ប្រធានាធិបតី​ថ្មី​របស់​ហ្វីលីពីន លោក Rodrigo Duterte បានមក​បំពេញ​ទស្សនៈកិច្ច​រយៈ​ពេល​​ពីរ​ថ្ងៃ​នៅ​កម្ពុជា។ ក្នុង​ដំណើរ​ទស្សនៈកិច្ច​នេះ កម្ពុជា​និង​ហ្វីលីពីន បាន​ចុះ​ហត្ថលេខា​​លើ​អនុស្សារណៈ​ចំនួន​៤ ​ស្តីពី​វិស័យ​កីឡា ឧក្រិដ្ឋកម្ម​ឆ្លងដែន វិស័យ​ការងារ និង​ទេសចរណ៍ ព្រមទាំង​ការផ្តល់​អាហារ​រូបករណ៍ ៦០កន្លែង​ទៅដល់​សិស្ស​របស់​កម្ពុជា។ ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ​នៅថ្ងៃនេះ គឺ​លោក​បណ្ឌិត ឈាង វណ្ណា​រិ​ទ្ធិ  ​ដែលជា​ប្រធាន​វិទ្យាស្ថាន​កម្ពុជា​សម្រាប់​សិក្សា​យុទ្ធសាស្ត្រ។ លោក​ឈាង វណ្ណា​រិ​ទ្ធិ បាន​អះអាងថា ក្នុង​សម័យ​​របស់​លោក Rodrigo Duterte នឹងមាន​ទំនាក់ទំនង​ការទូត​ល្អ​ឡើងវិញ​បន្ទាប់ពី​កម្ពុជា​បាន​ដក​អគ្គរាជទូត​របស់​ខ្លួន​ចេញពី​ហ្វីលីពីន។

ភ្ញៀវ​ប្រចាំថ្ងៃ​របស់​វិទ្យុបារាំងគឺ ​លោក ​ហ៊ុន ​ម៉ានី ជា​អ្នក​តំណាង​រាស្ត្រ​មណ្ឌល​កំពង់​ស្ពឺ។ អ្នក​នយោបាយ​វ័យក្មេង រូបនេះ ទើប​តែ​ត្រឡប់​មក​ពី​ទស្សន​កិច្ច​នៅ​ប្រទេស​ថៃ ហើយ​លោក​បាន​ប្រាប់​អ្នក​សារព័ត៌មាន​ថា តាម​រយៈ​ទស្សនកិច្ច​នេះ គឺជា​ការ​បើក​ផ្លូវ​វិជ្ជមាន​បន្ថែម​ទៀត ទៅ​ដល់​វិស័យ​សហគ្រិន​ភាព​ និង​ការ​អប់រំ​ នៃ​ប្រទេស​ទាំងពីរ។ ពិសេស​គឺ​និស្សិត​ផ្នែក​កសិកម្ម នឹងអាច​ទៅ​ធ្វើ​កម្ម​សិក្សា​នៅ​ថៃ​កាន់តែច្រើន។

ភ្ញៀវ​​ប្រចាំថ្ងៃ​​របស់​​វិទ្យុ​​បារាំង​​អន្តរជាតិ ​RFI ​នៅ​ថ្ងៃនេះ​ គឺ​​លោក ​អាត់ ធន់​ ប្រធាន​​សហភាព​​ការ​​ងារ​​​កម្ពុជា​(CLC)​។ ​លោក ​អាត់ ធន់ ​ដែល​​បាន​​ចូល​រួម​​នៅ​ក្នុង​​កិច្ច​ពិភាក្សា​​ស្តីពី ​សេចក្តី​​ព្រាង​​ច្បាប់ ​ស្តីពី ​​ការ​កំណត់​​ប្រាក់​​ឈ្នួល​​អប្បរ​មា​​របស់​​កម្មក​រ​​នៅ​លើ​​វិស័យ​ផ្សេងៗ​នៅ​ក្នុង​​ប្រទេស​​​កម្ពុជា ​នៅ​ថ្ងៃ​នេះ ​បាន​​សាទរ​​ចំពោះ​​ឆន្ទៈ​​របស់​​រដ្ឋាភិបាល​​ក្នុង​ការ​​ធ្វើ​​ឲ្យ​​ប្រសើរ​ឡើង​​នូវ​​​យន្តការ​​តម្លើង​​ប្រាក់​​ឈ្នួល​​អប្បរ​មា​​របស់​​កម្មក​រ​ និយោជិត ​ដែល​​គ្រប់​​ដណ្តប់​​លើ​​វិស័យ​​នានា​​​នៅ​ក្នុង​​ប្រទេស​​កម្ពុជា​​រាប់​ទាំង​​វិស័យសំណង់​ សេវាកម្ម ​​កម្មករ​​កាត់ដេរ​​ផង​ដែរ​។ ​ប៉ុន្តែ​​ទន្ទឹម​គ្នា​នេះ ​លោក​​បាន​​ស្នើ​​​សុំ​​ឲ្យ​​រដ្ឋាភិបាល​​ដក​ចេញ​​នូវ​​ចំណុច​​មួយ​ចំនួន ​ពិសេស​​ការ​ដាក់​ទោស​​ធ្ងន់​ធ្ងរ​​ពេក​​លើ​​តំណាង​​​សហជីព​។ ​ជាមួយ​គ្នា​នេះ ​លោក​​អាត់ ធន់ ​បាន​​កត់​សំគាល់​ថា ​តាម​រយៈ​សេចក្តី​​ព្រាង​​ច្បាប់​​​ថ្មី​​នេះ ​នឹង​​អាច​​បញ្ចប់​​ការ​តវ៉ា​​របស់​​កម្មករ​​នៅ​ក្នុង​​ប្រទេស​​កម្ពុជា​បាន​បើការអនុវត្តន៍​បាន​ត្រឹម​ត្រូវ​។

សៀវភៅ “គ្រូធំ” ដែលជា​សៀវភៅ​ប្រមូលផ្តុំ​ទៅដោយ​គំនិត​ទស្សនៈផ្សេងៗរបស់លោក​បណ្ឌិត​កែម ឡី អ្នកវិភាគ​បញ្ហា​សង្គម​និង​នយោបាយ​កម្ពុជា​កំពុង​ចរាចរ​លក់​នៅតាម​តូប​កាសែត និង​បណ្ណាគារ​នានា​នៅក្នុង​ទីក្រុង​ភ្នំពេញ។ លោក​វណ្ណ វិចារ ដែលជា​អ្នកកាសែត​ម្នាក់ គឺជា​អ្នក​រៀបរៀង​សៀវភៅ“គ្រូធំ”នេះ​ឡើង។ នៅថ្ងៃនេះ វណ្ណ សុគន្ធាបាន​អញ្ជើញ​អ្នក​រៀបរៀង​សៀវភៅ​រូបនេះ​មកកាន់​បន្ទប់​ផ្សាយ​របស់​វិទ្យុ​បារាំង​អន្តរជាតិ​ដោយផ្ទាល់​ដើម្បី​បកស្រាយ​ជុំវិញ​ការ​ចងក្រង​សៀវភៅ​នេះ។ លោក​វណ្ណ វិចារ បាន​ប្រាប់ថា ដើម្បី​អាច​បោះ​ពុ​ម្ព​​សៀវភៅ​នេះ​ឡើង លោក​ត្រូវ​កាត់​ប្រាក់ខែ​ខ្លួនឯង​និង​មួយផ្នែក​ទៀត​បានមកពី​ការឧបត្ថម្ភខ្លះៗពី​មិត្តភក្តិ​ដែល​ស្គាល់គ្នា។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នៅ​យប់​នេះ គឺ​លោ​ក​ស្រី ចក់ សុភាព ប្រធាន​​មជ្ឈ​មណ្ឌល​​សិទ្ធិ​​មនុស្ស​កម្ពុជា។ នៅ​ថ្ងៃ​ទិវា​សិទ្ធិ​មនុស្ស​អន្ត​រជាតិ​១០​ធ្នូនេះ លោកស្រី ចក់ សុភាព បាន​​បរិហារ​​ថា ការ​គោ​រព​សិទ្ធិ​មនុស្ស​នៅ​កម្ពុជា​ក្នុង​ឆ្នាំ​២០១៦​មាន​ការ​ធ្លាក់​ចុះ​ខ្លាំង​មែន​ទែន។ ជា​ការ​ធ្លាក់​ចុះ​ដោយ​យោង​ទៅ​លើ​ព្រឹត្តការណ៍​បាញ់​សម្លាប់​លោកបណ្ឌិត កែម ឡី នៅ​កណ្ដាល​​ទី​​ក្រុង​ភ្នំពេញ​និង​ការ​ចាប់​ចងមន្ត្រី​អ​ង្គការសិទ្ធិ​មនុស្ស​ជា​ដើម។ និយាយ​​ថយ​​ក្រោយ​បន្តិច​​លោក​ស្រី ចក់ សុភាព បាន​បញ្ជាក់​ថា មិន​​មែន​​លោក​​ស្រី​​មើល​​ឃើញ​​ការ​​គោរ​ព​​សិទ្ធិ​មនុស្ស​​នៅ​​កម្ពុជា​​មិន​ដែល​ល្អនោះ​ទេ។ ប៉ុន្តែ​​ការ​​គោ​រព​​សិទ្ធិ​​មនុស្ស​​នៅ​កម្ពុជា​ប្រៀប​បាន​​ចរន្ត​មួយ​ឡើង​ចុះ​អញ្ចឹង!

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ​នៅ​យប់​នេះ គឺ​លោកស្រី​វេជ្ជ​បណ្ឌិត ម៉ា សូយ៉ិនដា ជា​ប្រធាន​នាយក​ដ្ឋាន​អប់រំ បង្កា និង​ទប់​ស្កាត់​អំពើ​ពុក​រលួយ​នៃ​អង្គភាព​ប្រឆាំង​អំពើ​ពុក​រលួយ។ នៅ​ថ្ងៃ​នេះ​ គឺ​ជា​ទិវា​ជាតិ-អន្តរជាតិ​ប្រយុទ្ធ​ប្រឆាំង​អំពើ​ពុក​រលួយ​៩​ធ្នូ ហើយ​នៅ​ថ្ងៃ​នេះ​ដែរ គឺ​ជា​លើក​ទី ៦​ហើយ ដែល​កម្ពុជា​អបអរ និង​ប្រារព្ធ​ទិវា​ជាតិ និង​អន្តរជាតិ​ប្រឆាំង​អំពើ​ពុក​រលួយ។ ទាក់​ទង​នឹង​ថ្ងៃ​នេះ​ដែរ លោក​ស្រី​ម៉ា សូយ៉ិនដា បាន​លើក​ឡើង​ថា​កាល​ពី​មុខ​បណ្តឹង​អនាមិក មាន​ច្រើន​ជាង​បណ្តឹង​ចេញ​មុខ ប៉ុន្តែ​ឆ្នាំ​នេះ​មាន​បណ្តឹង​ចេញ​មុខ​ច្រើន​ជាង ដោយសារ​ដែល​ពួក​គាត់​ប្តឹង​ភ្លាម អង្គភាព​ប្រឆាំង​អំពើ​ពុក​រលួយ​អញ្ជើញ​ពួក​គាត់​មក​ភ្លាម ដើម្បី​វិភាគ​ជូន​គាត់។ ក្នុង​ឆ្នាំ​នេះ​ដែរ ACU បាន​បញ្ជូណ ១០​ករណី ទៅ​តុលាការ ដើម្បី​បន្ត​នីតិវិធី ដែល​ករណី​ទាំង​នេះ​ទាក់​ទង​នឹង​ការ​សូក​ប៉ាន់។

កាល​ពី​ដើម​សប្តាហ៍​នេះ ក្រសួង​រ៉ែ​ និង​ថាមពល បាន​ចុះ​ទៅ​ខេត្ត​កោះកុង ដើម្បី​ពិនិត្យ​មើល​រួម​គ្នា​ជា​លើក​ដំបូង​ជាមួយ​នឹង​អង្គការ​សង្គម​ស៊ីវិល លើ​សកម្មភាព​បូម​ខ្សាច់ និង​ផល​ប៉ះពាល់​នានា ទៅ​ដល់​ជីវភាព​រស់​នៅ​របស់​ប្រជាសហគមន៍ និង​ធនធាន​ធម្មជាតិ។ លោក ម៉េង សក្តិធារ៉ា រដ្ឋ​លេខាធិការ​ និង​ជា​អ្នក​នាំ​ពាក្យ​ក្រសួង​រ៉ែ និង​ថាមពល បាន​ប្រាប់​វិទ្យុ​បារាំង​ថា ការ​ចូលរួម​របស់​អង្គការ​សង្គម​ស៊ីវិល​នានា នៅ​ក្នុង​សកម្មភាព​របស់​រដ្ឋ​ដូច្នេះ គឺ​ផ្តើម​ចេញ​ពី​កំណែ​ទម្រង់​របស់​ក្រសួង​រ៉ែ​ និង​ថាម​ពល ដែល​តម្រូវ​ឲ្យ​មាន​ការ​ចូលរួម​ក្នុង​កិច្ចការ​ការពារ​ធនធាន​ធម្មជាតិរ៉ែ ជា​ពហុភាគី។

ភ្ញៀវ​​ប្រចាំថ្ងៃ​​របស់​​វិទ្យុ​​បារាំង​​អន្តរជាតិ ​RFI ​នៅ​ថ្ងៃ​នេះ ​គឺ​​លោក​ សុន ឆ័យ ​ប្រធាន​​ក្រុម​​តំណាង​រាស្ត្រ​​​គណបក្ស​​សង្គ្រោះ​ជាតិ​។ ​ឆ្លើយតប​​នឹង​​សំណួរ​​របស់​​វិទ្យុ​​បារាំង​​អន្តរជាតិ ​RFI ​ជុំវិញ​​​​ការ​វិវត្តន៍​​ស្ថានការណ៍​​នយោបាយ​​នៅ​​កម្ពុជា​​ចុង​ក្រោយ​​នេះ ​លោក ​សុន ឆ័យ ​បាន​​ចាត់​​ទុក​​ថា​ វា​​ទើប​តែ​​ចាប់​ផ្តើម​​ប៉ុណ្ណោះ​។ ​គួរ​​ជំរាបជូន​​ថា ​បន្ទាប់​ពី​​ទទួល​បាន​​ការ​លើក​លែង​​ទោស​​ពី​​ព្រះមហាក្សត្រ​​កាល​ពី​​ថ្ងៃទី​២ធ្នូ ​លោក​ កឹម សុខា ​ប្រធាន​ស្តីទី​​គណបក្ស​​ស​ង្គ្រោះ​ជាតិ​​បាន​​បង្ហាញ​​មុខ​​នៅ​ក្នុង​​កិច្ចប្រជុំ​​រដ្ឋសភា​​នៅ​ថ្ងៃ​នេះ ​និង​​បាន​ស្នើ​​ទៅ​កាន់​​លោក​នាយក​រដ្ឋ​មន្ត្រី ​ហ៊ុន ​សែន ​ឲ្យ​​ដោះ​លែង​​មេឃុំ​​គណបក្ស​​សម រង្ស៊ី ​និង​​មន្ត្រី​​អង្គការ​​សង្គម​​ស៊ីវិល​, ​មន្ត្រី ​គជប ​នៅ​មុន​​ដំណាច់​​ឆ្នាំ​២០១៦​នេះ​។ ​លោក ​សុន ឆ័យ ​ដែល​​បាន​ចាត់​ទុក​​ការ​វិវត្តន៍​​នយោបាយ​​នៅ​ថ្ងៃ​នេះ​​ថា ​ជា​ការ​​វិវត្តន៍​​ដ៏​​លឿន​​នោះ ​បាន​​លើក​ឡើង​ថា ​ជំហាន​​បន្ត​​អាច​​នឹង​មាន​​ការ​ដោះលែង​​មនុស្ស​​​​បន្ថែម​ទៀត​។ ​ទន្ទឹម​គ្នា​នេះ ​លោក​នៅ​តែ​​ជឿជាក់​​លើ​​សម្ព័ន្ធភាព​​លោក​ កឹម សុខា ​និង​​លោក ​សម​ រង្ស៊ី៕

នៅក្នុង​ឱកាស​ទិវាជនពិការកម្ពុជា លើក​ទី១៨ នេះ វិទ្យុ​បារាំង​RFI បាន​អញ្ជើញ​លោក​​ ងិន សៅរ័ត្ន នាយកប្រតិបត្តិ​របស់អង្គការ​ជន​ពិការ​កម្ពុជា​ ធ្វើ​ជា​ភ្ញៀវ​ប្រចាំថ្ងៃ​។ លោក ងិន សៅរ័ត្ន បាន​សាទរ​ចំពោះ​​ការ​ផ្តល់​កន្លែង​រមណីដ្ឋាន​វត្ត​ភ្នំ សម្រាប់រៀប​ចំការ​ប្រគំ​​តន្ត្រី​របស់​ជន​ពិការ​ប៉ុន្តែ​លោក​ស្នើ​សុំ​ឲ្យមាន​៥កន្លែងតែម្តង ​សម្រាប់​ជនពិការទាំង​៥ក្រុម។ ទន្ទឹម​នឹងនេះ លោក ងិន សៅរ័ត្ន នៅតែ​ថ្លែង​ក្តីព្រួយ​បារម្ភ​ចំពោះ​គោលការណ៍​ជ្រើស​រើស​ជនពិការ​ឲ្យ​ធ្វើ​ការ ព្រោះថា ដំណើរ​ការ​ជ្រើសរើស​នៅតែ​មាន​ការ​រាំង​ស្ទះ និង​គួរ​ឲ្យ​សង្ស័យ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ RFI នា​រាត្រី​នេះ គឺ លោក ឡោ រស្មី អ្នក​នាំ​ពាក្យ​ក្រសួង​កសិកម្ម។ នៅ​ក្នុង​បទ​សម្ភាស​ជាមួយ​វិទ្យុ​បារាំង លោក ឡោ រស្មី បាន​លើក​ឡើង​ថា ការ​ចុះ​កិច្ច​សន្យា​កសិកម្ម នឹង​ជួយ​សម្រួល​ឲ្យ​ការ​លក់​ស្រូវ​របស់​កសិករ​កម្ពុជា មាន​លក្ខណៈ​កាន់​តែ​ប្រសើរ និង​បន្ថយ​ហានិភ័យ​ការ​បន្ទាប​តម្លៃ​ផលិត​ផល​កសិកម្ម។ សូម​បញ្ជាក់​ថា អនុក្រឹត្យ​ស្តី​ពី​កិច្ច​សន្យា​កសិកម្ម ត្រូវ​បាន​បង្កើត​ឡើង​តាំង​ពី​ឆ្នាំ ខែ កុម្ភៈ ឆ្នាំ ២០១១។