Die Amerikaanse minister van Buitelandse Sake, Marco Rubio, sê die aanvanklike VSA-Israelse offensief teen Iran, "Operation Epic Fury", is verby nadat die doelwitte bereik is. Die operasie het op 28 Februarie begin toe die VSA en Israel 'n vlaag lugaanvalle teen Iran van stapel gestuur het. Teheran het gereageer deur die Straat van Hormuz te blokkeer, waardeur 20-persent van die wêreld se olie en vloeibare aardgas gewoonlik beweeg. Rubio sê die aanvalle op Iran het groot skade aangerig aan hul ekonomie en verdedigingsvermoë:

Sentrale gedeeltes in die Ohangwena-streek is tans sonder water na ‘n massiewe pypbreuk en tegniese spanne werk sedert Dinsdag om die kwessie uit te sorteer. Kosmos 94.1 Nuus het met die woordvoerder van Namwater, Lot Ndamanomhata gepraat wat meer inligting oor die onderbreking het.

Solidariteit se Helpende Hand sê studente dra die swaarste las van die Nasionale Studente Finansiële Hulpskema se voortdurende krisis, nadat dit onder administrasie geplaas is. Die organisasie voer aan die probleme by die skema strek verder as net befondsingstekorte en dui op dieper bestuursmislukkings en swak finansiële beheermaatreëls. Hannes Noëth van Solidariteit sê operasionele ineenstortings laat studente met agterstallige betalings, verblyfsuitdagings en onsekerheid oor hul studies:

Arsenal is die eerste keer sedert 2006 in die Kampioeneliga-eindstryd nadat hulle Atletico Madrid in totaal met 2-1 verslaan het. Ná die eerste deel was hulle gelykop met een elk, maar Bukayo Saka se doel in die 44ste minuut van die tweede deel het die Gunners se oorwinning besorg. Arsenal kom op 30 Mei in Boedapest óf teen Bayern Munich óf Paris Saint-Germain te staan. Arsenal-bestuurder, Mikel Arteta, sê hulle het ʼn ongelooflike prestasie behaal:

Die Namibiese Akkerbouraad het die aansoekdatum vir sy vrugtesubsidieskema tot 31 Mei verleng vir die huidige boekjaar. Die skema, wat daarop gemik is om plaaslike vrugteproduksie te bevorder, bied 'n subsidie van 30 persent op gesertifiseerde saailinge, kunsmis en landbouchemikalieë tot die eerste oes. Emilie Abraham, die raad se hoof van Tuinbou-ontwikkeling, sê aansoekers moet bewys van befondsing vir hul deel by die aansoek indien.

Die minister van Internasionale Betrekkinge en Samewerking, Ronald Lamola, sê Suid-Afrika soek 'n meer gekoördineerde benadering tot migrasiebestuur regoor Afrika. Die afgelope tyd se teen-immigrante-betogings in die land het kommer oor hernude xenofobiese geweld laat opvlam. Nigerië, Ghana en Mosambiek het amptelik by die regering gekla oor die behandeling van hul burgers in die land. Lamola sê Suid-Afrika versterk sy immigrasiebeleid om nakoming van die land se immigrasiewette te verseker:

Die vyfmalige kampioene, Chennai Super Kings, het die Delhi Capitals met agt paaltjies afgeransel en hul hoop om die Indiese Premierliga-uitspeelronde te haal, lewend gehou. Tristan Stubbs en Sameer Rizvi het ʼn vennootskap van 65-lopies op die sesde paaltjie behaal om die Capitals se telling van 155 vir sewe te verseker. Daarna het Sanju Samson ʼn onoorwonne 87 van 52 balle behaal en die Super Kings het die teiken maklik bereik met 15 balle oor. Samson sê hy wou eintlik 100 haal:

Terwyl brandstofpryse in naburige Suid-Afrika en Namibië aanhou styg, waarsku kenners dat selfs 'n kleiner verhoging boere kan tref waar dit die seerste maak. Paul Makube, 'n senior landbou-ekonoom by FNB Suid-Afrika, sê die buurland se boere wat reeds sukkel met lae mieliepryse en dun marges, het min ruimte om die ekstra koste te absorbeer. Hy sê boere is "prysnemers" en hul vermoë om die bykomende koste maklik te verhaal, is bestaan byna nie.

Krieket Namibië het aangekondig dat die derde uitgawe van die Nashua Junior Franchise-kompetisie terugkeer, versterk deur 'n beduidende vlaag korporatiewe borgskappe. Die toernooi sal oor drie agtereenvolgende naweke plaasvind, van 8 tot 23 Mei. Die toernooi is geskep om die land se top jong talent te identifiseer, te ontwikkel en te vertoon. Grove Mall, STADIO Higher Education en Ashburton Investments is ook spaneienaars, elk met twee spanne in die o.14- en o.19-ouderdomsgroepe. Kosmos 94.1 Nuus het met die bemarkingsbestuurder van Krieket Namibië, Natalia Nauyoma gepraat.

Die bekende teenstroper- en hondespesialis Nick Duranty van Suid-Afrika woon tans die Intelligence Support against Poaching, of ISAP, se Junior Ranger-kursus by. Hy is ‘n kenner op die gebied van renosters, onder meer in die Krugerwildtuin. Anders as wat voorgegee word, is die renosterbevolking in dié park nie veilig teen die aanslag van stropers nie, het Duranty aan Kosmos 94.1 Nuus gesê: