#hoxeenArousaPontevedraDíaaDía

#de12a1430

O alcalde de Valga, José María Bello Maneiro, acompañado polas concelleiras Begoña Piñeiro e Carmen Gómez compareceu esta mañá para negar as acusacións realizadas polo portavoz de En Marea, Luís Villares, nas que denunciaba unha presunta trama de corrupción que implicaría ao rexedor, ademáis de ao secretario e o interventor municipal.

Os asesores xurídicos están a estudar a interposición dunha querela contra o señor Villares e o seu partido. “En política non todo vale. Hai que ser serios e respectuosos e xa é hora de que alguén empece a tomar medidas contra as descalificacións e os insultos”, sostén o alcalde en nome do equipo de goberno.

 

Bello Maneiro defendeu a profesionalidade, responsabilidade e compromiso do secretario e o interventor que exercen como acumulados en Valga. O salario que recollen os orzamentos para o secretario e o interventor está dentro que marca a lei, e non só iso, “senón que é superior ao mínimo que establece a lei. Porque ten que pagar máis o Concello de Valga”, afirmou Bello Maneiro.

Ademais, aludiu “á irresponsabilidade” de que o Colexio de Secretarios e Interventores (Cosital) contribúa a difamar a dous dos seus asociados. Pregúntase o goberno de Valga se, por esa regra de tres, “o secretario de Pontevedra, un dos que asina o recurso contra os orzamentos municipais, cobra un bo soldo para que faga o que quere o alcalde? Ou se o alcalde de Santiago ten como secretario a unha persoa da súa confianza polo mesmo motivo? Nós dicimos que non. Son profesionais que defenden a legalidade e cumpren coas súas obrigas e deberes. Os de Valga tamén. Pero algúns non reparan en que detrás destes dous profesionais hai dúas persoas que teñen familia”.

 

As dietas que perciben “tamén están recollidas na lei. Cobran 37,40 euros por cada día que veñen ao Concello. Só faltaría que tiveran que pagar do seu bolsillo as comidas e os desprazamentos dende Riveira e Sanxenxo”, engade o alcalde. Hai que ter en conta que o secretario e o interventor acuden ao Concello de Valga un ou dous días á semana.

Asimesmo, o rexedor remarcou que “é falso que o Concello contratara a unha sociedade. Contratou durante un ano por 1.000 euros ao mes a unha persoa autónoma, para garantir o bo funcionamento da administración e para axilizar temas atrasados que o anterior responsable non logrou poñer en día. Este contrato remata en xuño e é un traballo que, na meirande parte, non se fai físicamente no Concello de Valga, senón de xeito telemático a través da Sede Electrónica que implantou o Concello. Ao traballar con ordenadores é doado tirar do fío e saber quen traballa”, remarcou o alcalde,

#hoxeenArousaPontevedraDíaaDía

#de12a1430

A Plataforma do Salnés en defensa da Sanidade Pública retomou esta mañá as mobilizacións en contra da reforma da Lei de Saude que suprime as áreas sanitarias de Galicia e contra os recortes sanitarios.

O colectivo sanitario arousá concéntrouse ás portas do Hospital do Salnés sumándose ás protestas convocadas en toda Galicia pola Plataforma SOS Sanidade Pública.

Na mobilización estiveron presentes representantes políticos municipais, como o alcalde de Vilagarcía, Alberto Varela, a alcaldesa de Cambados, Fátima Abal, así como a portavoz nacional do BNG, Ana Pontón.

A concentración do Barbanza será esta tarde ás 20.30 na Praza do Concello de Ribeira, e a mesma hora terá lugar a convocada en Pontevedra, na praza da Ferrería.

As protestas de hoxe son mobilizacións previas á gran manifestación que se vai celebrar en Santiago o 4 de febreiro. Os convocantes habilitarán autobuses que sairán dende Vilagarcía, Cambados e A Illa.

Nolo contaba a portavoz da Plataforma do Salnés, Rosa Casal, que denunciaba unha situación no centro comarcal de presion asistencial insostible con profesionais que sufren crises de ansiedade.

#hoxeenArousaPontevedraDíaaDía

#de12a1430

O Concello de Cambados estrea páxina web. Un novo portal dixital, creado pola empresa de Vilagarcía “Diseños e Webos” por un importe de 4.344 euros financiados polo Plan Concellos 2017 da Deputación.

A nova web de Cambados é máis intuitiva, visible e sinxela de usar tanto para os veciños como para os funcionarios municipais.

Así o explicaba a alcaldesa Fátima Abal na presentación do novo portal, acompañada do concelleiro Miguel Osorio e a representante da empresa María Riveiro.

#hoxeenArousaPontevedraDíaaDía

#de12a1430

O Colexio O Piñeiriño de Vilagarcía estreará en breve o tan demandado comedor. Están xa rematadas as obras, realizadas entre a Xunta e o Concello cun investimento duns 70.000 euros, e xa durante este curso comezará o servizo que dará cabida a preto de 70 alumnos.

A presidenta da ANPA, Marcela Diz, expresaba esta mañá a súa satisfacción por ter conseguido unha reclamación case histórica, pese a que o comedor terá menos prazas das que se pensaba.

Así nolo contaba durante a supervisión das obras nun acto no que tamén estivo o director do centro, o arquitecto do proxecto, o delegado territorial da Xunta en Pontevedra e o alcalde de Vilagarcía.

#hoxeenArousaPontevedraDíaaDía

#de12a1430

O BNG de Sanxenxo presentará alegacións contra a prórroga da concesión portuaria ao Real Club Náutico de Sanxenxo.

A formación nacionalista entende que a entidade que preside Pedro Campos solicita unha prórroga cando non cumpliu os acordos da primeira concesión e rexeita que poida seguir nas instalacións máis aló de 2027.

O Náutico trata de extender a súa explotación ata o máximo legal permitido de 50 años e dende o BNG recriminan tamén a xestión do alcalde, Telmo Martín, como presidente de Nauta, así como a de Portos de Galicia.

Así o argumentaban esta mañá o portavoz municipal, David Otero, e a concelleira Sandra Fernández Agraso.

#hoxeenArousaPontevedraDíaaDía

#de12a1430

O alcalde de Vilagarcía ve como unha proposta electoralista a reclamación da baixada do imposto de circulación por parte do PP.

Ademáis, Alberto Varela recoñece a lentitude na posta en marcha das axudas comprometidas para ás comunidades de montes pero salienta que se debe recoñecer o esforzo do concello nun tema que non é competencia municipal.

Así o explicaba o alcalde esta mañá nunha rolda de prensa na que fixo referencia ás negociacións do orzamento deste ano.

O Instituto Bouza Brey de Vilagarcía dispón dende agora dunha aplicación informática didáctica orientada ao campo de automatización industrial que permitirá un importante aforro económico e de espazo nas aulas.

I é que esta aplicación realiza simulacións no ordenador dos distintos procesos industriais que forman parte da aprendizaxe do departamento de electricidade e electrónica do IES.

Ademáis, o proxecto foi creado polos propios docentes e alumnos do centro educativo a través dun premio de innovación conseguido o ano pasado cunha dotación orzamentaria de 5.332 euros.

O resultado foi moi satisfactorio e aporta a pofesores e alumnos unha ferramenta de traballo de baixo custe, tal como nos contaban esta mañá a coordinadora do proxecto, a profesora Uxía Casal, e un dos alumnos participantes no mesmo, Diego Villaverde.

O Concello de Vilanova acometeu a mellora da iluminación do campo de futbol de San Miguel de Deiro, que presentaba un deficiente grao lumínico e falta de uniformidade, impedindo a correcta práctica deportiva.

A actuación consistiu na instalación de 20 proxectores LED de 407W, (5 por cada poste) cunha vida útil media de 100.000 horas e unha inversión de 17.820 euros a través do Plan Concellos da Deputación.

Así o explicaba a concelleira de Urbanismo, Nuria Morgade, durante unha visita ás obras, acompañada do presidente do clube, Venerando Fontán.

Vilagarcía pon en marcha unha nova edición dos concertos de “Achégate ao Salón” que comezarán o 4 de febreiro coa actuación do grupo “La habitación Roja”.

Seguirán o cantante “De Pedro” o 4 de marzo e “Cristina Rosenvinge” o 8 abril.

Todos os concertos serán ás 13:00 horas no Salón García con entrada de 7 euros por concerto, abonos de 15 euros e de balde para menores de 16 anos e desempregados.

Os detalles nolos contaba esta mañá a concelleira de Cultura, Sonia Outón, na presentación da iniciativa, acompañada do alcalde, Alberto Varela.

A Escola de Música Coda trae a Vilagarcía o musical "Shrek" adaptado ao galego, que reúne sobre o escenario a medio cento de artistas, con música en directo, unha posta en escea con varios cambios de decorado e un gran despliegue técnico.

O espectáculo será o 27 e 28 de xaneiro ás 18 horas no Auditorio Municipal con entradas a 6 euros que xa se poden mercar en ticketea.

Os detalles explicábanos esta mañá a directora do espectáculo, Olalla Bouzas, e a directora da Escola, na presentación do musical, acompañadas pola concelleira de Cultura, Sonia Outón.