Podcast Radio Cerna

Esta semana tamén foi prolífica en novas de ámbito ambiental. Se queres coñecelas, acompáñanos neste espazo Cerna!

O 80% dos residuos que hai no mar procede do interior, pero a porcentaxe restante xérase nos océanos. Un proxecto europeo no que participa a cooperativa de armadores do porto de Vigo tenta minimizar e reducir ao máximo o lixo xerado a bordo das embarcacións de pesca, promovendo a separación en orixe e favorecendo contedores axeitados ás dimensións das diferentes tipoloxías de barcos. Neste espazo Cerna coñecemos esta iniciativa que implica aos mariñeiros tamén na prevención da contaminación mariña.

O lixo mariño é un problema xeralizado en planeta, por iso son moitas as entidades e colectivos que a través do seu traballo buscan frear o problema, a través da educación ambiental, da ciencia, da sensibilización social... Recentemente, creouse no Estado unha asociación de entidades de todo tipo cuxo obxectivo fundamental é o de aunar forzas contra a problemática ambiental do lixo no mar. ADEGA forma parte deste movemento.

Como todos os venres, en Radio Cerna repasamos a actualidade ambiental galega da semana. Convidámoste a escoitala!

Xa pasou un mes desde que a colección de ourivería do lugués Álvaro Gil regresou ao Museo provincial de Lugo, logo de 14 anos de litixio xudicial. Este patrimonio deixou de estar á disposición da sociedade galega logo de estar depositado durante décadas na Sala do Tesouro do Museo. A súa volta está a ser moi ben acollida.

No Día da Árbore, ADEGA, dentro da campaña "Cousa de Raíces" chama a atención sobre o estado das denuncias realizadas na provincia de Lugo por plantacións ilegais, cambios de uso de terras e incumprimento de distancias. Do máis do milleiro de denuncias presentadas tan só o 16% adquiren sanción.

ADEGA, Mariñapatrimonio e outras 6 entidades culturais reclaman que se recupere o xacemento romano da praia de Esteiro, próximo ás Catedrais (Ribadeo) e que se investigue a arqueoloxía deste monumento natural para saber se se podería tratar dunha antiga mina de ouro romana. As últimas informacións emitidas pola Xunta, de xeito oficioso, anuncian que finalmente se dará autorización para levar a cabo un proxecto de recuperación do xacemento de Esteiro. O vindeiro domingo, 22 de marzo, estas entidades tamén organizan un roteiro para poñer en valor todos estes xacementos da Mariña.

Trata de poñerlle imaxe e voz ao abandono e morte silenciosa do rural galego. A mostra "Os camiños da brétema", promovida polo colectivo poético A Porta Verde do Sétimo Andar e o fotógrafo Vicente Ansola, estará exposta no Museo provincial de Lugo ata finais de mes. A través dela achegarémonos a crúa realidade, pero desde unha perspectiva colorida. María Xosé Fernández do colectivo poético fálanos da raíz, sentido e finalidade desta exposición.

Repasa con Radio Cerna a actualidade ambiental do país e coñece que actividades ambientais se realizarán os vindeiros días no noso territorio.

ADEGA convoca unha actividade de voluntariado ambiental xunto coa Asociación para a Defensa do Val do Liñares, para este sábado 14 de marzo. Este acto de custodia fluvial permitirá á cidadanía loitar contra unha das plantas invasoras máis perigosas que se atopan no noso territorio: as acacias ou mimosa. Neste programa coñeceremos cales son os seus impactos.