CAMBADOS VIVEIRO E XORNADAS

O viveiro empresarial de Cambados empezará a funcionar o próximo 1 de xaneiro.

A data desvelábaa esta mañá o concelleiro de Promoción Económica, Xurxo Charlín, que tamén avanzou que nas instalacións do Centro Loxístico do Polígono 7 Pías poderán establecerse 8 negocios e un centro industrial.

As solicitudes para acceder a unha destas oficinas poderán rexistrarse a partir do vindeiro 8 de novembro.

O concelleiro de Promoción Económica de Cambados desvelaba os datos na presentación das I Xornadas para Emprendedores que se celebrarán os días 23 e 24 de outubro en Exposalnés.

O obxectivo desta iniciativa é que os novos emprendedores coñezan de principio a fin os pormenores da creación dun negocio ou empresa a través do que lles conten técnicos do IGAPE, representantes de entidades financeiras, expertos en redes sociais do taller formativo da Deputación, e expertos en leis do gabinete xurídico Miguelez e Asociados de Cambados

De tal xeito que recibirán asesoramento sobre plans de negocio e estudio de viabilidade, cómo financiar o seu proxecto, entorno xurídico, bonificacións na seguridade social e cooperativismo.

Os detalles destas xornadas recollémolos en AROUSA PONTEVEDRA DIA A DIA

A comarca do Salnés recibirá máis de 16 millóns de euros o ano que ven dos Orzamentos da Xunta, que o goberno galego califica como os “orzamentos da recuperación”

A deputada do PP Marta Rodríguez fixo este mediodía na sede da formación en Vilagarcía a valoración das contas autonómicas para 2016 e con ela falamos en AROUSA PONTEVEDRA DIA A DIA.

A Deputación ordenará a empresa adxudicataria da reforma do pabillón do IES Ramón Cabanillas que realice un estudio para avaliar a situación das instalacións, que volve presentar goteiras pese os traballos de mellora realizados, e se encargue da súa reparación.

Foi un dos moitos asuntos abordados esta mañá na reunión de traballo que mantiveron os representantes do goberno local de Cambados, encabezados pola alcaldesa Fátima Abal, coa Presidenta da Deputación Carmela Silva.

Tamén abordaron a futura contratación de persoal para o Centro de Día, así como a continuidade do Plan de Obras e Servizos da Deputación para o ano que ven, que permitirá a contratación de novos desempregados para Cambados en periodos de maior necesidade.

Asimesmo, o cuatripartito solicitou a mediación de Carmela Silva co Presidente da Xunta para conseguir axudas económicas destinadas ós traballadores do mar.

Trala longa reunión de traballo, a alcaldesa Fátima Abal anunciou que as obras de sustitución da cuberta da piscina municipal comezarán en primavera e que as oficinas da Mancomunidade do Salnés, actualmente nun deteriorado edificio do centro, serán trasladadas a Exposalnés.

Todos os detalles recollémolos en AROUSA PONTEVEDRA DIA A DIA.

O prezo do solo no polígono de Baión en Vilanova redúcese un 25% para uso industrial e un 35% para o sector terciario.

Así se establece no convenio asinado esta mañá entre o Concello de Vilanova e a empresa pública do Solo Empresarial do Atlántico (SEA), participada polo Minsterio de Fomento e a Xunta.

A Ministra de Fomento, Ana Pastor, presidiu o acto de sinatura deste convenio que permitirá ó Concello actuar como axente de comercialización das 49 parcelas do polígono de Baión que se beneficiarán desta reducción de prezos.

Deste xeito, preténdese axilizar a tramitación da venda de parcelas do parque vilanovés, que nestes momentos presenta un nivel de ocupación moi baixo, segundo recoñecía a presidenta de SEA, Lucía Molares.

A intermediación do Concello de Vilanova canalizarase a través do Centro de Desenvolvemento Local, (CDL), creado recentemente no Pazo de Vista Real co obxectivo de ser a plataforma de apoio integral ás empresas para informar a todos aqueles empresarios que queiran implantarse no polígono de Baión, ou en calquera outra área industrial do municipio.

O CDL ofrecerá información sobre as parcelas, así como sobre as distintas axudas ás que se poden optar, facilitando a xestión das mesmas ante os organismos correspondentes.

Tralo acto de rúbrica, a Ministra animou ós empresarios a instalarse en Vilanova porque “o polígono de Baión está situado nunha zona estratéxica e en Vilanova hai estabilidade política, e non incertezas”.

O documento asinado este mediodía en Vilanova trátase do primeiro destas características rubricado por un concello, tal e como explicaba esta mañá a Ministra de Fomento, Ana Pastor, na rolda de prensa na que estivo acompañada polo alcalde Gonzalo Durán e pola presidenta de SEA, Lucía Molares.

En AROUSA PONTEVEDRA DIA A DIA recollemos as declaracións de cada un deles.

O que, tralo pleno frustrado de onte, sigue sendo presidente en funcións da Mancomunidade do Salnés, Gonzalo Durán, está disposto a seguir dialogando co resto das formacións para chegar a un acordo que permita a elección do novo presidente no próximo pleno, ainda sen data.

Gonzalo Durán ofreceu esta mañá en rolda de prensa o seu punto de vista do que aconteceu na sesión plenaria na que, finalmente, se produciu un empate entre PSOE e PP ó absterse ós tres grupos de Independentes de Sanxenxo (SAL), Ribadumia e Meaño e que impediu o nomeamento do socialista José Antonio Cacabelos, alcalde de O Grove, como novo presidente.

Ademáis, Gonzalo Durán desvelou que chamará ós representantes dos distintos concellos que conforman a Mancomunidade para tentar consensuar o presuposto do organismo e evitar o parálise da entidade comarcal.

O alcalde de Vilanova explicaba en rolda de prensa a súa opinión do que aconteceu no pleno de onte.

E mentres dende o Grove o alcalde José Antonio Cacabelos mantén silencio, dende Sanxenxo, agárdase que durante o día o alcalde Gonzalo Pita emita un comunicado co seu posicionamento

Os traballadores do mar desempregados da comarca de Arousa poderán ser recolocados noutros postos de traballo a través dun plan de recualificación que porá en marcha o colectivo UPTA en colaboración, de momento, con catro concellos arousáns:Cambados, Vilagarcía, A Illa e O Grove.

Nesta iniciativa, na que se agarda tamén a colaboración da Deputación de Pontevedra, os mariñeiros que actualmente se encontren en situación de desemprego recibirán formación específica para os postos de traballo que demanden as empresas da provincia.

Beneficiaránse de este plan 500 mariñeiros da provincia, escollidos polos Servicios de Emprego, dos que máis do 60% serán da ría de Arousa, xa que é onde se rexistra o maior número de actividade do mar.

Ademáis da formación específica, o colectivo UPTA, proporcionará os coñecementos necesarios para a creación de autoemprego, e realizará un seguimento das empresas para axudar a que o negocio saia adiante.

Nesta acción, poderán participar tanto os traballadores do mar que queiran poñer en marcha un novo negocio como outros emprendedores dos distintos sectores de Cambados.

O Plan de Recualificación para traballadores do mar, que aínda se atopa en fase de programación, está financiado nun 60% polos Fondos Europeos de Adaptación á Globalización e terá un periodo inicial de dous anos que comezará a partir do vindeiro ano.

O Concello de Cambados xa se sumou a este proxecto, co que confía conseguir que os mariñeiros desempregados do municipio poidan acceder a outros postos de traballo e esto axude a potenciar a economía local.

O Plan de Recualificación para os traballadores do mar foi presentado esta mañá en Cambados, polo representante de UPTA, Enrique Abad, acompañado da alcaldesa, Fátima Abal, e do concelleiro de Promoción Económica, Xurxo Charlín, nunha rolda de prensa que escoitamos en AROUSA PONTEVEDRA DIA A DIA.

A Deputación respalda ás aspiracións do concello de Caldas para potenciar o termalismo e o Camiño Portugués a Santiago.

É unha das conclusións da visita que realizou esta mañá a presidenta provincial, Carmela Silva, dentro da ronda de encontros institucionais que está a manter cos alcaldes da provincia dende a súa chegada á Deputación.

Os proxectos que se pretenden dende Caldas obtiveron o total apoio por parte de Carmela Silva, que tamén aludiu que, deste xeito, coas aportacións dos concellos, ponse en marcha un plan global da provincia a nivel turístico.

O Concello pretende crear unha asociación de municipios do Camiño Portugués, conseguir que se declare patrimonio da humanidade e organizar novas actividades co Instituto Cervantes.

En canto ó termalismo, o punto principal é conseguir o respaldo da Deputación para poder realizar o proxecto das Pozas da Tofona.

A maiores destes temas, a Presidenta Provincial tamén anunciou que mediará ante o presidente da xunta sobre a situación do centro de saiar para evitar a imposición do copago e anunciou que o organismo provincial axudará ó colectivo ainda que a lei non o permita.

Conclusións dunha visita que recollemos en AROUSA PONTEVEDRA DIA A DIA.

O obradoiro Emprega Salnés promovido pola Mancomunidade do Salnés púsose en marcha esta mañá na súa cuarta edición.

Dende hoxe e durante 11 meses 100 alumnos recibirán formación en cursos de contabilidade, inglés, informática, técnicas de venta e comercialización de productos da comarca e creación de blogs de venta.

Trátase dunha iniciativa para mellorar a empregabilidade e proba delo e que na pasada edición

81 personas encontraron traballo, 65 delas con contratos de 3 meses.

Así se constatou esta mañá na presentación do obradoiro no Auditorio de Vilagarcía, por parte do xerente da Mancomunidade do Salnés, Ramón Guinarte, Un acto inaugural no que estiveron presentes o Presidente en funcións da Mancomunidade, Gonzalo Durán, a teniente de alcalde de Ribadumia, Mar Moimenta, os Concelleiros de Vilagarcía Tania García e Lino Mouriño e a alcaldesa de Meaño, Lourdes Ucha.

En AROUSA PONTEVEDRA DIA A DIA recollemos o momento de apertura do Emprega Salnés IV.

A asociación de comerciantes Zona Centro en colaboración co Concello de Cambados, organiza o primeiro desfile para presentar a colección de outono - inverno da moda cambadesa, co fin de promocionar unha vez máis o comercio local.

Os 35 modelos que participan teñen idades comprendidas entre os 4 e os 57 anos e son veciños de Cambados e de outros concellos da comarca.

Todos eles lucirán roupa para todas as idades, lencería, complementos, zapatos, e incluso peinados e tocados para estar elegante en calquera evento.

No desfile de moda participan 15 comercios da vila e celebrarase o vindeiro domingo día 18 ás 18:00 no Salón Peña de Cambados.

O evento terá unha duración de dúas horas nas que ademáis de mostrar a moda de outono-inverno tamén estará amenizado con actuacións humorísticas e bailes de salón.

Todos os detalles do evento foron presentados esta mañá nunha rolda de prensa na que estiveron o concelleiro de promoción economica, Xurxo Charlín, o Presidente de Cambados Zona Centro, Juan Rey, e o organizador do Desfile, Hugo Andrade e que escoitamos en AROUSA PONTEVEDRA DIA A DIA.

Vilanova pon en funcionamento xa este mércores, coa celebración dunhas xornadas de internacionalizaciòn destinadas ás empresas, o novo Centro de Desenvolvemento Local que comezará a funcionar nunha das novas dependencias do remodelado Pazo de Vista Real.

O goberno local aprobou esta mañá en comisión de goberno a creación desta plataforma que dará apoio integral para todos os empresarios que estean interesados en buscar e adquirir solo no polígono industrial de Baión.

O novo Centro de Desenvolvemento Local é posible a través de un convenio de colaboración entre o Concello de Vilanova e Suelo Empresarial del Atlántico (SEA), que se asinará o vindeiro luns 19 de outubro, coa presencia da Ministra de Fomento Ana Pastor.

O CDL de Vista Real asesorará ás empresas que queiran implantarse no polígono de Baión, informándolles de datos concretos de cada parcela, así como de subvencións ou liñas de axudas dispoñibles.

No acto de sinatura, tamén estará presente a presidenta do SEA, Lucía Molares.

Así o corroboraba esta mañá o alcalde de Vilanova Gonzalo Durán, nunha rolda de prensa que recollemos en AROUSA PONTEVEDRA DIA A DIA.