Er en la segunda ura Artg musical restain nus tar chant religius. Nus tadlain psalms en diversas versiuns, tranter auter er en chanzuns rumantschas dal 18avel tschientaner.

L'Ensemble Lamaraviglia ha edì quest onn in disc cumpact cun psalms e motettas da la Svizra. Quel sa basa sin ils psalteris genevrins da 16avel tschientaner. L' ensemble vocal chanta er per rumantsch psalms ch'èn vegnids chantads gia l'entschatta dal 18avel tschientaner a Zuoz ed en autras plaivs engiadinaisas. Vinavant udin nus dentant er fitg bellas versiuns da psalms arranschads da cumponists sco Franz Schubert, Giacomo Meyerbeer u er Gion Antoni Derungs.