Podcast Radio Cerna

Vén de ser aprobada polo Ministerio de Fomento a construción da autoestrada A-76 Ourense-Ponferrada. O proxecto colleu de sorpresa a moitos dos veciños e veciñas da Ribeira Sacra que xa se organizaron en Plataforma para frear a execución da infraestrutura. Coñecemos con eles cales van ser os impactos e a situación na que quedaría a candidatura da Ribeira Sacra a Patrimonio da Humanidade.

Neste espazo daremos conta daqueles alcaldes do PP que tamén andan a buscar unha alternativa a Sogama no eido local. Os rexedores municipais das comarcas do Deza e do Salnés, a maioría do Partido popular, visitaron as instalacións da planta de compostaxe de Lousame para coñecer o seu funcionamento e as súas vantaxes. Tamén andan a explorar experiencias como a compostaxe doméstica, co obxectivo de reducir a xeración de lixo en orixe e tratar a materia orgánica na casa. O alcalde de Lalín, Xosé Crespo, a quen escoitaremos, é un dos rexedores populares que máis aposta nestes momentos por un cambio de modelo.

Neste espazo, repasamos a actualidade ambiental galega da última semana.

Neste espazo escoitamos a algúns dos 90 alcaldes galegos que se negan a pagar o taxazo de Sogama e avogan por un novo modelo de xestión de residuos en Galiza. Perante a negativa da Xunta de compartir a débeda contraída polo modelo da incineración, demandan alternativas máis eficientes ambiental e economicamente.

Descobre as novas que o eido ambiental galego deixou nesta primeira semana de abril en tan só 10 minutos!

O Foro do Camiño Primitivo, do que fai parte ADEGA, vén de recorrer nos tribunais a delimitación oficial do Camiño Primitivo a Santiago. Os preto de 20 colectivos que conforman este Foro consideran que o trazado oficializado é fraudulento, non cumpre coa Lei de Protección dos Camiños e que pon en risco a declaración desta vía histórica como Patrimonio da Humanidade. Esta é a segunda delimitación dos camiños de Santiago que actualmente está xudicializada.

A Xunta, non só ten nas súas mans a paralización das obras do plan de encauzamento do río Sarria, senón que ten a obriga de detelas. É o que reiviindican as organizacións ADEGA e a AGACS (Asociación Galega de Amigos do Camiño de Santiago). Reclaman responsabilidades á D.X. de Patrimonio e á D.X. de Conservación da Natureza por non cumprir a lei e non promover medidas cautelares esixidas pola normativa que son de aplicación no caso da tala de árbores e do derrubo da ponte de Toleiro no centro da localidade sarriana.

Escoita cales foron as novas no eido ambiental máis relevantes na última semana. Aquí en Radio Cerna facémosche un resumo. Escóitanos!

A Fundación Franz Web e a Asociación animalista Libera! están a desenvolver en Galiza a campaña "Circos sen animais". O obxectivo é que os concellos galegos se declares libres de estes espectáculos nos que se usa aos animais como instrumento de traballo. Ademais están a informar á poboación das condicións de sometemento e maltrato ás que se ven sometidos polos seus donos. En Galiza xa hai preto de 10 concellos declarados libres de circos con animais.

A Xunta denega definitivamente a mina de ouro de Corcoesto. O proxecto de Edgewater non cumpre cos requirimentos económicos e técnicos.Os colectivos ecoloxistas amosan unha ledicia cautelosa e a multinacional canadiana ameaza con recorrer a decisión nos tribunais. Neste espazo abordamos as sensacións que deixou este anuncio nalgunhas das plataformas opostas a esta inxente e perigosa explotación dos recursos naturais.