Nuntii Latini

Saab in diciōnem Americānōrum redditus

Alexander Saab, praedīvēs mercātor Colombiānus et amīcus ac cōnsiliārius Nīcolāī Mātūrī, tyrannī Venetiolānōrum, abhinc annō ā magistrātibus reīpūblicae Capitis Vīridis in Africā comprehēnsus, in diciōnem et solum Americānōrum est diē Saturnī redditus, ubi reus fiet tabulārum scelerum tegendōrum causā adulterātārum.  Accūsātōrēs enim dīcunt Alexandrum Saab pecūniā corrūpuisse magistrātūs Venetiolānōs, quī ā sē emerent cibōs pauperibus destinātos, quōs cibōs vel quālitāte vel quantitāte dēficientēs ipse suppeditāret ut lucrum sibi faceret.  Prō suā parte Venetiolānī mīlitēs ēlectī captīvōs sex, negōtiātōrēs petroleī inter quōs quīnque cīvēs Americānī numerantur, quī suīs in domīs ex annō bis millēsimō septimō decimō tenēbantur, dēnuō comprehendērunt abdūxēruntque atque in Helicoīdēn, carcerem ubi ob causās politicās hominēs tenentur et cruciantur, transtulērunt.  Nam vidētur tyrannus Venetiolānōrum sperāre sē prō suō amīcō obsidēs trāditūrum.  Veronica Vadell, fīlia unīus obsidis, dixit sē pudēre pigēreque vidēre regimina vītīs mortālium lūdere, sīcut deōs vel etiam puerōs dē lūdicrō quōdam rixantēs.  Blanca Vēra Azaf, diurnāria Venetiolāna, scrīpsit Alexandrum Saab dēberē inter hominēs maximē exōsōs habērī, ut quī magnum patrimōnium dē iēiūniō populī sibi congessisset.

Americānī in Haitiā captīvī

In Haitiā sēdecim cīvēs Americānī, inter quōs puerī trēs, et ūnus Canadēnsis, quī fideī et cāritātis causā puerōs parentibus orbātōs in orphanotrophīō visitābant ā latrōnibus captī sunt.   Poscunt latrōnēs deciēs centēna mīlia nummōrum Americānōrum prō singulīs captīvīs.  Latrōnēs līberē grassantur per māiōrem partem urbium ēius rēpūblicae collapsae, cūius praeses mēnse Iūliō percussus est ā sīcāriīs adhūc ignōtīs.  Posterō diē Āriēl Henry, minister prīmārius, ēiusque satellitēs, congregātī foris ubi ūnum dē patribus patriae corōnā pōnendā commemorārent, coactī sunt ā latrōnibus fugere: nam in Haitiā magis pollent latrōnēs quam magistrātūs.

Colin Powell vītā functus

Colin Powell, dux et lēgātus Americānus, lue corōnāriā obiit.  Īdem vir, cum centūriō seu capitāneus esset, in bellō Indosīnēnsī mīlitāvit, dein post vīgintī annōs, cum ad imperium prōmōtus esset, prīmum Panamam et posteā Iraquiam subēgit.  Ēius doctrīna mīlitāris erat tantās copiās comparāre ut vī inexsuperābilī hostēs omnī spē salūtis orbātī quam brevissimē dēbellārentur.  Saeculō autem vīcēsimō prīmo factus est minister rēbus exterīs praefectus, et coram Consociātiōne Omnium Nātiōnum falsīs indiciīs armōrum prohibitōrum prōlātīs suasit Iraquiam dēnuō dēbellandam.  Vīxit annōs octōginta et quattuor.

Sīnēnsēs in caelō

Diē Saturnī Sīnēnsēs trēs in caelum missī sunt ad Tiāngōng seu Palātium Caeleste, quō nōmine appellātur stātiō orbēs circum Tellūrem lustrāns quam Sīnēnsēs mēnse Aprīlī coepērunt aedificāre et proximō annō perficient.  Ibi taeconautae, ut vocitantur Sīnēnsēs quī caelum incolunt, sex mēnsēs manēbunt.

Diē autem Lūnae negāvērunt Sīnēnsēs sē missile hypersonicum, quāle potest quinquiēns celerius quam sonus ipse volāre, circum Tellūrem mīsisse.  Secundum rumōrem, quem Sīnēnsēs dīcunt falsum esse, id missile rursus ad terram post iter longum et celere dēscendit ferē ibi, ubī dēstinatum erat; itaque armīs atomicīs onerātum potuit urbem ex inopīnātō et dē imprōvīsō excīdere.  Sīnēnsēs vērō referunt sē experīmentum fēcisse nōn missilis armātī sed vehiculī caelestis, quod potest identidem itinera facere in caelum.

Alitalia dēcoxit

Alitalia, Ītalōrum societas āeronautica, dēcoxit.  Intrā vīgintī annōs illa societas, quae malam fāmam propter tarditātem et inurbānitātem meruit, vīciēns mīliēns centēna mīlia nummōrum Eurōpaeōrum ā rēpūblicā accēperat, quārē Ūniō Eurōpaea coeperat querī iniustum esse aliīs societātibus certāre cum Alitaliā, ut quae pūblicīs impēnsīs stabilīrētur.  Ē dēcoctā societāte nova formātur, cui nōmen Ītaliae Tr

Dēclārātiō Kunmingēnsis

In Kunming urbe Sīnēnsī necnōn etiam per ordinātra, lēgātī centum gentium cōnsēnsērunt tam ea, quae ē terrā gignuntur, quam animālia quae aut in terrā ambulant aut per caelum volitant aut magnō in marī natant, esse cōnservanda.  Nullam tamen mēnsūram seu rātiōnem cōnservātiōnis statuērunt nec mētas ad quās magistrātus senātōrēsque spectārent, ut scīrent sē rectum cursum ad dīversitātem omnium viventium cōnservandam tenēre.

Kurz abdīcat

Sebastiānus Kurz, cancellārius Austriae, diurnāriōrum corruptōrum accūsātus, diē Saturnī coactus est summō magistrātū sē abdīcāre.  In ēius locum successit Alexander Schallenberg, ēiusdem factiōnis Populāris, quae ūnā cum Viridibus pergit in cūriā Austriacōrum pollēre.  Kurz vērō in senātū manēbit et perget conciliō principālī interesse.  Custōdēs pūblicī suspicantur ēius iussū ac nutū pecūniam pūblicam diurnāriīs tribūtam esse ut opiniō ēius factiōnis bona in actīs diurnīs divulgārētur.

Lībanus 

Per tōtum Lībanum vīs ēlectrica omnīnō dēfēcit diē Sōlis.  Multās iam hebdomadēs vīs ēlectrica paucīs tantum hōrīs singulīs diēbus suppeditātur, sed auctum pretium petroleī et dēminūta potestas nummōrum, quōs regimen parum stabile circumfert, facultātem fōmentī emendī tandem superāvērunt.  Hieme appropinquante rogātur an Lībanus sit antesignānus vīrium per tōtum orbem terrārum dēficientium, cum Eurōpaeī et Sīnēnsēs, vel etiam Americānī quī abhinc annum potuērunt iactāre sē mercātū absolūtōs posse vim ēlectricam et petrōleum sibi suppeditāre, nunc pretia fōmentī videant aucta.

Tsai Ing-wen lībertātem dēfendit

Tsai Ing-wen, praeses Reīpūblicae Sinēnsis in Formōsā īnsulā sitae, negāvit sē suamque patriam umquam cessūram Sinēnsibus communistīs prementibus, neque esse quī posset cōgere Formōsēnsēs viam sequī illam quam Xi Jinping dux Sinēnsium communistārum nuper in ōrātiōnibus exposuisset.  Nam Sinēnsēs terrae continentis falsē dictitant Formōsam īnsulam esse prōvinciam suam nec līberam rempūblicam.  Mīlitēs porrō Americānī electī et classicī iam annum Formōsae versantur ubi mīlitēs Formōsēnsēs novissimīs armīs et modīs bellandī exerceant: itaque, sī Sinēnsēs conātī sint īnsulam vī capere, in perīculum veniant mīlitēs Americānī.

Senātor Britannus interemptus

Dāvīd Amess, quī ex annō millēsimō nōningentēsimō octōgēsimō tertiō senātor fuit factiōnis dextrae in Commūnium camerā Britannōrum, est in ecclēsiā, ubi cum cīvibus congrediēbātur, cultrō percussus.  Vixit annōs ūndēseptuāginta.

Baetylus in domum dēlapsus

In Columbiā Britannicā baetylus seu saxum āerium caelitus dēlapsum est nōn solum in aedēs sed etiam in lectum fēminae dormientis, quae fragōre experrecta invēnit saxum prope caput inter cervīcālia iacēns.  Doctī virī Ūniversitātis Calgariēnsis quī tālia phaenomena pervestigant referunt duōs baetylōs eā nocte dēcidisse in parvō oppidō Aureō, quod dīcitur, montibus circumdatō, quod tria mīlia hominum incolunt.

Fīnēs aperientur

Post ūndēvīgintī mēnsēs, quōs clausī sunt fīnēs inter Americam et Canadam et Mexicum, regimen Americānum nūntiāvīt fīnēs mox apertum īrī etiam illīs, quī voluptātis causā peregrīnārī vellent.  Quod maximī momentī mercātōribus Bellinghamēnsibus habētur, ut quī Canadēnsibus exclūsīs magnum lucrum perdiderint.

Hodiē est octāvus diēs mēnsis Octōbris.

Novus annus scholasticus incipit

Post longum annum solitūdinis, quō scholae non faciē ad faciem, sed per ordinātrī speculum atque, ut ita dicāmus, in aenigmate, docēbantur, tandem aliquando studiōrum Ūniversitas est redintegrāta et pleraeque scholae autumnālēs vīvā vōce et coram habentur.  Mēnsa Latīna celebrābitur diēbus Iōvis.

Cilauēa mōns pergit ignem ēvomere

Secundā nunc hebdomade pergunt saxa liquefacta ē rīmīs in monte Cilauēā hiantibus ēvomī.  Nam montis crātēra, quae Hālēmāūmāū vocitātur, ignem et sulfurātum fūmum in caelum mittit.  Īdem mōns, ubi Domina Pēlē nūmen ignipotēns habitāre dīcitur, etiam annō bis millēsimō duodēvīcēsimō et bis millēsimō vīcēsimō flammās et fūmum vomuit.

Petrōleum in lītora Californiāna appulsum

Multa lītora in Californiae parte merīdiōnālī natantibus apricantibusque clauduntur propter magnam vim petrōleī, quae coepit in lītora appellī.  Ad mille culeōrum petrōleī in mare Pacificum effūsum esse putātur prope Lītus Huntingtōniānum.

Formōsēnsēs spē confirmātī

Formōsēnsēs dē Americānōrum ministeriō rēbus exterīs praepositō spem habent confirmātum, postquam Jōsēphus Biden, praeses Americānus, ambiguīs verbīs dīxit Xī Jinping, principem Sīnēnsium, consēnsisse pacta dē Formōsā īnsulā observāre.  Nam nihil inter Sīnās et Americam pūblicē quidem pactum est dē Formōsā, quam Sīnēnsēs falsē sibi vindicant, cum rē vērā suī jūris sit īnsula ac lībera.  Incertum igitur manet, quid in animō habuerit Biden, sed Antōnius Blinken, ab exterīs negotiīs minister, dīxit Americānōs sine dubiō lībertātem Formōsae dēfēnsūrōs.

Comitia Iāpōnica

Fūmiō Kīshida, quī in locum Iōshīhīdae Sūgae modo successit et diē Lūnae summus factus est Iāpōnum magistrātus, statim rogāvit ut mēnse exeunte nova comitia indīcerentur, ut ipse approbātiōnem nōn solum senātōrum sed etiam populī quaereret.  Prōmittit porrō Kīshida sē multum actūrum, ut lues corōnāria reprimātur et discrīmen inter pauperēs et dīvitēs dēminuātur.

Comitia Canadēnsia

Suffrāgiīs in Canadā lātīs, Iustīnus Trudeau, quī comitia indīxerat ut auctōritātem suam rōborāret, nōn omnīnō dēvictus est, sed ad summum magistrātum redditus est etiam dēbilior.  Nam factiō ēius Līberālis, quae dīcitur, ūnum senātōrem dē cūriā Canadēnsium perdidit, nec poterit in cūriā sine assēnsū atque approbātiōne aliārum factiōnum suam voluntātem explēre.  Ex alterā parte factiō Conservātīva, cūius numerus senātōrum neque auctus neque dēminutus est, ad favōrem populī quaerendum sua cōnsilia nōn solum novāvit sed etiam fere ad opiniōnēs Līberālium accommodāvit.

Comitia Germānica

Ætas Merkeliāna ad fīnem perdūcitur.  Nam cīvēs Germānī, cum Merkel cancellāria recūsāvisset nē summum magistrātum dēnuō sibi ambīret, in comitiīs palmam victōriae, quam sēdecim annōs Merkeliānae factiōnī Christiānae ac Populārī dictae tradiderant, factionī potius Sociālistārum dedērunt.  Cuius dux, Olaus Scholz, quem nōnnullī diurnāriī nuncupant “Strumphum surrīdentem” vel etiam “virum tōtīus Germāniae taediōsissimum,” maria montēsque nōn pollicitus est sed officiōsus et dīligēns habētur.  Ille nunc cōnātur cum aliīs factiōnibus, ut sunt Viridēs et factiō Līberālis Populārisque, paciscī ut magistrātūs inter factiōnēs partiantur.

Nova taberna Turcica Bellinghamiae aperta

Novissima taberna Bellinghamiae iānuās suās nūperrimē aperuit: Ashūrī, quem titulum fert taberna, caffeam Turcicam et dulcia varia offert vēnālia, ut μπακλαβάς.  

Iōnathas Pollard trānsfuga

Iōnathas Pollard, speculātor quī annō millēsimō nōningentēsimō octōgēsimō sextō cōnfessus est sē Americam prōdidisse et secrēta sibi reīpūblicae fidē mandāta, inter quae fontēs et methodī speculandī erant, Isrāēlītīs et aliīs trādidisse, modo in Isrāēl trānsfūgit.  Nōn enim vinculīs continēbātur, cum post trīgintā annōs, quibus Pollard bonōs mōrēs in carcere dēmonstrāret, lībertātem cum condiciōnibus nactus esset.  Illae condiciōnēs exīvērunt; itque speculātōr ē fīnibus exīvit.  In Isrāēl benignē exceptus est ā Beniamin Netanyahū summō magistrātū, coram diurnāriīs.

Britannia dē Ūniōne Eurōpaeā dēscīvit

Annō bis millēsimō vīcēsimō exeunte etiam dē Ūniōne Eurōpaeā dēscīvit Britannia, quae kalendīs Iānuāriīs suī iūris erat atque Ūniōne absolūta.  Paucī autem campānās Magnī Ben hōrologiī nōtissimī audīvērunt, quibus dīvortium illud Londīniī nūntiābātur, cum in Britanniā, ubi magistrātūs propter vīrus corōnātum multa et sevēra ēdīxerint, nunc prohibeātur nē hominēs congregentur.  

Boris Johnson ideō ēlectus erat summus magistrātus Brtiannōrum, ut populī voluntātem annō bis millēsimō sextō decimō suffrāgiīs dēmonstrātam exsequerētur et discidium efficeret, quod Terēsiam Māiam pristinam ministram prīmāriam ēlūsisset.  Quī autem commūnem opiniōnem metiuntur, ipsī monent, sī comitia crās habērentur, Boridem Johnson sēdem suam in cūriā perditūrum fuisse, neque ullam factiōnem mājorem partem suffrāgiōrum lātūram fuisse.  Stanlēius porro Johnson, Boridis pater, quī ōlim senātor fuit Eurōpaeus, nūntiāvit sē cīvitātem petitūrum Gallicam. 

Nīcola Sturgeon, prīmāria ministra Calēdoniōrum, prō suā parte prōmīsit suōs dēnuō in Ūniōnem Eurōpaeam regressūrōs.

Assange in Britanniā retentus

Iūdex Britanna censuit Iūliānum Assange nōn in diciōnem Americānōrum trādendum.  Assange, cīvis Austrāliānus, annō bis millēsimō decimō Americānōrum secrēta mīlitāria dīvulgāvit; ab Americānīs et Suētīs propter dīversa crīmina petītus ex annō bis millēsimō duodecimō usque in annum bis millēsimum ūndēvīcēsimum latuit in sede lēgātī Reīpūblicae Aequātōriae, unde tandem aliquando ējectus in vinculīs ā Britannīs tenētur.  Statim post iūdicis sententiam relātam, Andreas Manuēl Lopēsius Operātor, praeses Mexicānōrum, iūs asȳlī Iūliānō Assange obtulit.

Iemenīa

Diē Mercūriī, dum novī magistrātūs ex Arabiā Saudiānā profectī Adēnum ad āeroportum adveniunt, subitō nōnnulla missilia, ut putātur, in āeroportum incidērunt.  Mīlitēs porro āeroplānum automatum et māteriā displōsīvā onerātum intercēpērunt, quod in praesidis palātium cursum tendēbat.  Saudiānī suspicantur seditiōsōs, quī Houthiānī appellantur atque ā Persīs sustentantur, conātōs esse dē novō regimine Iemenītārum strāgem facere.  Vīgintī et duo hominēs sunt occīsī. 

Bellinghamia birotīs commodissima

Bellinghamia ūnā cum Seattlō existimātur urbs birotāriīs commodissima in Vasintōniā cīvitāte, quae ipsa omnium cīvitātum est commodissima, secundum societātem Americānōrum birotāriōrum.  Vīgintī jam annōs Bellinghamēnsēs sēmitās birotīs dīcātās mūnīvērunt et urbem sīc cōnformāvērunt ut tūtum et commodum esset birotīs quōcumque vehī.

Vastātiō Nasburgēnsis

Diē nātālī Christī, Nasburgī in Tennēsiā cīvitāte domuncula autocīnētica reperta est unde vox ēlectronicē ēmissa monēbāt ut omnēs aufugerent; deinde post quartam hōrae partem raeda sē dīrūpit et partem mediae urbis vastāvit.  Vehiculum statūtum erat iuxtā aedificium ubi societas tēlephōnica ordinatra et systēmata ēlectronica condidit; impetū factō nōnnullīs cīvitātibus sublāta est facultas tēlephōnica.  Auctor illīus sceleris putātur fuisse Antōnius Warner, senex Nasburgēnsis rērum ēlectronicārum perītus, quī etiam fertur in illā domunculā autocīnēticā dīruptā periisse.

Mons Cilavēa ignem eructat

Terrā mōtā, Cilavēa, quī mōns in magnā īnsulā Hāvāiānā sītus fertur domus esse Pēlēs deae montibus ignivomīs praepositae, flāmmās, vapōrem, fūmum septem diēs eructat.  Lacus saxōrum liquefactōrum in crātēre crēscit, et sulphur ardēnsque massa trīginta pedēs in caelum ēffunduntur.  Magistrātūs monent nē quis montī appropinquet.

Zoom societas cēnsōria

Pūblicī accūsātōrēs Americānī dīcunt Zoom societātem, quae per rete ūniversāle facultātem colloquendī venditat, dēnuō cum Sīnēnsibus cōnspīrāre.  Nam Xinjiang Jin, mercēde ab illā societāte conductus, colloquia prīvāta spectābat, ut hominēs deprehenderet extrā Sīnās sītōs et dē rēbus politicīs et religiōne contrā Sīnēnsium tyrannidis voluntātem colloquentēs, quōrum nōmina dētulit Sīnēnsibus.  Jin etiam colloquia Americānōrum cīvium Sīnicae tyrannidī oppositōrum mōre censōriō cohibuit.  Magistrātūs Americānī anteā suspectam habēbant Zoom, propter inopiam secūritātis necnōn vim auctōritātis Sīnēnsium, quae tanta est ut Anna Pelōsī, princeps inferiōris senātūs camerae,  dīxerit Zoom esse societātem Sīnicam.

Trāmen prope Bellinghamiam exorbitat

Prope Bellinghamiam, ad pāgum Custer dictum, trāmen ferriviārium petroleō onerātum exorbitāvit atque exarsit.  Flammae restinctae dēnuō excanduērunt, quae aliquot diēs probibuērunt nē alia trāmina orbitīs ūterentur.  Incertum est, utrum id cāsū an consultō factum sit.  Nam mēnse Novembrī duae fēminae Bellinghamēnsēs, Samantha Brooks et Ellen Reiche, reae factae sunt terrōris prōmōvendae, cum dēprehēnsae essent ad orbitās ferriviāriās, quas ideō turbābant ut trāmina exorbitārent, sed cautiōne pecūniāriā oblātā illae sunt inter mōrās iūdiciī vinculīs līberae.

Reginaldus Foster diem obiit

Diē Christī natālīciō, Pater Reginaldus Foster Milvauciēnsis, inter optimōs Latīnistās numerātus, dē vītā dēcessit.  Rōmae, ubi in cīvitāte Vāticānā verba Pontificis Maximī in sermōnem Latīnum ferē quādrāgintā annōs interpretātus est, etiam multōs annōs scholās aestīvās docuit grātuītō.  Quibus in scholīs Foster fertur permultōs discipulōs nōn sōlum litterīs sed etiam studiō litterārum imbuisse.  Librum ēdidit, Ossa Latīnitātis Sōla īnscrīptum, et cum aliīs Lexicon Recentis Latīnitātis dīvulgāvit.  Vixit annos ūnum et octōginta.  

Hodiē est septimus diēs mēnsis Decembris, dies nigrō lapillō numerandus, cum hōc diē abhinc annōs ūndeoctōginta imperium Iāpōnicum ex inopīnātō impetum in Portum Margarītārum fēcerit.

Ūnae Sīnae, ūnum systēma

Hongcongiae, omnēs senātōrēs factiōnis populāris, quae Sīnēnsium tyrannidī opposita erat, sē honōribus omnibus abdīcāvērunt, cum Sīnēnsēs novam lēgem in Hongcongiam imposuissent quā Sīnēnsibus licēret senātōrēs sibi oppositōs comprehendere atque in iūs trahere.  Itaque periit illa ratiō vivendī, quā Hongcongia tam sub diciōne Sīnēnsium quam suī iūris erat, et quā sub Sīnēnsium nōmine ūnō duo systēmata seu rēs pūblicae flōruerant. Porro Iosua Wong et Agnes Chow et aliī iuvenēs, quippe quī in tyrannidem prō populārī auctōritāte prōmōvendā reclāmāvissent, sunt reī et damnātī; aliquot mensēs vinculīs continēbuntur.

Cūria Guatemālēnsium incēnsa

In Guatemālā reclāmātōrēs, propter cōnsilia austeritātis imponendae īrātī, cūriam senātūs incendērunt.  Reclāmātōrēs dīcunt sē timēre nē pecūnia pūblica aedificandō potius quam cīvium salūtī inter pestilentiam tuendae tribuātur.  Alexander Ioannes-Matthaeus Falla, summus magistrātus Guatemālēnsium, dīxit cūriam esse incēnsam terrōris populō incutiendī causā.

Reclāmātur in Galliā

Mīlia Gallōrum reclāmant in novam lēgem, quā prohibērī potest nē imaginēs custōdum pūblicōrum divulgentur.  Timent reclāmātōrēs nē, lēge ratā, pūblicī custōdēs immūnitāte concessā effrēnātī in cīvēs saeviant.  Quod oleum camīnō addit, Michāēl Zechler, mūsicus, ā custōdibus pūblicīs est saevē verberātus.

Bellum in Aethiopiā

Bellum cīvīle gestum est in Aethiopiā, cūius summus magistrātus, Abiy Ahmed, erat Nobeliānō praemiō pacis priōre annō honestātus.  Mīlitēs illīus Ahmed Mecellam urbem Tigrāiēnsium post brevia proelia cēpērunt, sed diurnariīs exclūsīs incertum manet an Tigrāiēnsēs, quī septentriōnālem partem Aethiopiae incolunt, pergant mīlitibus resistere.  Tigrāiēnsium Factiō Populō Līberandō, quōrum dux Debretsion Gebremichāēl in montibus latitat, ferē trīginta annōs ante Ahmed ēlectum Aethiopiam rexit.  

Stanislāus Tekiēlī diem obiit

Stanislāus Tekiēlī, diurnārius Polōnicus et fautor sermōnis Latīnī, diem obiit.  In Sīnīs atque in Iugoslaviā inter bella cīvīlia acta rettulit, necnon etiam nuntiōs Latīnōs Ephēmeridem dictōs aliquot annōs ēdidit.  Tekiēlī porro dē ēlegantiā sermōnis Latīnī duōs conscripsit librōs, quī Burdubasta et Burdubasta bis inscrībuntur.  Sub nōmine Iconoclastis quoque sententiās suās per rete ūniversāle ēdidit.  Vixit annōs quinque et quinquāginta.

Terror Bellinghamiae

Bellinghamiae duae fēminae sunt ā custōdibus pūblicīs comprehēnsae et reae factae sunt terrōris prōmōvendī.  Nam Samantha Brooks et Ellen Reiche dēprehēnsae sunt ad orbitās ferriviāriās, ubi occultē systēmata ēlectronica, quibus trāmina ferriviāria dē perīculō monentur, sic turbāvērunt, ut trāmen sufflāminibus automaticīs subitō tardārētur et paene exorbitāret.  Reiche baccalaureātūs gradum adepta erat in nostrā studiōrum ūniversitāte, ubi sermōnī studuerat Theodiscō.

Suffrāgia feruntur,

Terror Vindobōnēnsis,

Clandestīnum proelium in Nigeriā gestum.

Nova iudex;

Terror in Galliā;

Turcia et Graecia mōtae;

Sūdānia pācem prōmōvet;

Scholae interdictae.

Praeses Chirgisiae mūnere sē abdicat;

Salvātor Centumfocēnsis Cepēda comprehēnsus;

Britannia dē Ūniōne Eurōpaeā dēscīscere pergit;

Susanna Marin seclūsa.

Praeses Americānus novō morbō corōnātō affectus;

Armeniī et Atropatēnī bellum gerunt;

Shinzō Ābē sē magistrātū abdicat;

Gallī animālia tuentur.