Nuus

Namibië se afvaardiging van 12 atlete na die Dakar-jeug Olimpiese Spele wil die grondslag lê vir die land se volgende geslag internasionale kampioene. Anri Parker, ’n uitvoerende lid van die Namibiese Nasionale Olimpiese Komitee, sê die jong atlete ontvang omvattende opleiding ter voorbereiding vir Afrika se eerste Olimpiese Spele van enige aard. Sy het met Kosmos 94.1 Nuus gepraat:

Inwoners van Okahandja beplan om dié naweek aan ’n gemeenskapsoptog deel te neem onder die vaandel van “Genoeg is Genoeg”. Hulle eis dat die volle munisipale raad teenwoordig moet wees om kwessies oor swak dienslewering, behuising en grondtoekennings aan te spreek. Die minister van stedelike en landelike ontwikkeling, James Sankwasa, is ook genooi om die petisie tydens die vreedsame betoging te ontvang. Gemeenskapsaktivis Sethy Gariseb het met Kosmos 94.1 Nuus gepraat:

Namibiërs wat swoeg en kla onder die huidige hittegolf, kan vanaf Sondag verligting verwag, wanneer koeler temperature na verwagting die Khomas-streek sal bereik. Die res van die binneland kan teen Maandag afkoeling ervaar. Die hitte sal egter deur die naweek voortduur, en die weerdiens doen ’n beroep op die publiek om genoeg water te drink en blootstelling aan die son gedurende die warmste deel van die dag te beperk. Albertina Anderson van die weerdiens het met Kosmos 94.1 Nuus gepraat.

President Netumbo Nandi-Ndaitwah doen ’n beroep op Namibië se sakegemeenskap om hul produkte beter te bemark en meer mededingend te maak. Tydens haar toespraak vanoggend by die tiende Swakopmund International Trade Expo het sy die belangrikheid van doeltreffende produkbemarking vir besigheidsgroei beklemtoon.

Gewone Namibiërs moet nie belastingverligting of verhoogde staatsondersteuning in die komende begroting verwag nie, aangesien dalende inkomste en hoë staatskuld die regering in ’n streng besparing-siklus vasgevang hou. Cirrus Capital-ontleder Romé Mostert het aan Kosmos 94.1 Nuus gesê enige finansiële verligting kan die begrotingstekort verder vergroot. Sy sê Namibië se ekonomiese herstel sal in die komende jare grootliks afhang van hulpbronontginning en volhoubare ekonomiese groei.

Politieke ontleder Christo van der Rheede sê Suid-Afrika het sy afhanklikheid van die Amerikaanse mark ingevolge Agoa aansienlik verminder deur landbou-uitvoere na Europa, die Midde-Ooste, die Verre Ooste en die res van Afrika te diversifiseer. Hy erken egter dat ’n moontlike opskorting van Agoa groot uitdagings vir die motorbedryf en sy uitgebreide vervaardigings- en voorsieningsketting sal inhou. Van der Rheede sê diplomatieke pogings word aangewend om handelsbetrekkinge te versterk en groeiende Amerikaanse beleggings te behou. Hy het met Kosmos 94.1 Nuus gepraat.

Josef Kauandenge, president van die Vereniging van Plaaslike Belangegroepe, Asoli, doen ’n beroep op ’n breë koalisie van opposisiepartye voor die algemene verkiesing van 2029, met die doel om die regerende party se oorheersing te verbreek. Kauandenge waarsku dat voortdurende opposisie-fragmentasie slegs die status quo versterk. Hy moedig opposisieleiers aan om saam te staan vir die algemene belang, eerder as om individuele ambisies na te streef. Hy het met Kosmos 94.1 Nuus gepraat:

Die minister van finansies, Ericah Shafudah, sê die Nasionale Jeugontwikkelingsfonds het 373 jeugprojekte in al 14 streke goedgekeur. Sy het dit Donderdag in die Nasionale Vergadering gesê tydens die indiening van die hersiene mediumtermynbegroting. Shafudah sê teen 25 September is 110,2-miljoen Namibiese dollar aan begunstigdes uitbetaal. Die projekte sal na verwagting sowat 7 110 werksgeleenthede skep.

Die goewerneur van die //Kharas-streek, Dawid Gertze, sê dringende optrede en samewerking is nodig om die impak van bek-en-klouseer op boere en die streeksekonomie te beperk. Hy het dit gesê tydens ’n vergadering met boere en belanghebbendes in Keetmanshoop, waar voorgestelde beheermaatreëls, inenting, beperkings op die beweging van vee en die herstel van marktoegang bespreek is. Gertze sê die doel is om boere te help om hul voete weer te vind en die veesektor te herstel.

Twee dae van opwindende motorsport wag op inwoners van Windhoek wanneer die 2026 Monster Energy High Octane Festival en Drifting Mania vanmiddag om vieruur sy hekke by die Tony Rust-renbaan buite Windhoek vir die publiek open. Vier motorsportkategorieë — drifting, drag racing, spinning en gymkhana — sal deur Big Boy Racing aangebied word. Saterdag open die hekke reeds om twaalfuur, met nog aksie wat op motorsportliefhebbers wag. Kosmos 94.1 se Francois Lottering het meer: