Limpopo se departement van vervoer en gemeenskapsveiligheid vra dat alle skoolvervoeroperateurs leerderveiligheid eerste stel en hul bedrywighede reguleer. Die woordvoerder Matome Moremi Taueatsoala sê meer as 50 voertuie is Vrydag tydens veiliger leerdervervoeroperasies in Lebowakgomo en Mankweng geskut weens nie-nakoming. Hy sê die departement sal voortgaan om bewustheid te verhoog en die nakoming van leerdervervoer- en verkeersregulasies te verseker om leerders se lewens te beskerm:

Die minister van handel, nywerheid en mededinging, Parks Tau, het die aankondiging van die belegging deur Chery Suid-Afrika in die motorsektor verwelkom. Die belegging volg op 'n ooreenkoms tussen Chery SA en Nissan Suid-Afrika om al die bates van Nissan se Pretoria-aanleg oor te neem. Die minister se woordvoerder, Kaamil Alli, sê die departement gaan voort met sy betrokkenheid by die bedryf om die motorbeleid en ondersteuningsmaatreëls te hersien:

Die departement van water en sanitasie waarsku die publiek dat die wal van die Senteeko-dam, in die Kaaprivier-opvangsgebied in Mpumalanga, die risiko loop om te breek. 'n Woordvoerder, Wisane Mavasa, sê daar is deur 'n noodveiligheidsevaluering vasgestel dat die dam se oorloopstruktuur ernstig en onomkeerbaar agteruit gegaan het. Dit sluit in gevorderde erosie en insnyding met gevolglike strukturele onbestendigheid. Sy sê die damwal kan sonder verdere waarskuwing ineenstort:

Die Energiereguleerder, Nersa, sê sy tribunaalmagte is nou in werking en hy gaan nie enige wanbetalers in die elektrisiteitsektor duld nie. Vyf munisipaliteite, insluitend Saldanhabaai in die Wes-Kaap, Ekurhuleni in Gauteng en Rustenburg in Noordwes, het wanbetalingsbevele ontvang en moet binne twee maande voldoen, of boetes van tot twee-miljoen-rand per dag opgelê word. Nersa-woordvoerder Charles Hlebela sê hierdie stap verseker veilige, betroubare en wettige elektrisiteitsvoorsiening:

Sakeliga gaan regstappe doen om boere en die privaatsektor in staat te stel om onafhanklik te reageer op die voortgesette bek-en-klouseer-uitbreking. Die sake-organisasie voer aan dat regeringsbeperkings op entstowwe en beheermaatreëls doeltreffende optrede belemmer en die uitbreking vererger. Sakeliga se uitvoerende hoof, Piet le Roux, sê bedryfsgeleide pogings is nodig om die siekte vinnig en doeltreffend te beheer:

Die Copps 94.1-span, in samewerking met die Namibiese polisie, het ‘n betreklike stil Vrydagaand in die hoofstad beleef. ‘n Buitelander met ‘n motor sonder remme in Katutura was een van die voorvalle wat hul aandag geverg het. Francois Lottering van Kosmos 94.1 was op sy pos en doen verslag van die toneel:

Kry die nuus soos dit breek.

Goewerneurs van die Ohangwena-, Omusati-, Oshana- en Kunene-streke is tans op 'n weeklange werksbesoek aan Angola se Cunene- en Huila-provinsies. Ohangwena-goewerneur Kadiva Hamutumwa sê die besoek sal dien as 'n bloudruk vir vennootskappe wat daarop gemik is om tasbare ontwikkeling te lewer, insluitend voedselsekerheid, verbeterde produksie en werksgeleenthede in Namibië se landbousektor.

Die DA sê president Cyril Ramaphosa se erkenning dat die proses vir die Will for Peace-vlootoefening gebrekkig was, maak dit 'n mislukking in die bevelsketting, nie bloot 'n bedryfskwessie nie. Die minister van Verdediging, Angie Motshekga, het 'n ondersoek gelas om te bepaal waarom sy opdrag vir Iran se onttrekking ignoreer is. DA-woordvoerder Chris Hattingh sê Ramaphosa moet beslissend teen Motshekga optree en sy plan van aksie verduidelik:

Die 10de been van die Ubuntu-motorfietsbyeenkoms vind Sondag op Karibib plaas, met verskillende klubs en hulle ondersteuners wat byeenkom vir die plaaslike been van ‘n internasionale byeenkoms. Francois Lottering van Motor Media Namibia het al die besonderhede.