A aceleradora de negocios que o Igape pon en marcha no Pazo de Vista Real ten xa cubertas case a metade dos 22 proxectos que como máximo acollerá este espazo de coworking e asesoramento empresarial.

A iniciativa comezará este mesmo mes de setembro e prolongarase durante cinco meses.

O Concello e o Igape animan aos emprendedores a presentar os seus proxectos nas 12 prazas que quedan libres.

Así o explicaba esta mañá o xerente do Igape, Guillermo Viña, acompañado do alcalde de Vilanova, Gonzalo Durán, e o concelleiro de Promoción Económica, Javier Tourís, nunha rolda de prensa que recollemos en AROUSA PONTEVEDRA DIA A DIA.

As obras de construcción do comedor escolar no colexio do Piñeiriño de Vilagarcía comezarán a finais de ano e poderían estar listas para finais de curso.

Será xestionado pola ANPA e terá capacidade para 80 prazas.

O Conselleiro de Educación, Román Rodríguez, e o alcalde de Vilagarcía, Alberto Varela, asinaron esta mañá o convenio entre a Xunta e o Concello que permitirá a creación do tan demandado comedor por parte da comunidade educativa.

A actuación, orzamentada en 75.000 euros, financiarase mediante 35.000 euros por parte do Concello e os 40.000 restantes a cargo da Xunta.

Ademáis da sinatura deste convenio, o Conselleiro de Educación visitou as obras que su departamento está realizando en el instituto Castro Alobre na mellora das instalacións deportivas.

Trátase da segunda fase de reforma do pabillón, con arrano de envolventes, fachadas, fiestras e accesos por importe de 150.000 euros. A previsión e que, neste caso, a obra estea rematada antes de fin de ano.

Tanto o alcalde como o Conselleiro destacaban a importancia da colaboración entre administracións na realización de obras necesarias para os veciños.

Así o recollemos en AROUSA PONTEVEDRA DIA A DIA.

O Concello de O Grove e a Deputación de Pontevedra asinaron esta mañá o convenio de colaboración para a Festa do Marisco que se celebrará dende o 5 de outubro.

A achega provincial ascende aos 6.000 euros destinados a diferentes actividades programadas.

Ademáis da sinatura do convenio, o alcalde, José Antonio Cacabelos, e a presidenta da Deputación, Carmela Silva, reclamaron a declaración da Festa do Marisco como de Interese Internacional.

Detalles dunha comparecencia que recollemos en AROUSA PONTEVEDRA DIA A DIA.

Tralo acto da rúbrica, o alcalde e a presidenta provincial inauguraron o "cruceiro" de pedra instalado en Punta Cantodorxo que marca o inicio da Ruta Xacobea do Mar de Arousa.

Trátase dunha obra do escultor Francisco Pazos instalada xa nos últimos días.

E outra novidade no entorno da Festa do Marisco deste ano é unha ruta por mar promovida pola iniciativa privada.

Os datos de ocupación hoteleira volveron bater record durante o mes de agosto.

Na comarca do Salnés superouse o 95% e xa hai un alto índice de reservas para o mes de setembro.

Son os datos de Turismo Rías Baixas que desvelaba esta mañá a presidenta de Deputación, Carmela Silva.

Segundo informou a presidenta da Deputación de Pontevedra, os datos de Turismo Rías Baixas confirman que o mes de agosto pechou cunha ocupación hoteleira media provincial do 91,11%, “é dicir, case 12 puntos por riba do previsto e 2 puntos por riba dos resultados obtidos no mesmo mes do 2016, cando a ocupación acadou o 89,2%”.

Estes resultados, tal e como asegurou Carmela Silva, “xa nos sitúan como a cuarta zona turística con maior auxe en España, con pernoctacións que medraron, no primeiro semestre do ano, un 3,7% e visitantes que tamén o fan un 9%, o que nos sitúa como a provincia galega máis atractiva xa que estamos a recibir ao 40% dos visitantes que elixen Galicia como destino”.

A comarca do Salnés rexistrou unha ocupación hoteleira do 95,12%, sete puntos por riba que agosto de 2016, cando a porcentaxe acadou o 88%.

No caso desta comarca, a presidenta provincial subliñou que os hoteis de catro estrelas acadaron o 100% da ocupación e que vilas como Sanxenxo ou O Grove superaron en catro puntos o rexistrado en agosto do ano pasado.

Na comarca de Pontevedra, segundo as estimacións de Turismo Rías Baixas, prevíase unha ocupación superior ao 80%, “e o certo é que –tal e como manifestou Silva- foi do 92,25%, é dicir, máis de doce puntos por riba que os obtidos en agosto de 2016 e tamén doce puntos máis do previsto”.

A presidenta provincial adiantou que “o sector nos está a trasladar que setembro continuará esta tendencia crecente rexistrada durante o verán e que se confirma con datos que xa contabilizan nestes momentos portais de reservas como booking.com”.

Ao respecto, Silva daba a coñecer que, segundo os portais on-line, Rías Baixas ten xa o 83% das prazas reservadas, ascendendo ata o 100% as efectuadas en Pontevedra, o 95% en Baiona, o 85% en Vigo e o 76% nas comarcas do Salnés e O Morrazo.

O Concello de Vilanova desvelou esta mañá os resultados das excavacións arqueolóxicas que se están a realizar no entorno do campanario de Cálogo, que concluirán o próximo martes.

A raiz das catro catas feitas, a conclusión dos arqueólogos é que en Vilanova houbo asentamentos humanos dende o século IV antes de Cristo ata o IV despóis de Cristo.

Dados os bos resultados destas excavacións, o Concello pensa xa en continualas o vindeiro ano engadindo o uso dun xeoradar.

Para elo, o alcalde Gonzalo Durán xa anunciou que comezará a busca de financiamento e a redacción do proxecto

Un dos achádegos é un muro descuberto onde se cree que se ubicaba a muralla do asentamento castreño.

Asi o desvelaba esta mañá o director das excavacións nunha comparecencia no entorno das actuacións que recollemos en AROUSA PONTEVEDRA DIA A DIA.

A praza de Fefiñáns de Cambados acollerá un ano máis a saída da Concentración do Albariño de Coches Clásicos, que este ano percorrerá a Ruta do Padre Sarmiento con inicio en Vilanova de Arousa e remate en Sanxenxo.

A actividade celebrarase o 2 e 3 de setembro, organizada polo Club Clásicos Salnés.

Os detalles explicábaos esta mañá o presidente do colectivo, Marcos Cortiñas, durante o acto de presentación, acompañado pola alcaldesa Fátima Abal, que recollemos en AROUSA PONTEVEDRA DIA A DIA.

Antón Xil conversa co Presidente de Portos de Galicia, José Juan Durán, sobre a xestión este ano dos portos autonómicos, abordando diferentes temas relacionados coas iniciativas postas en marcha dende o organismo portuario para promover melloras e calidade dos portos, tanto pesqueiros como náuticos e deportivos.

Sanxenxo promociona a Rede Galega de Parques Naturais de Galicia, que foron visitados por preto de 9.000 persoas ata o pasado mes de xullo, atraídos por un turismo diferenciado e de calidade.

Así o indicou a conselleira de Medio Ambiente e Ordenación do Territorio, Beatriz Mato, durante a súa visita á carpa informativa instalada na zona portuaria de Sanxenxo para a promoción da Rede galega que aglutina estes espazos naturais.

A titular do departamento autonómico destacou a vila de Sanxenxo como “un dos mellores escaparates” para dar a coñecer a riqueza natural e paisaxística de Galicia.

O alcalde de Vilanova e tamén presidente da Mancomunidade do Salnés, Gonzalo Durán, solicitou unha reunión co Conselleiro Sanidade para que sexa el o que explique ante os alcaldes da comarca os efectos do anteproxecto da Lei de Saude elaborada pola Xunta.

Gonzalo Durán respondeu así esta mañá ás críticas do PSOE de Vilanova asegurando que non foi convidado á reunión cos representantes políticos convocada a pasada semana pola xunta de persoal do Hospital do Salnés.

O rexedor acusa á Xunta de Persoal de defender os seus propios intereses pero non os dos veciños e responsabiliza á plantilla do centro hospitalario do interés que, segundo asegura, manifestan moitos veciños de ser atendidos en Montecelo.

A Fundación GaliciAme, que dirixe a cambadesa Merchi Alvarez, realiza unha terceira edición das Xornadas de Convivencia de Familias afectadas pola Atrofia Muscular Espinal.

Un ano máis, unha ducia de familias procedentes de diversos lugares de España reuniranse dende este xoves ao domingo no colexio Salesianos de Cambados para compartir impresións e experiencias.

Unha iniciativa financiada desta volta por La Caixa e na que tamén colabora o Concello de Cambados

Dentro das actividades programadas encóntrase unha xornada de marisqueo guiada por Gimatur, para o que se contará con cadeiras anfibias cedidas por Protección Civil de Vilagarcía e O Grove.

Os detalles explicábaos esta mañá Merchi Alvarez durante a presentación das Xornadas, acompañada polo director do colexio Salesianos, José Rodriguez Pacheco, o representante de La Caixa, Borja Sabadel, e o concelleiro de Servizos Sociais, Tino Cordal, nun acto que recollemos en AROUSA PONTEVEDRA DÍA A DIA.