a Plataforma pola Defensa da Sanidade Pública do Salnés ten xa preparada a marcha reivindicativa que este domingo partirá do centro de saúde de Vilagarcía ás 11.30 da mañá para rematar no Hospital do Salnés.

Ademáis, o colectivo continúa coa súa campaña informativa sobre as consecuencias negativas que, ao seu entender, terá para o Salnés a nova Lei de Saude de Galicia, coa conversión da área sanitaria en distrito.

A Plataforma ofrecía esta mañá unha rolda de prensa ás portas do Hospital do Salnés para explicar os detalles da marcha.

O BNG de Cambados lanza unha mensaxe de tranquilidade sobre a crise do goberno cuatripartito.

O portavoz nacionalista e tenente de alcalde, Victor Caamaño, amosouse esta mañá conciliador ao valorar a situación trala reunión da comisión de seguimento do pacto celebrada o pasado venres.

Sobre todo, despois de que o concelleiro de Pode, José Ramón Abal, anunciase que non acudirá a reunión convocada para o próximo venres e que agora será o partido quen tome a decisión do futuro de Cambados Pode no goberno local.

O BNG mantén unha liña constructiva, buscando solucións e sen reproches, solicitando a mesma lealtade aos demáis grupos, segundo explicou o portavoz nacionalista.

Victor Caamaño require a todos os seus socios de goberno que acudan a segunda xuntanza da comisión de seguimento para seguir avanzando na elaboración dun anexo do pacto e que o concelleiro de Pode propoña o que considere para dar por pechada a crise de goberno.

As obras de humanización da Avda Luis Rocafort, que está a realizar a Deputación, estarán rematadas e quedarán inauguradas o 22 de decembro.

Así o confirmou esta mañá o deputado de mobilidade Uxío Benítez, durante unha visita á zona acompañado polo alcalde de Sanxenxo, Telmo Martín.

Por certo, o rexedor popular amosábase moi satisfeito co remate da actuación, lonxe de toda a polémica xerada o inicio do proxecto, cando gobernaba Gonzalo Pita e o PP estaba na oposición.

So quedan pendentes para proceder á inauguración da nova avenida o remate da pavimentación e a colocación de árbores e mobiliario urbano.

A maiores, tamén se acondicionará unha pequena parcela de 200 metros que estaban pendentes de cesión e que posibilitarán a continuidade da beirarrúa.

A crise de goberno do cuatripartito de Cambados non está pechada.

Pola contra, en opinión do concelleiro de Pode, José Ramón Abal, a situación agravouse.

Abal volve a ser moi crítico cos seus socios de goberno, afirma que a reunión da comisión de seguimento do pasado venres non valeu para nada e asegura que perdeu a confianza na alcaldesa para que solucionase a situación.

Asimesmo, anuncia que non irá a reunión convocada par ao próximo venres e que agora será a militancia de Cambados Pode quen tome a decisión do futuro da formación no goberno local.

En todo caso, José Ramón Abal dí que non quere buscar culpables e recoñece que o único responsable foi el por levantar a man na sesión de investidura a favor de Fátima Abal.

Cambados recupera as Xornadas de Exaltación da Zamburiña.

Tras catro anos de ausencia pola escaseza de capturas, Concello, Asociación de Comerciantes, e Confraría de Pescadores retoman as Xornadas que se celebrarán do 30 de novembro ao 5 de decembro.

Dez locais de hostelería participarán na iniciativa coa elaboración de propostas a base de zamburiña que se servirán a un prezo de seis euros a ración, doce euros se vai acompañada dunha botella de Albariño.

Os detalles explicounos esta mañá o Concelleiro de Promoción Económica, Xurxo Charlín, na presentación das Xornadas, acompañado dos representantes de Zona Centro, Confraría e do Tenente de Alcalde, Víctor Caamaño.

A Xunta reivindica que Galicia é o mellor lugar para acoller o Laboratorio Comunitario de Referencia para o Control de Bivalvos, sempre e cando se materialice unha candidatura unida en coordinación co Goberno de España.

Así o afirmou o presidente da Xunta, Alberto Núñez Feijoo, durante a súa intervención esta mañá en Vilaxoán no acto de celebración do 25 aniversario do Intecmar, o Instituto para o control do Medio Mariño.

Como argumentos para defender a idoneidade de Galicia, Feijoo referiuse ao liderado da Comunidade en produción de bivalvos, á traxectoria investigadora e á ocasión de seguir ampliándoa a través do Intecmar e ao traballo para dar unha resposta coordinada aos retos do brexit no eido da pesca na Unión Europea.

A xuízo do presidente, estes son os mellores avais para conseguir oficializar a condición de referentes no estudo dos bivalvos.

“Se traballamos unidos, se facemos fincapé na coordinación co Goberno de España e se somos capaces de explicar o que facemos e a nosa experiencia conseguiremos oficializar a nosa candidatura”, abundou, incidindo en que este obxectivo non se podería formular sen a traxectoria e o traballo do Intecmar.

No acto estivo tamén presente a conselleira do Mar, Rosa Quintana, que, por momentos emocionada, resaltou o traballo dos traballadores do Intecmar.

As chuvias das últimas horas non están a mitigar a situación de seca e de momento non teñen ningunha incidencia.

Augas de Galicia advirte que é necesario que chova con continuidade e constancia para que se produzca unha recarga efectiva dos recursos hídricos.

No Salnés, a falta de auga de momento non está a afectar ao concellos que se nutren do Umia, xa que o consumo está de momento por baixo do caudal do río.

Así o explicaban esta mañá o xerente e o presidente da Mancomunidade do Salnés, Ramón Guinarte e Gonzalo Durán.

A Mancomunidade do Salnés fixo balance esta mañá dos resultados promocionais que tivo a emisión do programa de television Volando Vou a pasada semana.

Segundo estima o delegado de turismo, Gonzalo Pita, as cifras avalan que a inversión de 12.900 euros feita pola entidade comarcal para a realización do programa rentabilizouse con creces.

Foi visto por máis de un millón e medio de espectadores e tivo máis de 20 millóns de visualizacións nas redes sociais.

Agora, a Mancomunidade prepara xa outra viaxe a Madrid para promocionar a Cidade Europea do Viño.

O barrio de Matosinhos experimentará un importante cambio a través do proxecto de reforma integral do parque e a contorna que o grupo de goberno levará ao próximo pleno para a súa aprobación.

A primeira fase da actuación, centrada no entorno da gardería municipal, supón un investimento de 320.000 euros. A intención do executivo local é que se financie a través do superávit do concello.

A execución incluirá a mellora de accesibilidade e seguridade viaria, acondicionamento estético e a renovación de todas as redes de abastecimento e saneamento.

Asemesmo, habilitarase unha zona peonil para o paso de persoas á gardería municipal e crearase un pequeno acceso para vehículos e aparcamento.

Posteriormente, realizaríase a segunda fase do proxecto, todavía sen financiación, e que estará destinada á mellora do entorno do parque e os colexios.

Así o explicaban o alcalde, Alberto Varela, e a concelleira de Urbanismo, Paola María, na presentación do proxecto.

Os traballos da reforma integral del paseo marítimo entre Vilagarcía e Carril comezaron retirando as antigas losetas e facendo probas sobre de qué tipo será o acabado e as cores do formigón.

A idea é que se elixa o material máis idóneo para que sexa máis seguro e evite contínuas roturas e necesidades de mantemento.

As obras inícianse polos extremos nunha primeira fase que está previsto remate en tres meses.

A segunda, o tramo central, executarase nos primeiros meses de 2018, con cargo aos orzamentos do Estado para o ano que ven, segundo o acordo acadado entre a dirección xeral de Costas e o goberno local.

Así o explicaba o alcalde Alberto Varela durante unha visita de supervisión dos traballos, acompañado da concelleira de Urbanismo, Paola María.