Regsake

Igna Kynsmith bespreek die volgende regskwessies met Ian Wessels: Die gebruik van vuurwapens op kleinhoewes; vervolgsieke mense wat oor alles wil "prosedeer"; 'n munisipaliteit se plig om skade deur vloedwater te verhoed; veranderings in die hantering van eise teen die staat se pensioenfonds, en wanneer kan 'n ma haar kind se van verander sonder die biologiese pa se toetstemming?

Rina Gunter sluit aan by Ian Wessels en Igna Klynsmith om te gesels oor onregmatige mededinging, handelsmerke en patente.

Wanneer is 'n mens verplig om 'n misdaad te rapporteer? Hoe kan jy jou kriminele rekord weer skoon kry? Wanneer moet die minister toestemming gee vir prospektering en mynbou-aktiwiteite? Igna Klynsmith bespreek ook sterftevoordele uit pensioenfondse.

Igna Klynsmith bespreek 'n dominee se kwelling oor 'n drankwinkel wat langs sy kerk wil open. Wat behels die wetgewing oor die verkoop van tweedehandse goedere, en is dit effektief om bedrog te bekamp? Igna verduidelik ook die belang daarvan om kinders se menings te hoor in hofgedinge tussen hulle ouers oor hulle toesig.

Wanneer is jy verplig om jou huiswerker vir werkloosheidsversekering te registreer? Wie betaal eksekuteursfooie as daar 'n kontanttekort in die boedel is? Is dit nalatig van onderwysers om kinders in die klas sonder toesig te laat? Igna Klynsmith bspreek ook hofsake oor 'n student wat van 'n bewegende trein afgespring het, en die straf van 'n pa, wat sy seun vir 'n rower aangesien en hom doodgeskiet het.

Wat het die onlangse Appèlhofsaak verander aan die definisie van haatspraak? Is dit skending van kopiereg as jy net 'n paar sekondes van iemand anders se liedjie gebruik? Wanneer sal jy aanspreeklik wees as jou werker in die uitvoering van sy pligte deur weerlig getref word? Igna Klynsmith bespreek ook die straf van iemand wat 'n rob geslaan het, en wat oorlas in die burgerreg behels.

Wanneer haar man onverwags te sterwe kom, word die weduwee dikwels uitgebuit in die emosionele tydperk van rou wat daarop volg. Igna Klynsmith gee praktiese wenke waarvoor om op die uitkyk te wees. Hy verduidelik ook wat die verweer van ontoerekeningsvatbaarheid beteken, en bespreek 'n paar regsaspekte ten opsigte van die afdanking van huiswerkers.

Ouer mense skei soms om met 'n veel jonger bokkie te trou - dikwels in gemeenskap van goeder - maar meestal staan hulle gou weer in die skeihof. Kry die jong bokkie noodwendig die helfte van die gemeenskaplike boedel? Igna Klynsmith bespreek ook die probleemareas ten opsigte van kwotasies, en die aanspreeklikheid van kinders vir hulle bejaarde ouers se mediese koste.

Is daar 'n wedersydse onderhoudsplig tussen 'n paartjie wat saamwoon? Wat mag jy aftrek van jou huiswerker se vergoeding? Wat is nodig om laster te bewys, en wat is die verwere daarteen? Daar bestaan geen formaliteite om Krugerrande te koop nie. Kan 'n mens dus die waarde van jou boedel verklein en boedelbelasting spaar deur Krugerrande te koop?

Kan ouers wat op grond van hulle geloof lyfstraf op hul kinders by die huis toepas, vervolg word? Wat gebeur as iemand wat onderhoud betaal, sterf en 'n trust erf sy hele boedel? Watter opsies het 'n ongetroude swanger vrou ten opsigte van die koste van haar swangerskap as die pa weier om iets by te dra totdat vaderskaptoetse gedoen is?