सीस उतारै हाथ से, सहज आसिकी नाहिं।।

सहज आसिकी नाहिं, खांड खाने को नाहीं।

झूठ आसिकी करै, मुलुक में जूती खाहीं।।

जीते जी मरि जाय, करै ना तन की आसा।

आसिक का दिन-रात, रहै सूली उपर बासा।।

मान बड़ाई खोय, नींद भर नाहीं सोना।

तिलभर रक्त न मांस, नहीं आसिक को रोना।।

पलटू बड़े बेकूफ वे, आसिक होने जाहिं।

सीस उतारै हाथ से, सहज आसिकी नाहिं।। 10।।

यह तो घर है प्रेम का, खाला का घर नाहिं।।

खाला का घर नाहिं, सीस जब धरै उतारी।

हाथ-पांव कटि जाय, करै ना संत करारी।।

ज्यौं-ज्यौं लागै घाव, तेहुं-तेहुं कदम चलावै।

सूरा रन पर जाय, बहुरि न जियता आवै।।

पलटू ऐसे घर महैं, बड़े मरद जे जाहिं।

यह तो घर है प्रेम का, खाला का घर नाहिं।। 11।।

लगन-महूरत झूठ सब, और बिगाड़ैं काम।।

और बिगाड़ैं काम, साइत जनि सोधैं कोई।

एक भरोसा नाहिं, कुसल कहुवां से होई।।

जेकरे हाथै कुसल, ताहि को दिया बिसारी।

आपन इक चतुराई, बीच में करै अनारी।।

तिनका टूटै नाहिं, बिना सतगुरु की दाया।

अजहूं चेत गंवार, जगत है झूठी काया।।

पलटू सुभ दिन सुभ घड़ी, याद पड़ै जब नाम।

लगन-महूरत झूठ सब, और बिगाड़ै काम।। 12।।

प्रश्न और उत्तर

क्या सोवै तू बावरी, चाला जात बसंत।। 

चाला जात बसंत, कंत ना घर में आये। 

धृग जीवन है तोर, कंत बिन दिवस गंवाये।। 

गर्व गुमानी नारि फिरै जोवन की माती। 

खसम रहा है रूठि, नहीं तू पठवै पाती।। 

लगै न तेरो चित्त, कंत को नाहिं मनावै।। 

कापर करै सिंगार, फूल की सेज बिछावै।। 

पलटू ऋतु भरि खेलि ले, फिर पछतावै अंत। 

क्या सोवै तू बावरी, चाला जात बसंत।। 7।। 

ज्यौं-ज्यौं सूखै ताल है, त्यौं-त्यौं मीन मलीन।। 

त्यौं-त्यौं मीन मलीन, जेठ में सूख्यो पानी। 

तीनों पन गए बीति, भजन का मरम न जानी। 

कंवल गए कुम्हिलाय, हंस ने किया पयाना। 

मीन लिया कोऊ मारि, ठांय ढेला चिहराना। 

ऐसी मानुष-देह वृथा में जात अनारी। 

भूला कौल-करार आपसे काम बिगारी।। 

पलटू बरस औ मास दिन, पहर घड़ी पल छीन। 

ज्यौं-ज्यौं सूखै ताल है, त्यौं-त्यौं मीन मलीन।। 8।। 

पिय को खोजन मैं चली, आपुइ गई हिराय।। 

आपुइ गई हिराय, कवन अब कहै संदेसा। 

जेकर पिय में ध्यान, भई वह पिय के भेषा।। 

आगि-माहि जो परै, सोउ अगनी हवै जावै। 

भृंगी कीट को भेंट, आपु सम लैइ बनावै।। 

सरिता बहिकै गई, सिंध में रही समाई। 

सिव सक्ती के मिले, नहीं फिर सक्ती आई।। 

पलटू दिवाल कहकहा, मत कोउ झांकन जाय। 

पिय को खोजन मैं चली, आपुइ गई हिराय।। 9।। 

प्रश्न और उत्तर

दीपक बारा नाम का, महल भया उजियार।। 

महल भया उजियार, नाम का तेज विराजा। 

सब्द किया परकास, मानसर ऊपर छाजा।। 

दसों दिसा भई सुद्ध, बुद्ध भई निर्मल साची। 

छूटी कुमति की गांठ, सुमति परगट होय नाची।। 

होत छतीसो राग, दाग तिर्गुन का छूटा। 

पूरन प्रगटे भाग, करम का कलसा फूटा।। 

पलटू अंधियारी मिटी, बाती दीन्ही बार। 

दीपक बारा नाम का, महल भया उजियार। 4।। 

हाथ जोरि आगे मिलैं, लै-लै भेंट अमीर।। 

ले-लै भेंट अमीर, नाम का तेज विराजा। 

सब कोऊ रगरै नाक, आइकै परजा-राजा।। 

सकलदार मैं नहीं, नीच फिर जाति हमारी। 

गोड़ धोय शटकरम, वरन पीवै लै चारी।। 

बिन लसकर बिन फौज, मुलुक में फिरी दुहाई। 

जन-महिमा सतनाम, आपु में सरस बढ़ाई।। 

सत्तनाम के लिहे से पलटू भया गंभीर। 

हाथ जोरि आगे मिलैं, लै-लै भेंट अमीर।। 5। 

संत सासना सहत हैं, जैसे सहत कपास।। 

जैसे सहत कपास, नाय चरखी में ओटै। 

रुई धर जब तुनै हाथ से दोउ निभोटै।। 

रोम-रोम अलगाय पकरिकै धुनिया धूनी। 

पिउनी बहं दै कात, सूत ले जुलहा बूनी।। 

धोबी भट्टी पर धरी, कुंदीगर मुगरी मारी। 

दरजी टुक टुक फारि-जोरिकै किया तयारी।। 

परस्वारथ के कारने दुख सहै पलटूदास। 

संत सासना सहत हैं, जैसे सहत कपास।। 6।।

प्रश्न और उत्तर

नाव मिली केवट नहीं, कैसे उतरै पार।।

कैसे उतरै पार पथिक विश्वास न आवै।

लगै नहीं वैराग यार कैसे कै पावै।।

मन में धरै न ग्यान, नहीं सतसंगति रहनी।

बात करै नहिं कान, प्रीति बिन जैसी कहनी।।

छूटि डगमगी नाहिं, संत को वचन न मानै।

मूरख तजै विवेक, चतुराई अपनी आनै।।

पलटू सतगुरु सब्द का तनिक न करै विचार।

नाव मिली केवट नहीं, कैसे उतरै पार।। 1।।

साहिब वही फकीर है जो कोई पहुंचा होय।।

जो कोई पहुंचा होय, नूर का छत्र विराजै।

सबर-तखत पर बैठि, तूर अठपहरा बाजै।।

तंबू है असमान, जमीं का फरस बिछाया।

छिमा किया छिड़काव, खुशी का मुस्क लगाया।।

नाम खजाना भरा, जिकिर का नेजा चलता।

साहिब चौकीदार, देखि इबलीसहुं डरता।।

पलटू दुनिया दीन में, उनसे बड़ा न कोय।

साहिब वही फकीर है, जो कोई पहुंचा होय।। 2।।

लहना है सतनाम का, जो चाहै सो लेय।।

जो चाहै सो लेय, जायगी लूट ओराई।

तुम का लुटिहौ यार, गांव जब दहिहै लाई।।

ताकै कहा गंवार, मोठभर बांध सिताबी।

लूट में देरी करै, ताहि की होय खराबी।।

बहुरि न ऐसा दांव, नहीं फिर मानुष होना।

क्या ताकै तू ठाढ़, हाथ से जाता सोना।।

पलटू मैं ऊरिन भया, मोर दोस जिन देय।

लहना है सतनाम का, जो चाहै सो लेय।। 3।।

अज्ञात की ओर - सातवां प्रवचन

अज्ञात की ओर - छठा प्रवचन

अज्ञात की ओर - पांचवां प्रवचन