Programi i pasdites

Në këtë episod të podkastit Të Flasim, xhudistja Majlinda Kelmendi, futbollisti Vedat Muriqi, skitarja Kiana Kryeziu dhe artisti Lum Veseli na tregojnë si është ta përfaqësosh Kosovën në botë, lidhjen e tyre me flamurin e himnin e Kosovës dhe vullnetin për ta përmirësuar imazhin e shtetit të tyre jashtë kujfive.

Kosova është ndër vendet evropiane më të rrezikuara nga dezinformimi dhe keqinformimi, sipas Open Sociaty Foundation. Rreziku për keqinformim dhe dezinformim rritet me përdorimin e madh të platformave digjitale. Në Kosovë aktualisht janë rreth 870 mijë përdorues të platformës sociale Facebook, e cila sipas Institutit Kombëtar Demokratik, është kryesorja që kosovarët përdorin për marrjen e informatave lidhur me ngjarjet në vend. Në këtë episod flasim për temat, target-grupet dhe atë se çfarë mund të bëhet lidhur me këtë fenomen.

Chatgpt është sensacioni më i ri në botën e inteligjencës artificiale. Ky aplikacion është i trajnuar që të simulojë bashkëbisedimet, t’iu përgjigjet pyetjeve përcjellëse, t'i pranojë gabimet, të sfidojë qëndrimet jokorrekte dhe të refuzojë kërkesat e papërshtatshme. Në këtë episod të podkastit Të flasim, diskutojmë me njohësin e fushës së teknologjisë, Darsej Rizaj. Ai shpjegon se çfarë është aplikacioni Chatgpt, kujt i konvenon, kujt i prish punë, pse po e "shqetëson edhe gjigantin Google", dhe nëse po e ndryshon botëkuptimin që ekziston për inteligjencën artificiale.

Të gjendura mes ndjenjës së fajit - nëse janë mjaftueshëm të pranishme për familjet e tyre dhe nëse arrijnë t’i menaxhojnë siç duhet përgjegjësitë profesionale - gratë në pozita udhëheqëse ballafaqohen me sfida të vazhdueshme. Në këtë episod të podkastit Libertas, flasim me tri nga këto gra.

Jo pak prindër kanë dilema nëse po i rrisin si duhet fëmijët e tyre. Janë aq shumë gjëra për të menduar, dhe në disa drejtime. Rrëshqitja në prindërim të ashpër është sfidë më vete. Në këtë episod të podkastit, Të flasim, diskutojmë se si manifestohet ky lloj prindërimi te të rinjtë, si mund të luftohen traumat eventuale, por edhe se çfarë duhet të kenë parasysh prindërit.

Historitë e grave të suksesshme në inxhinieri, turizëm, aktivizëm, art e fusha të tjera, i sollëm çdo të shtunë gjatë vitit që lamë pas.

Në këtë episod të Libertas, podkast i Radios Evropa e Lirë, rikujtojmë rrëfimet frymëzuese të disa prej këtyre grave, që janë përgatitur nga gazetarët tanë për rubrikën e përjavshme Femina.

Në episodin e ri të podkastit Të flasim, diskutojmë për bullizmin. Labinot Azemi tregon se si ka qenë i bullizuar gjithë jetën dhe si e mori guximin që të flasë publikisht për këtë gjë. Psikologia Shkurtë Bajgora tregon se çka duhet të kenë parasysh viktimat e këtyre ngacmimeve.

Edonisa Aliu, futbolliste e klubit Feronikel në Ligën e Parë në Kosovë, ka dhjetë vjet karrierë. Por para se t’i bashkohej këtij klubi ajo nuk ka marrë pagë mujore për rreth pesë vjet. Ajo thotë se nuk mund të jetohet vetëm me pagën si futbolliste, derisa vetë ia del falë pozitave zyrtare në klub.

Në javën e fundit të nëntorit, në Kosovë u vranë dy gra. Të dyshuar kryesorë: bashkëshortët e tyre. Si mund të parandalohet kjo dhunë? Si të përballen gratë me dhunuesit? Çfarë duhet të bëjë shteti? E, çfarë shoqëria? Në këtë episod të podkastit Libertas, flasim me Mërgime Kajtazin, avokate nga Kosova me bazë në SHBA. Mërgimja ka qenë edhe vetë viktimë e dhunës së ushtruar nga ish-bashkëshorti i saj.

Në këtë episod të podkastit Të flasim, diskutojmë pse rreth 1 miliard të rinj në botë rrezikojnë të humbin dëgjimin dhe rolin e kufjeve në këtë problem.