Núllið

Ungskáldið Magnús Jochum Pálsson gaf nýverið út örsagnasafnið Óbreytt ástand, Magnús kíkti til okkar, sagði okkur frá skrifunum og las fyrir okkur tvær stuttar sögur. Egill Spegill er á sínum stað og fer yfir það helsta sem er að gerast um helgina. Við hringjum svo á Seyðisfjörð þar sem Atli Óskar Fjalarsson er staddur við tökur á stuttmynd, hann segir okkur frá henni.

Við kynnumst Improv Ísland örlítið og Búi Aðalsteinsson segir okkur frá spunamaraþoni hópsins sem að mun fara fram á menningarnótt. Tónlistarkonan GDRN kíkir líka í heimsókn með nýju plötuna sína sem að kemur út á morgun. Síðast en ekki síst fer Kristjana Arnarsdóttir yfir það helsta sem er að frétta úr íþróttaheiminum.

Inga Steinunn Henningsdóttir og Mikael Emil Kaaber munu ferðast um landið ásamt leiðsögumanni í nýjum þáttum sem væntanlegir eru á RÚVnúll, krakkarnir kíktu til okkar og sögðu okkur frá því markverðasta úr ferðunum og við hverju má búast í þáttunum. Pétur Marteinn fræðir okkur um hinn áhugaverða mann sem Raspútín hefur að geyma og Katrín Helga Ólafsdóttir og Annalísa Hermannsdóttir gáfu nýlega út myndband við lag Katrínar, þær sögðu okkur frá ferlinu.

Strákarnir á bakvið Hiphop hátíð menningarnætur, Jason Daði og Snorri Ástráðsson kíkja til okkar og segja okkur frá hátíðinni sem að hefur stækkað með hverju árinu. Geir Finnsson er á sínum stað eins og aðra þriðjudaga og fræðir okkur meðal annars um hugsanlegan nýjan James Bond og Minecraft bíómynd. Egill Ástráðsson fer svo yfir rapparann 6ix9ine með okkur en hann er gífurlega umdeildur og komst nýverið í umræðuna eftir lag sem að hann gaf út með Nicki Minaj.

Söngkonan Matthildur kíkir til okkar með nýja og fyrsta lagið sitt, Wonder. Mánudagsgestur vikunnar er svo engin önnur en Sonja Valdin. Við ræðum samfélagsmiðlana, leiklistina, Áttuna og Eurovision. Karen Björg Þorsteinsdóttir er svo á sínum stað með tískuhornið og í dag ræðir hún við okkur skartgripi.

Í vikunni bárust fréttir af því að hlutfall þeirra sem eru að kaupa sér sína fyrstu íbúð hefur aldrei verið hærra, við ræðum við Jón Bjarka Bentsson, hagfræðing, um stöðu fasteignamarkaðarins fyrir ungt fólk. Egill Spegill er staddur í London þennan föstudaginn en við heyrum nú samt sem áður í honum og sjáum hvað er framundan um helgina. Svo koma þau Hrafnhildur Marta Guðmundsdóttir og Pétur Björnsson úr kammersveitinni Elju til okkar og segja okkur frá tvennum tónleikum sem að sveitin mun halda um helgina.

Við hringjum í Ingu Björg Margrétar-Bjarnadóttur sem er stödd í Borgarnesi og er einn af skipuleggjendum listahátíðarinnar Plan-B, hún segir okkur betur frá hátíðinni sem að fer fram um helgina. Helga Haraldsdóttir kemur líka til okkar og fer yfir dagskrá Hinsegin daga með okkur en opnunarhátíðin mun fara fram í dag. Síðast en ekki síst förum við svo yfir nýja landsliðsþjálfara íslenska karlalandsliðsins í fótbolta en Valur Páll Eiríksson, íþróttafréttamaður, var á blaðamannafundi KSÍ í gær.

Í þætti dagsins gerum við upp Verslunarmannahelgina og heyrum viðtöl sem tekin voru í Vestmannaeyjum á meðan þjóðhátíð stóð. Svo hringjum við í Torfa Fannar Gunnarsson, fatahönnuð, sem mun næstu vikur vera með sýningu í Hönnunarsafni Íslands og prjóna föt eftir pöntunum. Við heyrum líka í Pétri Marteini sem að komst ekki til okkar í dag en situr sveittur við lærdóm.

Það eru margir sem ætla að taka þátt í Reykjavíkurmaraþoninu, þeirra á meðal eru vinirnir Aron Már Ólafsson, Sigurbjartur Sturla Atlason og Pétur Kiernan, við hringdum í Pétur og heyrðum aðeins hvernig undirbúningurinn gengur. Geir Finnsson er svo á sínum stað eins og alla þriðjudaga og í dag segir hann okkur meðal annars frá tölvuleikjum í bíla og væntanlegri kvikmynd um Dóru landkönnuð. Hljómsveitin Munstur gaf nýlega út nýtt lag og mun halda óvenjulega tónleika á Menningarnótt, Kristinn Arnar Sigurðsson og Atli Arnarsson komu og ræddu við okkur.

Egill Spegill mætir og fer yfir alla þær fjölmörgu hátíðir sem að fara fram um helgina og við fáum að heyra brot úr þættinum Hve glötuð er vor æska? þar sem Þorvaldur Sigurbjörn Helgason ræðir við nokkur ungskáld.