलना बात मीठी कहै,

सकल संसार को बस्सि करना।।

खाइये-पीजिये मिलैं सो पहिरिए,

संग्रह और त्याग में नाहिं परना।

बोलु हरिभजन को मगन ह्वै प्रेम से

चुप्प जब रहौ, तब ध्यान धरना।। 6।।

सुंदरी पिया की पिया को खोजती,

भई बेहोश तू पिया कै कै।

बहुत सी पदमिनी खोजती मरि गई,

रटत ही पिया पिया एक एकै।।

सती सब होती हैं जरत बिनु आगि से,

कठिन कठोर वह नाहिं झांकै।

दास पलटू कहै सीस उतारिकै

सीस पर नाचु जो पिया ताकै।। 7।।

पूरब ठाकुरद्वारा पच्छिम मक्का बना,

हिंदु और तुरक दुइ ओर धाया।

पूरब मूरति बनी पच्छिम में कबुर है,

हिंदू और तुरक सिर पटकि आया।।

मूरति और कबुर ना बोलै ना खाय कछु,

हिंदू और तुरक तुम कहां पाया।

दास पलटू कहै पाया तिन्ह आप में

मूए बैल ने कब घास खाया।। 8।।

प्रश्न और उत्तर

बोलु हरिनाम तू छोड़ि दे काम सब

सहज में मुक्ति होइ जाए तेरी।

दाम लागै नहीं, काम यह बड़ा है,

सदा सतसंग में लाउ फेरी।।

बिलम न लाइकैं डारि सिर भार को,

छोड़ि दे आस संसार केरी।

दास पलटू कहै यही संग जाएगा।

बोलु मुख राम यह अरज मेरी।। 1।।

पूरब में राम है, पच्छिम खुदाय है,

उत्तर और दक्खिन कहो कौन रहता?

साहिब वह कहां है, कहां फिर नहीं है,

हिंदू और तुरक तोफान करता।।

हिंदू और तुरक मिलि परे हैं खैंचि में

आपनी बर्ग दोउ दीन बहता।

दास पलटू कहै, साहिब सब में रहै,

जुदा न तनिक, मैं सांच कहता।। 2।।

जाहि तन लगि है, सोइ तन जानिहै

जानिहै वही सतसंग-वासी।

कोटि औषधि करैं, विरह ना जाएगा,

जाहि के लगी है विरहगांसी।।

नैन झरना बन्यौ, भूख ना नींद है

परी है गले बिच प्रेम-फांसी।

दास पलटू कहै, लगी ना छूटिहै,

सकल संसार मिलि करै हांसी।। 3।।

होय रजपूत सो चढ़ै मैदान पर,

खेत पर पांच-पच्चीस मारै

काम औ क्रोध दुई दुष्ट ये बड़े हैं,

ज्ञान के धनुष से इन्हें टारै।।

कूद परि जायकै कोट काया मंहै,

आगि लगाय के मोह जारै।।

दास पलटू कहैं सोई रजपूत है,

लेहि मन जीति तब आपु हारै।। 4।।

प्रश्न और उत्तर

जैसे नद्दी एक है, बहुतेरे हैं घाट।।

बहुतेरे हैं घाट, भेद भक्तन में नाना।

जो जेहि संगत परा, ताहि के हाथ बिकाना।।

चाहे जैसी करै भक्ति, सब नामहिं केरी।

जाकी जैसी बूझ, मारग सो तैसी हेरी।।

फेर खाय इक गये, एक ठौ गये सिताबी।

आखिर पहुंचे राह, दिना दस भई खराबी।।

पलटू एकै टेक ना, जेतिक भेस तै बाट।

जैसे नद्दी एक है, बहुतेरे हैं घाट।। 19।।

लेहु परोसिनि झोंपड़ा, नित उठि बाढ़त रार।।

नित उठि बाढ़त रार, काहिको सरबरि कीजै।

तजिये ऐसा संग, देस चलि दूसर लीजै।।

जीवन है दिन चारि, काहे को कीजै रोसा।

तजिये सब जंजाल, नाम कै करौ भरोसा।।

भीख मांग बरु खाय, खटपटी नीक न लागै।

भरी गौन गुड़ तजै, तहां से सांझै भागै।।

पलटू ऐसन बुझि के, डारि दिहा सिर भार।

लेहु परोसिनि झोंपड़ा, नित उठ बाढ़त रार।। 20।।

जल पषान को छोड़िकै, पूजौ आतमदेव।।

पूजौ आतमदेव, खाय औ बोलै भाई।

छाती दैकै पांव पथर की मुरत बनाई।।

ताहि धोय अन्हवाय विजन लै भोग लगाई।

साक्षात भगवान द्वार से भूखा जाई।।

काह लिये बैराग, झूठ कै बांधै बाना।

भाव-भक्ति को मरम कोइ है बिरलै जाना।।

पलटू दोउ कर जोरिकै गुरु संतन को सेव।

जल पषान को छोड़िकै पूजौ आतमदेव।। 21।।

प्रश्न और उत्तर

मन मिहीन कर लीजिए, जब पिउ लागै हाथ।।

जब पिउ लागै हाथ, नीच ह्वै सब से रहना।

पच्छापच्छी त्याग उंच बानी नहिं कहना।।

मान-बड़ाई खोय खाक में जीते मिलना।

गारी कोउ दै जाय छिमा करि चुपके रहना।।

सबकी करै तारीफ, आपको छोटा जानै।

पहिले हाथ उठाय सीस पर सबकी आनै।।

पलटू सोइ सुहागनी, हीरा झलकै माथ।

मन मिहीन कर लीजिए, जब पिउ लागै हाथ।। 16।।

पानी काको देइ प्यास से मुवा मुसाफिर।।

मुवा मुसाफिर प्यास, डोर ओ लुटिया पासै।

बैठ कुवां की जगत, जतन बिनु कौन निकासै।।

आगै भोजन धरा थारि में खाता नाहीं।

भूख-भूख करै सोर, कौन डारै मुखमाहीं।।

दीया-बाती तेल आगि है नाहिं जरावै।

खसम खोया है पास, खसम को खोजन जावै।।

पलटू डगरा सूध, अटकिकै परता गिर-गिर।

पानी काको देइ प्यास से मुवा मुसाफिर।। 17।।

संत-चरन को छोड़िकै, पूजत भूत-बैताल।।

पूजत भूत-बैताल, मुए पर भूतइ होई।

जेकर जहवां जीव, अंत को होवै सोई।।

देव-पितर सब झूठ, सकल यह मन की भ्रमना।

यही भरम में पड़ा, लगा है जीवन-मरना।।

देई-देवा सेव परम-पद केहिने पावा।

भैरों दुर्गा सीव बांधिकै नरक पठावा।।

पलटू अंत घसीटिहैं, चोटी धरि-धरि काल।

संत-चरन को छोड़िकै, पूजत भूत-बैताल।। 18।।

प्रश्न और उत्तर

सोई सती सराहिये, जरै पिया के साथ।।

जरै पिया के साथ, सोई है नारि सयानी।

रहै चरन चित लाय, एक से और न जानी।।

जगत करै उपहास, पिया का संग न छोड़ै।

प्रेम की सेज बिछाय, मेहर की चादर ओढ़ै।

ऐसी रहनी रहै, तजै जो भोग-विलासा।

मारै भूख-पियास याद संग चलती स्वासा।।

रैन-दिवस बेहोस, पिया के रंग में राती।

तन की सुधि है नाहिं, पिया संग बोलत जाती।।

पलटू गुरु परसाद से किया पिया को हाथ।

सोई सती सराहिए, जरै पिया के साथ।। 13।।

तुझे पराई क्या परी, अपनी आप निबेर।।

अपनी आप निबेर, छोड़ि गुड़ विस को खावै।

कूवां में तू परै, और को राह बतावै।।

औरन को उजियार, मसालची जाय अंधेरे।

त्यों ज्ञानी की बात, मया से रहते घेरे।।

बेचत फिरै कपूर, आप तो खारी खावै।

घर में लागी आग, दौड़ के घूर बुतावै।

पलटू यह सांची कहै, अपने मन का फेर।

तुझे पराई क्या परी, अपनी आप निबेर।। 14।।

पलटू नीच से ऊंच भा, नीच कहै ना कोय।।

नीच कहै ना कोय, गये जब से सरनाई।

नारा बहिके मिल्यो गंग में गंग कहाई।।

पारस के परसंग, लोह से कनक कहावै।

आगि मंहै जो परै, जरै आगइ होइ जावै।।

राम का घर है बड़ा, सकल ऐगुन छिप जाई।

जैसे तिल को तेल, फूल संग बास बसाई।।

भजन केर परताप तें, तन-मन निर्मल होय।

पलटू नीच से ऊंच भा, नीच कहै न कोय।। 15।।

प्रश्न और उत्तर