購物係女人嘅愛好就大家都知啦，我都等緊嗰日可以快啲去日本大買特買啊！買嘢可能就係女人嘅天性，人都係抵受唔到靚既魅力㗎嘛，雖然每個人變成購物狂都有唔同嘅原因，可能係因為壓力大到要發洩，可能係真係好欣賞設計師嘅創作，又可能係純粹中意買，始終買嘢好容易令人揮金如土，所以有一個可以俾到正確suggestion你既朋友要好好對佢阿😆

朋友，我當你一世朋友，但係。。你當我永遠傻仔，總有啲人比較自私，有啲咩真係貪方便就近氹你入局，但係你搵我笨個陣，個心究竟痛唔痛，哈，對你好既人終有一日會對你失望到漸漸離開，人始終係群體動物，到有日身邊嘅人都走哂就唔好後悔。

自信是個好東西，我諗。。係香港呢個社會好似好多野都會慢慢剝削一個人由細到大儲落嘅自信心，細個好易俾人讚，但越大越覺得自己比唔上其他人，就係呢個社會樣樣野都要比較，做下自己都好似錯咗咁，或者呢個可能係人嘅妒忌心作祟，或者可能已經係一個現象，因為前一代人係咁，後代都會繼續係咁，所以將呢個思想繼承落去，導致宜家好多年輕人都好似冇咩自信。呢集唔係想笑迷之自信嘅人，反而係有啲羡慕佢哋唔會理世界嘅眼光，繼續做自己，彰顯自己。希望大家都可以做到佢哋咁，但都係自信就夠了，多咗就變咗質了，相信大家都希望做個有智慧嘅人😜

細細個就怕測驗考試、怕俾爸爸媽媽鬧，到大個左以為冇有怕，反而怕既野冇少到，怕同人相處、怕學新野… 其實每個階段都有怕既野，係成長既一部分，所以唔洗怕既🤪(凡事唔係絕對嘅，其實又有咩好怕喎!)

唔知係咪每個人都會有少少強迫症，你哋又有冇啊？我諗作為香港人嘅我哋，應該唔多唔少都會有啲強迫症，話晒我哋都係全世界排名數一數二壓力大嘅城市。好似咩……潔癖啊、出門要檢查好多次自己有冇帶電話、鎖匙、銀包咁，原來強迫症其實都係一種對於自己生活嘅一啲焦慮嘅表現。所以大家都係唔好逼得自己咁緊啦，我都明有啲嘢自己其實控制唔到嘅，香港人放鬆啲啦！

因為某人最近對一套戀綜上哂腦所以要私心出一集：名係同大家chat，實質係要同大家賣廣告，如果大家都有睇呢套戀綜嘅，就快啲某人私chat，pm我哋，某人日日期待大家同佢傾❤️

Btw 我地希望大家都可以同感情長久，冇咩感情煩惱，stay sweet💗單身嘅朋友快啲搵到個岩既人互相依賴💘

我好攰…

就係好攰…

係咁先……

多謝大家…………

唔知大家細個嗰陣有冇對自己嘅未來充滿幻想又期待，成日幻想下自己未來會係點，如果有預知未來嘅能力或者法寶，又會唔會好似過得輕鬆啲，定會對已成定局嘅未來失望呢？細個可能睇得太多漫畫定電視劇，會跟住個「潮流」幻想自己未來嘅「完美」大計：幾多歲要結婚、幾多歲生仔、生幾多個小朋友、幾多歲會做到成功人士、幾多歲可以環遊世界……真係諗下都好開心，可能真係要對自己嘅未來有啲幻想先會覺得刺激同新鮮嘅🤓但當我哋大個咗又有幾多嘢真係跟到個「完美計劃」嘅步伐，人大咗真係細膽咗，唔再夠膽偏離「安穩」嘅軌道，最後就係面對現實，好好生活。我地呢，係十分鼓勵大家得閒發下白日夢嘅，有研究顯示過白日夢係有益身心㗎，發多啲都無妨啊！

人生真係充滿分叉路，每個分叉路都需要我哋既思考，甚至勇氣做出可能最正確嘅選擇，細個可能覺得喺呢個迷宮入面做錯左決定就會走唔返出去；或者好驚，好驚呢個世界因為有太多未知未見過嘅嘢，不如安全啲跟住前人幫你鋪既路或者佢哋覺得岩嘅路行實冇錯。但呢段路行咗好耐，呢個迷宮都可能過咗三分之一，先發現，原來呢度冇所謂嘅「掘頭路」，原來行錯咗可能會有其他驚喜；原來就算後悔都可以退後再嚟過㗎。冇一個選擇係絕對正確，亦冇一個選擇係錯，呢個世界上可能有好多人就係行緊我地覺得所謂錯嘅路，咁又點？佢哋依然生活得好好，可能都好滿足。我哋可能行緊所謂好嘅路都會終有一日麻木，唔知自己做緊咩……增值自己，發掘自己嘅興趣，有時有挫折先知咩叫「好」，先會進步，先會感受到生活，你哋又有冇邊一個選擇真係覺得自己揀錯咗，好後悔，歡迎留言又或者pm同我地講下啦！

「月唔缺就慶佳節」，今年大家月餅節有咩節目呢？仲係唔係食燈籠同玩月餅啊？節日好多時對於我哋呢啲新一代嚟講好似唔再新鮮又唔再有氣氛，可能係社會發達咗，慶佳節同平日都好似都差無幾；又可能社會事事都要被限制住，令到大家是是但但咁過每一個節日。節日可以平平淡淡過，但唔可以平平無奇，希望大家月餅節唔好食咁多月餅變月餅，同屋企人團團圓圓望月圓啦！祝大家中秋節快樂！🌕