Við höldum áfram að fylgjast með LungA, listahátíð ungs fólks á Seyðisfirði og í dag heyrum við í Birnu Schram sem er stödd á hátíðinni. Hún er ásamt fleirum að byggja nektarsaunu sem að verður tekin í notkun um helgina. Valur Páll Eiríksson íþróttafréttamaður fór svo með okkur yfir það helsta sem er að frétta úr heimi íþróttanna.

Lunga, listahátíð ungs fólks hófst á Seyðisfirði síðastliðinn sunnudag. Hátíðinn stendur yfir í heila viku og heilmikil dagskrá er í boði alla vikuna. Við hringdum í Björt Sigfinnsdóttur framkvæmdarstjóra hátíðarinnar. Þorvaldur Sigurbjörn Helgason velti því fyrir sér í nýjasta þætti af Hve glötuð er vor æska hvort að hipsterinn væri dauður, við heyrðum hugleiðingar Þorvalds.

Ísak er kominn aftur eftir stutt frí, Geir Finnsson kemur og ræðir hugsanlega kvikmynd um hetjulegu björgunina á tælensku drengjunum sem fastir voru í helli. HM Hákon gerir upp mótið í heild sinni, velur sína uppáhaldsleikmenn og rýnir í úrslit helgarinnar.

Söngkonan Hildur er mánudagsgestur vikunnar, við komumst að því hvað hún er búin að vera að gera undanfarið og fáum meðal annars að vita afhverju hún kann japönsku. Karen Björg er á sínum stað með tískuhornið en að þessu sinni skoðar hún tengsl tísku og sjónvarpsþátta.

Eins og alla aðra föstudaga keyrum við okkur í gang með Agli Spegil og hann segir okkur hvar fjörið verður um helgina. Við fræðumst líka örlítið um föstudaginn 13. sem að er jú í dag og HM Hákon kemur með sína lokaspá fyrir lokaleiki HM sem fram fara um helgina.

Við erum á landsbyggðarnótum í þætti dagsins og hringjum bæði á Sauðárkrók og á Neskaupsstað. Pálína Ósk Hraundal er stödd á Sauðárkróki þar sem að Landsmót UMFÍ fer fram um helgina og Hákon Hildibrand er í sólinni á Neskaupsstað þar sem að Eistnaflug hófst í gær. Við förum svo yfir allt það helsta sem er í gangi í heimi íþróttanna með Einari Erni Jónssyni, íþróttafréttamanni.

Pétur Marteinn fer yfir nýja tilnefningu Donalds Trump til hæstaréttardómara og útskýrir fyrir okkur í leiðinni hvað hæstaréttardómari gerir í Bandaríkjunum. Tónlistamaðurinn Huginn kíkti svo til okkar og sagði okkur frá nýju plötunni sinni sem að hann gaf út fyrir helgi.

Geir Finnsson breytir aðeins út af vananum þennan þriðjudaginn og talar um kvikmyndir í staðinn fyrir tölvuleiki, þar ber helst að nefna drama í Star Wars heiminum. Kristín Hulda Gísladóttir formaður geðfræðslufélagsins Hugrúnar kom og sagði okkur frá starfi félagsins og bingói sem að þau ætla að halda í vikunni.

Engin önnur en Salka Sól er mánudagsgestur þessarar viku en hún hefur heldur betur í nógu að snúast. Karen Björg Þorsteinsdóttir er svo að sjálfsögðu á sínum stað með tískuhornið og þessa vikuna ætlar hún að tala um töskur.

Við keyrum okkur heldur betur í gang fyrir helgina í þætti dagsins, Jakob Birgisson, góðvinur þáttarins, var að gefa út sumarsmell sumarsins og mætti að sjálfsögðu til okkar og ræddi um hann. Egill Spegill var svo á sínum stað með allt það heitasta sem er að gerast um helgina, hvort sem það er í Nauthólsvík eða á Prikinu.