@s 9 alumn@s que participaron no curso de drons que organizou o Concello de Vilanova finalizan estes días a súa formación, na que durante 1 mes puideron ter as primeiras tomas de contacto con estes dispositivos aéreos non tripulados.

Os coñecementos que adquiriron serviranlles para actuacións de mantemento de bateas, salvamento marítimo e medicións dos niveis do estado das augas.

Así o explicaba esta mañá o profesor do curso, Jorge García, nunha rolda de prensa acompañado do alcalde Gonzalo Durán, que recollemos en AROUSA PONTEVEDRA DIA A DIA.

Cambados recibirá preto de 70.000 euros como aportación da Deputación ao programa da Cidade Europea do Viño.

A presidenta provincial, Carmela Silva, e a alcaldesa de Cambados, Fátima Abal, asinaron esta mañá o protocolo de colaboración entre ambas institucións que, en principio, inclue preto de 10 actividades promovidas dende o goberno provincial ao longo deste 2017.

Eventos sobre a Igualdade no sector vitivinícola, deportivos como a Final da Copa Deputación Feminina, un Festival Rías Baixas adicado á Cidade do Viño, unha exposición no Paseo Marítimo de Cambados da Escola de Cantería, que tamén cederá unha lagareta con botellas de pedra ao Concello, ou xornadas de Enoturismo, Novas tecnoloxías (DepoTic) e senderismo (DepoAndaina) son as actividades xa previstas.

Así as detallaba Carmela Silva no acto de sinatura que recollemos en AROUSA PONTEVEDRA DIA A DIA.

A Xunta investirá 23 millóns de euros na mellora do saneamento de Arousa ata o ano 2021, 17 millóns nos concellos do marxe sur da ría.

O anuncio facíao esta mañá a conselleira de Medio Ambiente, Beatriz Mato, durante unha visita á EDAR de Ribadumia, con motivo do Día Mundial da Auga, na que participou un grupo de alumnos do IES Cabanillas de Cambados.

Dentro das actuacións previstas encóntrase a ampliación de estación de bombeo de O Piorno, entre Oubiña e Cabanelas e a instalación de 2kms de tubería nova dende Oubiña á depuradora de Ribadumia.

O importe da obra estímase en 800.000 euros, financiados con fondos europeos.

Asimesmo, se inclue a construcción da nova tubaxe soterrada de subministro de auga potable ao Grove no tramo comprendido entre Vilalonga e O Bao, cun orzamento estimado de 1,8 millóns de euros.

A Conselleira tamén reclamou a responsabilidade de Concellos e empresas co fin de evitar os verquidos, nunhas declaracións que recollemos en AROUSA PONTEVEDRA DIA A DIA.

Hoxe en Arousa Pontevedra Día a Día falamos con Lidia Salgueiro, concelleira de Festas e Cultura de Poio sobre o peche do Entroido co Enterro do Galo Fodorico e a valoración de todo un mes de actividades.

Tamén abordamos diversos temas culturais, como a presentación do libro de Montse Fajardo, o xoves 23, unha exposición sobre Patrimonio e Arqueoloxía o 24 e o concurso de Monólogos.

Cambados e Ribadumia únense para realizar melloras nos polígonos do Salnés.

Ambos gobernos redactaron un proxecto conxunto para solicitar da Xunta unha subvención de 180.000 euros e poder finalizar as actuacións xa realizadas e iniciar outras.

En Cambados, o Concello pretende rematar a sinalización horizontal e vertical, dotar os viais con nomes de mulleres relevantes de Galicia, marcar os aparcamentos e crear unha senda dende a entrada do polígono Sete Pías ata o de Cabanelas mellorando a imaxe e a seguridade vial do entorno.

En Ribadumia, as obras centraranse en finalizar as beirarrúas.

Como actuación conxunta, instalarase un totem led na entrada de cada parque coa información das empresas ubicadas.

O importe solicitado para Ribadumia é de 103.000 euros e para Cambados 76.000 euros.

Unha vez conseguida a subvención, as obras terán que estar rematadas antes do 15 de outubro.

Os detalles explicábanos os Concelleiro de Cambados e Ribadumia, Xurxo Charlín e Enrique Oubiña, nunha rolda de prensa que recollemos en AROUSA PONTEVEDRA DIA A DIA.

O PP de Sanxenxo denuncia que o tripartito retén información que a oposición ten solicitado en diferentes ocasións.

O grupo popular cuestiona, por este motivo, a transparencia prometida polo executivo municipal ao inicio da lexislatura.

Así o explicaba esta mañá o concelleiro Marcos Guisasola nunha rolda de prensa que recollemos en AROUSA PONTEVEDRA DIA A DIA.

O Concello de Vilanova comeza a buscar a financiación para poder realizar as excavacións arqueolóxicas no entorno de o Campanario de Cálogo.

Trala autorización conseguida dos propietarios das fincas para realizar os traballos , agora o goberno local tentará conseguir as partidas económicas necesarias das diferentes administracións.

De principio, xa se prevé que os achádegos poidan descubrir feitos importantes da historia antiga do municipio e da comarca.

Así o explicaban esta mañá a arqueóloga Marta Pedrouzo e o alcalde Gonzalo Durán durante unha visita ao entorno do Campanario de Cálogo que recollemos en AROUSA PONTEVEDRA DIA A DIA.

O Concello de Cambados recuperou a praia de Sartaxes en Castrelo para uso dos veciños, mediante unha actuación de acondicionamento do areal por importe de 6.000 euros.

Os traballos incluiron a construcción dun muro de contención que xa se tentara realizar polo anterior goberno municipal pero que daquela carecía dos permisos correspondentes.

A Concellería de Obras e Servizos tamén proxecta diversas obras de mellora de camiños nas parroquias de Vilariño, Castrelo e Corvillón a través do Plan Concellos da Deputación.

Así o explicaba esta mañá o Concelleiro de Obras, José Ramón Abal, nunhas declaracións que recollemos en AROUSA PONTEVEDRA DIA A DIA.

O Parador de Cambados acolleu esta mañá a presentación das botellas xoia de “Leonor”, un Albariño en botella de luxo, con cristais de Swarovski, que pon no mercado Rita Silva, unha emprendedora de Barro.

As unidades da primeira añada poranse á venda a un prezo de entre 120 e 500 euros pero tamén fabricará outras botellas máis simples para paradores e restaurantes Michelin por 45 euros.

Así nolo contaba para AROUSA PONTEVEDRA DIA A DIA a promotora , Rita Silva, durante a presentación da iniciativa, que contou coa presencia da alcaldesa de Cambados Fátima Abal.

O comercio de Cambados pon en marcha a súa campaña de primavera, que este ano nos da “1.300 razóns para sorir”.

Con este lema, a Asociación Zona Centro quere incentivar as compras nos locais asociados nunha campaña que este ano vai ser máis longa que as habituais, xa que se prolonga dende o Día do Pai ata o Día da Nai.

Repartiranse 1.300 euros en vales compra que se distribuirán en diferentes cantidades, e inclue un vale degustación de 100 euros en conmemoración da Cidade Europea do Viño.

Serán 60.000 os boletos que se poñan en circulación entre todos os comercios asociados e o sorteo realizarase o 12 de maio.

Os detalles explicábaos esta mañá o presidente de Zona Centro, Juan Rey, nunha rolda de prensa acompañado da alcaldesa Fátima Abal e dos concelleiros de Enoturismo e Servizos Sociais, que recollemos en AROUSA PONTEVEDRA DIA A DIA.