Mabuting Balita | Oktubre 13, 2022 – Huwebes

Ika – 28 na Linggo sa Karaniwang Panahon

Ebanghelyo: Lucas 11:47-54

Sinabi ni Hesus: “Sawimpalad kayong nagtatayo ng mga puntod sa Mga Propetang pinatay ng inyong mga ama. Sa gayon ninyo inaamin at sinasang-ayunan ang mga ginawa ng inyong mga ama; iniligpit nila ang Mga Propeta, at makapagtatayo na kayo ngayon. At sinabi rin ng karunungan ng Diyos: “Nagsugo ako sa kanila ng Mga Propeta at mga apostol ngunit uusigin nila at papatayin ang ilan sa kanila. Kayat papapanagutin ang salinlahing ito sa dugo ng lahat ng propeta, sa dugong nabuhos mula pa sa pagkatatag ng mundo, mula sa dugo ni Abel hanggang sa dugo ni Zacarias na nasawi sa pagitan ng altar at ng santuwaryo. Oo, sinasabi ko sa inyo, papapanagutin ang salinlahing ito. Sawimpalad kayong mga guro ng Batas na umagaw sa susi ng kaalaman. Hindi na kayo pumasok at hinahadlangan pa ninyo ang mga makapapasok.” Pagkatapos ay umalis si Hesus at sinimulan naman ng mga guro ng Batas at mga Pariseo na mahigpit na nakipagtalo sa kanya. Pinapagsalita nila siya tungkol sa maraming bagay at pilit na sinisilo sa anumang sinasabi niya.

Pagninilay:

Nakalulugkot isipin na ang mga Pariseo at mga guro ng batas ay magkasalungat sa itinuturo ni Hesus. Hindi nila maunawaan at pilit nilang hinahanapan ng mali si Hesus dahil hindi nila kinikilala si Hesus bilang Anak ng Kataas-taasan. Ang kanilang mga paliwanag at turo ay nakaugat lamang sa pananaw bilang tao at hindi ayon sa pananaw ng Diyos kaya ganoon na lamang ang kanilang inaasal sa harapan ng Panginoong Hesus at kung papaano nila siya tratuhin. Tayo ay inaanyayahan na maging bukas sa tunay na turo at karunungan ng Diyos. Hinihikayat tayo na tumingin ayon sa kung papaano tumingin ang Diyos sa atin. Magkaiba ang Katarungan ng Diyos at ng tao; ang katarungan ng Diyos ay nakabase sa dkila Niyang pagmamahal sa sanlibutan ngunit ang katarungan ng tao ay madalas nakabase kaparusahan, poot at paghihiganti at sapat na sa kanilang maisakatuparan ng literal ang mga alituntuning nakasulat kaysa manaig ang pagmamahal at habag na ipinahahayag ng Panginoon nang siya ay magpatawad ng mga nagkakasala, nagdadalawang isip at itinakwil ng lipunan dahil sa pagkakasakit.

-Fr. Rey Hector Paglinawan | Diocese of Cubao

Mabuting Balita | Oktubre 12, 2022 – Miyerkules

Ika – 28 na Linggo Karaniwang Panahon

Ebanghelyo: Lucas 11:42-46

Sinabi ni Hesus: “Sawimpalad kayong mga Pariseo! Nagbabayad nga kayo ng ikapu ng yerbabuena at ng ruda at ng lahat ng gulay, at pinababayaan naman ninyo ang katarungan at ang pag-ibig sa Diyos. Ito nga ang dapat gawin nang di kinaliligtaan ang mga iyon. Sawimpalad kayo mga Pariseo! Gusto ninyong mabigyan ng pangunahing upuan sa mga sinagoga at mabati sa mga liwasan. Sawimpalad kayo, na parang mga nakatagong libingan, na inaapakan ng mga tao at di man lang nila namamalayan.” Nagsalita ang isang guro ng Batas: “Guro, iniinsulto mo rin kami sa pagsasabi mo ng mga ito.” At sinabi ni Hesus: “Sawimpalad din kayong mga guro ng Batas! Ipinapapasan ninyo sa mga tao ang mga napakabigat na pasanin, at hindi man lang ninyo hinihipo ang pasanin ng kahit isang daliri.”

Pagninilay:

Mga kapanalig, pinapaalalahanan tayo ng Mabuting Balita na ang pag-ibig ng Diyos, ay hindi nabibili ng mga merito at mabubuting gawa natin.  Unang-una, libre ito para sa lahat.  Kinakailangan lamang nating tumugon ng maayos upang maramdaman natin ang tunay nitong biyaya.  Marami sa’tin ang nagkakamali, sa pag-aakalang dapat paghirapan nating mabuti ang pagkamit ng pag-ibig ng Diyos.  Alalahanin natin na sa simula’t-simula pa, inibig na tayo ng Diyos bago pa man natin Siya inibig.  Dahil hindi natin lubusang maunawaan ang dakilang pag-ibig na ito – kung anu-anong ginagawa nating ritwal at pagpapahirap sa sarili, makamit lamang ang pag-ibig ng Diyos.  Katulad na lamang ng pagpapapako sa Krus tuwing Mahal na Araw, ang paglalakad ng paluhod papuntang Altar, o pagdarasal na nakaluhod sa asin o sa buto ng monggo.  Napakarami ding ipinagbabawal sa pagsabuhay ng pananampalataya ng ilang sekta ng relihiyon.  Sa paniwalang kapag matapat nilang sinunod ang mga dapat at di dapat na mga gawaing ipinatutupad ng kanilang pananampalataya – sigurado na sila sa pag-ibig ng Diyos, sigurado na ang kanilang kaligtasan. Mga kapanalig, tinubos na tayo ng Panginoong Hesus sa kasalanan at walang hanggang kapahamakan.  At ang biyaya ng Kanyang mapanligtas na pagmamahal ay dumadaloy sa sangkatauhan magpakailanman.  Pinasisikat nga ng Diyos ang araw sa kapwa mabuti at masama.  At lahat tayo, masama man o mabuti ay lumalangoy sa dagat ng Kanyang walang hanggang biyaya at pagpapala.  Ang hinihingi lamang sa’tin ng Diyos, kilalanin at magpasalamat sa Kanyang walang-hanggang pag-ibig; mamuhay nang naaayon sa Kanyang kalooban at maging daluyan ng Kanyang biyaya at pagmamahal para sa ating kapwa.  Sa buhay mo ngayon kapanalig paano ka tumutugon sa walang-hanggang pag-ibig Sa’yo ng Diyos? – Sr. Lines Salazar, fsp | Daughters of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Mabuting Balita | Oktubre 11, 2022 – Martes

Ika – 28 na Linggo Karaniwang Panahon | Santo Papa Juan XXIII

Ebanghelyo: Lucas 11:37-41

Matapos magsalita si Hesus, inanyayahan siya ng isang Pariseo na kumain sa bahay nito. Pumasok siya at dumulog sa hapag. At nagtaka ang Pariseo nang makitang hindi muna siya naghugas ng kamay bago kumain. Ngunit sinabi sa kanya ng Panginoon: “Kayong mga Pariseo, ugali n’yong linisin ang labas ng mga baso’t pinggan subalit nag-uumapaw naman sa kasakiman at kasamaan ang inyong loob. Mga hangal! Hindi ba’t ang may gawa ng labas ang siya ring may gawa ng loob? Ngunit naglilimos lamang kayo at sa akala n’yo’y malinis na ang lahat.”

Pagninilay:

Sabi po ng mga dalubhasa sa kalusugan, every 30 minutes tayo ay exposed sa almost 300 surfaces. Hahawak ka sa mata, sa table, sa mga gamit, sa cabinet, toothbrush, iba-iba. Kaya naman every 30 minutes na tayo’y in motion—we are also exposed to 840, 000 germs. 5% lamang daw po ng mga tao ang naghuhugas ng kamay sa wastong pamamaraan. Karamihan kasi sa atin, naghuhugas ng kamay for only about 6 seconds.

Mahalaga po sa mga hudyo ang ritwal ng paghuhugas ng kamay bago kumain. Sabi nga po nila, kapag hindi naghugas ng kamay bago kumain ibig sabihin hindi ka lang physically unclean, ikaw din ay spiritually unclean. Sa ating Mabuting Balita ngayong araw, Inimbitahan si Hesus na kumain sa bahay ng isang Pariseo. Mainit ang mata nila kay Hesus kaya naman nagulat sila noong makita nilang hindi naghugas ng kamay si Hesus bago siya kumain. Ginawang pagkakataon ito ni Hesus upang turuan sila ng mas mahalagang aral.

Kung naniniwala ang mga Pariseo na ang panlabas ay sumasalamin ng kalooban…Ipinapaalala sa kanila ni Hesus na mas mahalagang pagtuunan ng pansin ang kalinisan ng kalooban. Ang taong hipokrito po, ganyan ang gawain pagtutuunan ang panlabas upang makita ng nakararami. Kaya nga ang tawag natin sa taong mapagpanggap—ay naghuhugas kamay siya!

Hindi po tayo tinuturuan ni Hesus na masama ang maghugas ng kamay. Ano ang nais niyang ituro? Ang taga-sunod ni Kristo, pinagtutuunan ng pansin ang kalooban—kung maayos ang kalooban—susunod na din ang panlabas.

– Cl. Vinz Aurellano, SSP | Society of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Mabuting Balita | Oktubre 10, 2022 – Lunes

Ika – 28 na Linggo sa Karaniwang Panahon

Ebanghelyo: Lucas 11: 29-32

Nang dumadagsa na ang mga tao, nagsimulang magsalita si Hesus: “Masamang lahi ang lahing ito; humihingi ito ng palatandaan subalit walang ibang palatandaang ibibigay dito kundi ang palatandaan ni Jonas. At kung paanong naging palatandaan si Jonas para sa mga taga-Ninive, gayundin naman ang Anak ng Tao para sa mga tao sa kasalukuyan. Sa paghuhukom, babangon ang Reyna ng Timog kasama ng mga lalaki ng lahing ito at hahatulan sila. Sapagkat dumating s’ya mula sa kabilang dulo ng mundo para masaksihan ang karunungan ni Solomon. Sa paghuhukom, babangon ang mga lalaking taga-Ninive kasama ng salinlahing ito at hahatulan nila ito dahil nagbalik-loob sila sa pangangaral ni Jonas; at dito'y may mas dakila pa kay Jonas.”

Pagninilay:

Nang mamatay si Queen Elizabeth, marami ang nakakita ng double rainbow mula sa ibabaw ng Buckingham Palace. Sign daw iyon ng pag-asa. May nagsasabi rin na ito ay ang mata ng Diyos na nakatingin sa symbolic home ng British Monarchy. May wisdom sa nakita nilang sign. Kung may karunungan sa ganitong tanda, mayroon ding sign of wisdom na paalala ang ating Jesus Maestro tungkol kay Solomon at ni Jonas. Simbolo sila ng maunawaing puso at pagsisisi. Kung sila ay naging huwaran ng karunungan, how much more kay Jesus na Siya mismo ang nagkatawang-taong Karunungan. Ang Karunungan na may malawak na pagmamahal at pang-unawa, nalalaman ang lahat, salamin ng walang hanggang buhay, ang larawan ng kabutihan ng Diyos. Siya si Jesus. Bago pa nilikha ang lahat, Siya na. In fact, nasusulat sa Aklat ng mga Kawikaan: “Mula pa sa walang pasimula, naroon na Ako.” Sa larawan ng Kanyang kagandahang-loob, nabiyayaan tayo ng Karunungan. Tulad sa iba’t ibang makukulay na karanasan natin. Naguguhit sa bawat pangyayari ang Kanyang karunungan. Kailangan lang nating maunawaan. Halimbawa, kapag namatayan tayo, hindi lang basta nauulila tayo. May karunungan sa kanilang paglisan. Pagkakataon ito na mapagtanto natin ang kahalagahan ng buhay o ng pagsisisi, ng pagpapatawad. O kaya nabigo ka sa iyong dream project. Sa una ang galing-galing ng performance mo, kaso may nangyari na hindi mo inaasahan na bumagsak ito sa iyong mga kamay. Nawala nang parang bula. Ano’ng karunungan ang naroon? Ang kahalagahan ng natutuhan mong lesson sa iyong experience, ang karunungan sa pagpupursigi at katibayan ng loob. Alam n’yo ba na sa oras na nakakaranas tayo ng pighati, ng kalungkutan, ng krisis, naroon tayo sa Piging ng Karunungan? Buong pagmamahal Niyang sinasabi: “Kumain sa aking Handaan at alak kong tinimpla ay tikman. Talikdan ang kamusmusan at mabuhay. Lumakad nang matuwid sa Landas ng Kaunawaan.” While we are in the Banquest of Wisdom, nothing is in vain. May kabuluhan ang lahat. Bukod sa lumalawak ang pananaw natin sa buhay, pinapatibay ni Jesus ang ating kalooban. Dito nabubuo ang runong sa ating puso. At sa oras ng pagdedesisiyon matatag tayong nakakapili ng akmang pagkilos at pagsasalita dahil sa mga lessons learned natin. Hanggang tayo mismo ang magiging salamin ng karunungan ng Diyos para sa iba. – Sr. Gemmaria dela Cruz, fsp | Daughters of St. Paul

ST. CALLIXTUS l PATRON OF CEMETERY WORKERS

Feast Day: October 14

“St. Callixtus, you served an earthly master as a slave and a heavenly master as deacon and pope. Help us to love and serve God no matter in what state of life we are in.”

Do I honor the dead by praying for the eternal repose of their soul?

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Mabuting Balita | Oktubre 9, 2022 – Linggo

Ika – 28 na Linggo Karaniwang Panahon | Indigenous Peoples’ Sunday

Ebanghelyo: Lucas 17:11-19

Habang papunta si Hesus sa Jerusalem, dumaan siya sa hangganan ng Samaria at Galilea. At pagpasok niya sa isang nayon, may sampung lalaking may ketong ang lumabas para salubungin siya. Tumayo ang mga ito sa malayo at tumawag nang malakas: “Hesus, Guro, maawa ka sa amin.” At sinabi naman sa kanila ni Hesus. “Umalis kayo at humarap sa mga pari.” At nangyari na gumaling sila habang naglalakad. Isa sa kanila ang agad na nagbalik nang makita niyang gumaling siya, at pasigaw niyang pinuri ang Diyos. Nagpatirapa siya sa paanan ni Hesus, sa pagpapasalamat sa kanya. Isa siyang samaritano. Kaya sinabi ni Hesus: “Tumayo ka, iniligtas ka ng iyong pananampalataya.”

Pagninilay:

Ang mga ketongin sa Israel ay tinuturing na makasalanan. Meron na nga silang mga sakit pero tinitingnan pa silang masama ng lipunan. Pero meron tayong kasabihan na: “Misery loves company.” Kaya, nagsama-sama ang sampung ketongin at hinihintay nila si Jesus sa pintuan ng bayan. Karaniwan ang mga ketongin ay inaasahang nasa malalayong lugar at hindi sa sentro. Subalit malamang narinig nila ang kapangyarihan ni Jesus na magpagaling ng ketong. Nagsama-sama ang sampung ito at humingi kay Jesus na pagalingin mula sa kanilang sakit na ketong. Ang maganda sa ating napakinggan na ebanghelyo, hindi hinawakan ni Jesus ang mga ketongin at hindi rin sila gumaling ng sila ay harapin ni Jesus. Ayon sa Ebanghelyo gumaling sila, habang sinunod nila ang utos ni Jesus na humayo at ipakita ang sarili sa pari. Ipasuri para sila ay sertipikahan na gumaling na. Naroroon ang pananampalataya sa sampung ketongin na ito. Sumunod sila sa utos ni Jesus kahit hindi pa sila gumagaling. Gumaling lamang sila habang tinutupad nila ang utos ni Jesus. Sa buhay natin gusto natin makakita ng mga resultang instant kaagad ng mga magagandang bunga at pangyayari. Pero sa Ebanghelyo ngayon pinaalalahanan tayo na ang himalang ibibigay sa atin ni Jesus ay bunga ng ating pananampalataya. Kung tayo’y hahayo, susundin natin Siya. Saka lamang magaganap ang mabuting bagay na hinihingi sa kanya. Ang tanong ni Jesus bakit sa sampung pinagaling Niyang ketongin, bakit iisa ang bumalik para magpasalamat? Sabi daw nga mga iskolar sa Bibliya, ang siyam na ketongin ay kabilang sa tinatawag na chosen people of God, mga taga-Israel dapat lang na kami ay pagalingin dahil karapatan naming na pagalingin. Kaya, nagkibit balikat lamang sila. Pero, hindi ganun ang nasa isip ng isa pang ketongin na ayon sa Ebanghelyo ay isang Samaritano o pagano. Siya ay bumalik kay Jesus agad-agad nang naramdaman niyang siya’y gumagaling at nagpatirapa kay Jesus nagpasalamat. Napakasarap sa buhay natin na may mga taong marunong magpasalamat. Lalo na kung nagawan natin sila ng kabutihan. Pero, ito po ay paalaala rin sa atin na tayo ay kinakailangan maging mapagpasalamat na bayan ng Diyos. Dahil sa harapan ng Diyos lahat tayo nagkakasala, lahat tayoy mga ketongin, lahat tayoy nangangailangan ng kanyang pagpapagaling. Huwag po sana tayong mapagmalaki. Sa halip lumapit tayo palagi sa panginoon na may pag-amin sa ating mga kasalanan.

- Fr. Paul Marquez, SSP | Society of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.