Podcast Radio Cerna

A responsable da consulta mongráfica de asbestose no Hospital Arquitecto Marcide de Ferrol, Carme Diego Roza, fala para Radio Cerna para explicar as conclusións da súa tese de investigación, a primeira que trata en todo o Estado a relación entre o amianto e o cancro de pulmón e pleura. En concreto, a súa análise céntrase na comarca de Ferrol e nos extraballadores dos estaleiros de Astano, os máis afectados polo contacto con este mineral. O número de mortes ou patoloxías derivadas do conctacto co amianto en Ferrolterra é difícil de calcular, pero o 70% dos antigos empregados de Astano poderían estar afectados.

Coñece as novidades que deixou esta semana no eido ambiental galego, aquí, en Radio Cerna!

A pasada fin de semana, o concello lugués de Friol viviu unha das batidas de lobo máis rocambolescas que se teñan dado en Galiza. Saldouse cun can morto, confundido cun lobo, e ameaza con ter unha segunda parte. Neste espazo de Radio Cerna, analizamos o acontecido coa entidade ecoloxista ADEGA e achegamos a valoración dos feitos do alcalde de Friol, Xosé Ánxel Santos Sánchez. O acontecido promoveu a campaña ecoloxista contra novas batidas de lobos en Friol: https://secure.avaaz.org/es/petition/Xunta_de_Galicia_Stop_a_nova_batida_de_lobo_en_Friol/?pv=3

Programas relacionados: O lobo, autor ou vítima do conflicto?

O arquitecto vigués Alexandre Mouriño desenvolve unha proposta de rede ciclista para a cidade de Vigo, deseñando unha traza de máis de 50 quilómetros de vías ciclistas que evita pasar polas pendentes máis pronunciadas. Mouriño tamén crea unha ferramenta informática que permite medir a aptitude ciclista de calquera vía urbana en función de varios criterios, non só topográficos.

As novas ecoloxistas e ambientais de Galiza desta semana están recollidas neste espazo de Radio Cerna. Non as perdas!

Aparecen as primeiras reaccións ao documento borrador das Directrices da Paisaxe de Galiza, agora en exposición pública, ata o mes de marzo. Colectivos como O Petón do Lobo, Cova Crea, Arco Iris ou Amigos/as dos Bosques xa as cualificaron de paripé, timo ou instrumento desproteccionista, etc. Critican que non se poña límites ás minas a ceo aberto, aos parques eólicos, ás liñas eléctricas ou á eucaliptización nas novas áreas de especial protección paisaxística.

ADEGA vén de outorgar os premios Osíxeno e Dioxina 2016 que recoñecen as mellores e peores actuacións ou actitudes ambientais durante ese ano. Tamén concede un premio Osíxeno de Honra ao expresidente de ADEGA e experto en contaminación atmosférica en Galiza, Ramón Varela Díaz.

Se queres coñecer a actualidade ambiental galega, este é o teu espazo de radio! Hoxe, facemos repaso das novas ambientais máis destacadas da última semana.

O proxecto Life "Lugo + biodinámico"pretende, de aquí a 2020, promover o urbanismo sostible, a recuperación de espazos naturais en zonas industriais, potenciar a biodiversidade vexetal propia, a castaña e a madeira de calidade. Este proxecto Life é unha das 27 propostas municipais seleccionadas pola UE para loitar contra a mudanza climática.

O imposto ao sol e o decreto do autoconsumo non está a frear o crecemento exponencial que nos últimos anos ten experimentado Galiza con respecto á instalación de paneis solares fotovoltaicos para a xeración de enerxía de autoconsumo. A galega EDF Solar é a empresa líder da instalación fotovoltaica para autoconsumo de todo o Estado. Con ela abordamos os efectos da anunciada posta en aplicación do imposto ao sol ou a peaxe obrigatoria para as instalacións eléctricas de autoconsumo.