Podcast Radio Cerna

As "Enfermidades Infecciosas Emerxentes" están a poñer en risco as poboacións galegas de hérpetos, de réptiles e anfibios. Estas doenzas que xa supuxeron a extinción repentina dalgunhas especies noutros lugares de Europa, está a crear grandes dificultades para as píntegas e pintafontes galegas. ADEGA, AHE e SGHN veñen de organizar unhas xornadas para dar a coñecer o problema e presentar un protocolo de prevención para que a sociedade poida axuda a frear o problema.

O proxecto Batefogo é unha iniciativa de recente constitución, promovida por varias entidades e persoas relacionadas coa educación ambiental e as ciencias naturais, que pretende implicar á cidadanía galega na prevención dos lumes forestais. O obxectivo é conseguir que os incendios deixen de ser concebidos como "elemento cultural" e que a sociedade sexa realmente partícipe na prevención dos lumes. Un dos seus promotores explícanos en que consiste e cal vai ser a metodoloxía a aplicar.

Os colectivos ecoloxistas de Galiza fan unha batería de propostas para que os candidatos ás eleccións municipais teñan en conta na súa acción de goberno ou oposición. Son 10 medidas que buscan que os concellos atenda máis do que o están facendo ás cuestións ambientais dos seus municipios. Se queres coñecelas escoita este espazo!

A CIG está a preparar unha Iniacitiva Lexislativa Popular que demande unha tarifa eléctrica especial para Galiza. Como rexión excedentaria en electricidade non está a recibir ningún tipo de compensación e paga os mesmos peaxes que calquera outra comunidade autónoma, pese a que hai zonas do Estado como as Illas, que si resultan beneficiadas polo actual sistema eléctrico. A proposta deuse a coñecer nunha charla sobre o sistema eléctrico español impartida pola CIG en Lugo e organizada pola Área de Cultura da Deputación lucense.

Escoita cales foron as novas de actualidade no terreo ambiental máis destacadas desta semana en Galiza!

Os colectivos ecoloxistas galegos conseguen que a Comisión de Peticións do Parlamento Europeo admita a denuncia sobre irregularidades na política de residuos da Xunta e de Sogama. O PE admite a trámite a denuncia e anuncia que xa comezará a investigar como se están a tratar os residuos en Galiza. O movemento ecoloxista mantén desde hai décadas que o modelo Sogama incumpre tres directivas europeas, reverte a xerarquía de xestión do lixo en Europa e non cumpre cos mínimos de reciclaxe demandandos pola UE.

Poucas veces nos atopamos co privilexio de dispoñer dunha obra audiovisual sobre as loitas ambientalistas de Galiza. "Tesouro de Corcoesto" busca reter na memoria dos espectadores o que significou a chegada do proxecto mineiro da multinacional canadiana Edgewater a Corcoesto. A oposición a este proxecto e a defensa dos recusos naturais, ambientais e da saúde da zona afectada foi un dos grandes fitos ecoloxistas máis recentes. Grazas á mobilización cidadán, o proxecto quedou paralizado, mais tan só supón a punto do icerberg do plan mineiro do actual goberno para Galiza. Así que, moitos "Corcoestos" poden vir tras deste. "Tesouro de Corcoesto" está en plena xira de difusión coa axuda da Área de Cultura da Deputación de Lugo.

Neste espazo de Radio Cerna botamos unha ollada a actualidade ambiental máis destacada dos últimos días. Escóitaa!

A anduriña de cu branco é a ave do ano elixida pola Sociedade Galega de Ornitoloxía (SGO), co gallo de poñer de relevancia a situación de declive que vive esta ave en Galiza. Coñecemos coa SGO as razóns que obrigan a declarar a anduriña de cu branco a "Ave do Ano" galega.

A Unión Europea vén de aprobar unha lei pola que se renacionaliza a decisión de admitir ou prohibir cultivos transxénicos por parte dos países membros. Así Europa "límpase as mans" e deriva toda a responsabilidade sobre transxénicos nos estados. Amigos de la Tierra alerta de que esta nova lei pode ser a vía de entrada a moitas variedades transxénicas que as multinacionais do sector pretenden introducir no mercado e chama a atención sobre o risco que corre a agricultura ecolóxica.