Nuuspod

Dis nog nie Eureka! vir BCG-inentings in die stryd teen Covid 19 nie. Dit is die strekking van dr Jantjie Taljaard se antwoord op Nuuspod se vraag of BCG-inentings, wat sedert 1940 in Suid-Afrika toegedien word, die land se redding is. Die opwinding oor BCG-inentings kom nadat dr Gonzalu Otazu van die New York Institute of Technology aan Alec Hogg van Biznews gesê het lande waar BCG toegedien is het 'n laer sterfte- en infeksiesyfer. Intussen het dit aan die lig gekom dat die land se apteke 'n akute tekort aan hidroksiechlorokien en chlorokien het, omdat hospitale dit in grootmaat aankoop in die stryd teen Covid 19. Daar word geglo dié malariamedisyne help minstens om simptome te verlig en gouer genesing te bring.  Dr Taljaard, 'n spesialis in aansteeklike siektes by Tygerberg hospitaal, het egter aan Nuuspod gesê daar is nog geen bewyse dat die middels effektief is nie. 

Besoek Rita se Vetties in Krugersdorp wanneer alles weer terug na normaal is na die staat van inperking. 

Byna twee weke se gedwonge saamwees is besig om die harmonie in talle huwelike en verhoudings te bedreig. Die verhoudingsterapeut en seksuoloog, dr Elmari Mulder Craig, sê mense het selfs in 'n verhouding hul vryheid nodig. Nuuspod het met haar gesels om te hoor hoe mense hul verhoudings in die tyd kan beskerm. Sy gee ook raad oor wat om te doen as die groot baklei reeds gebeur en skade aangerig het. 

Vir die wat wonder hoe die coronavirus klink: Wetenskaplikes aan die Massachussets Institute of Technology het die virus se struktuur in musiek getransponeer. Die wysie is deur kunsmatige intelligensie geskep en die universiteit sê dit kan navorsers help om fyner besonderhede van die virus te ontdek wat dalk voorheen misgekyk is. Professor Markus Buehler sê hy en sy span het dit reeds ingespan om sekere vibrasiepatrone vas te stel. Dit help om medikasie teen die virus te ontwerp. Luister hier na die "komposisie". Bron: BBC

Die Covid19-pandemie gaan nie net ekonomiese gevolge hê nie, dit gaan wêreldpolitiek ook onherroeplik verander. Hoewel dit nog te vroeg is om te sê presies hoe, is daar basiese politieke beginsels wat dalk in die slag kan bly, sê die politieke ontleder Roland Henwood van die Universiteit van Pretoria.