Fimmtudagar í september eru leikhús- og sviðslistadagar. Í síðustu viku kom Þjóðleikhússtjóri og í dag var hjá okkur Friðrik Friðriksson, framkvæmdastjóri Tjarnarbíós. Tjarnarbíó á auðvitað langa og merka sögu, enda er húsið rúmlega hundrað ára og er í dag oft kallað heimili sjálfstæðra sviðslista. Við fengum Friðrik til að segja okkur aðeins frá sögu starfseminnar í Tjarnarbíói, frá stöðu sjálfstæðs sviðslistafólks í dag og frá leikvetrinum sem er nýhafinn.

Séra Bjarni Karlsson er sjálfstætt starfandi prestur og steig út úr embætti á sínum tíma til að hafa tíma og þrek til að vinna við sálgæslu og vinna að doktorsritgerð um fátækt. Á sunnudaginn kemur ætlar hann að leiða messu í Kolaportinu, ásamt Guðrúnu Árnýju tónlistarkonu og í samvinnu við Öldu í Hafnarkaffi og hópi sjálfboðaliða. Bjarni kom í þáttinn í dag.

UMSJÓN GUÐRÚN GUNNARSDÓTTIR OG GUNNAR HANSSON