ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ​នៅ​រាត្រី​នេះ គឺ​លោក គល់ បញ្ញា នាយក​ប្រតិបត្តិ​ខុមហ្វ្រែល​ ដែល​ធ្វើ​ការ​ផ្នែក​បោះឆ្នោត។ លោក គល់ បញ្ញា បាន​រិះគន់​ការ​អនុម័ត​វិធានការ​ពិន័យ​លើ​ក្រុម​អ្នក​តំណាង​រាស្ត្រ​រូប​ណា ដែល​អវត្តមាន​ដោយ​លោក​ចាត់​ទុក​ថា​ផ្ទុយ​នឹង​រដ្ឋ​ធម្មនុញ្ញ។ លោក​ថា ការ​អនុម័ត​បែប​នេះ គឺ​មាន​តែ​ប្រទេស​កាន់​របប​យោធា​ ឬ​ប្រទេស​មិន​កាន់​លទ្ធិប្រជាធិបតេយ្យ​តែ​ប៉ុណ្ណោះ។ សម្រាប់​លោក គល់ បញ្ញា សភា​កម្ពុជា​គួរ​មាន​វិធានការ​ពារ​សុវត្ថិភាព​តំណាង​រាស្ត្រ​ប្រសើរជាង​មាន​វិធានការ​ពិន័យ។

ជុំវិញ​ការ​រិះគន់​របស់​កញ្ញា កឹម មនោវិទ្យា កូនស្រី​លោក​កឹម សុខា និង​ជា​អនុប្រធាន​ផ្នែក​កិច្ចការ​សាធារណៈ​គណបក្ស​សង្គ្រោះ​ជាតិ ទៅ​លើ​លោក សម រង្ស៊ី ប្រធាន​គណបក្ស​របស់​ខ្លួន​ម្តង​ហើយ​ម្តង​ទៀត ត្រូវ​លោក​ហ៊ីង សុខសាន ប្រធាន​ចលនា​យុវជន​គណបក្ស​សង្គ្រោះ​ជាតិ​ចាត់​ទុក​ថា​ជា​ការរិះ​គន់ បែប​ស្ថាបនា មិនមែន​ជា​ការ​រិះគន់​បែប​មួល​បង្កាច់​នោះទេ​។ មេដឹកនាំ​ចលនា​យុវជន​គណបក្ស​ប្រឆាំង​រូប​នេះ បញ្ជាក់​ថា ការ​រិះគន់​គ្នា​របៀប​នេះ គឺ​ជា​សេរីភាព​និង​ប្រជាធិបតេយ្យ​នៅ​ក្នុង​បក្ស ព្រម​ទាំង​បដិសេធ​ចោល​ទាំង​ស្រុង​នូវ​ការ​បែកបាក់​ផ្ទៃ​ក្នុង​បក្ស។

កិច្ច​ប្រជុំ​ស្តីពី​ប្រទេស​មហា​អនុ​តំបន់​ទន្លេ​មេគង្គ ដែល​បាន​បើក​ធ្វើ​ឡើង​នៅ​វៀតណាម បាន​បញ្ចប់​ហើយ​នៅ​ថ្ងៃ​ទី​ ២៦​តុលា​នេះ។ ២០១៦​នេះ គឺ​ជា​កិច្ច​ប្រជុំ​លើក​ទី​ ៨ ដែល​ប្រទេស​ទាំង​ ៤​គឺ​កម្ពុជា ឡាវ ម៉ីយ៉ាន់ម៉ា ឬភូមា និង​វៀតណាម ដែល​គេ​អាច​ហៅ​ជា​ភាសាអង់គ្លេសCLMV បាន​បើក​កិច្ច​ប្រជុំ​ជា​ប្រចាំ។ ដូចនេះ​ភ្ញៀវ​ប្រចាំថ្ងៃ​របស់​វិទ្យុ​បារាំង​យើង​នៅ​ថ្ងៃនេះ គឺ​លោក ឈាង វណ្ណារិទ្ធិ ប្រធាន​វិទ្យាស្ថាន​កម្ពុជា​សម្រាប់​ការ​សិក្សា​យុទ្ធសាស្ត្រ និង​អ្នក​សិក្សា​ស្រាវជ្រាវ​តំបន់​អាស៊ី។ អ្នក​ជំនាញ​រូប​នេះ បាន​អះអាង​ថា​កិច្ច​ប្រជុំ​ CLMV គឺ​ជា​កិច្ច​ប្រជុំ​ ដែល​ផ្តោត​លើ​ការ​ពង្រឹង​វិស័យ​សេដ្ឋកិច្ច ដើម្បី​កាត់​បន្ថយ​គម្លាត​រវាង​ប្រទេស​អាស៊ាន​ចាស់ និង​អាស៊ាន​ថ្មី​ដែល​មាន​កំណើន​សេដ្ឋកិច្ច​ខ្ពស់។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​នៅ​ថ្ងៃ​នេះ​ គឺ​លោក​ចាន់ យុត្ថា អ្នក​នាំ​ពាក្យ​ក្រសួង​ធន​ធាន​ទឹក។ អ្នក​នាំ​ពាក្យ​រូប​នេះ នឹង​ផ្តល់​តុល្យការ​ចុង​ក្រោយ​ស្តីពី​ទឹក​ជំនន់​ទឹក​ភ្លៀង​កម្ពុជា ដែល​បាន​ធ្វើ​ឱ្យ​ប៉ះពាល់​ទៅ​ដល់​ ១៣​ខេត្ត-រាជធានី។ បើ​ទោះ​បី​ជា​ទឹក​ជំនន់​បាន​ធ្វើ​ឱ្យ​បាក់​ទំនប់​ ខូច​ខាត​ផ្លូវ​ជាតិ រលំ​ផ្ទះ និង​ខូចខាត​ដំណាំ​ស្រូវ​ជា​ច្រើន​រយ​ហិកតា ក៏​ដោយ ក៏​អ្នក​នាំ​ពាក្យ​រូប​នេះ បាន​អះអាង​ថា រដ្ឋ​អំណាច​បាន​គ្រប់​គ្រង​ទឹក​បាន​ល្អ​ដោយសារ​តែ​មាន​ហេដ្ឋារចនា​សម្ព័ន្ធ​ទឹក​ជា​ច្រើន។ លោក​បាន​សង្កត់​ធ្ងន់​ថា បើ​មិន​ដូច្នេះ​ទេ ទឹក​ជំនន់​ចុង​ក្រោយ​នេះ នឹង​អាច​បង្ក​មហន្តរាយ​ខ្លាំង​ជាង​នេះ​ឆ្ងាយ​ណាស់។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI គឺ​លោក នេត្រ​ ភក្រ្តា អ្នកនាំពាក្យ​សាលា​ក្តី​ខ្មែរ​ក្រហម។ នៅ​ថ្ងៃ​ទី​២៤ ខែ​តុលា ឆ្នាំ​២០១៦​នេះ អង្គ​ជំនុំ​ជម្រះ​សាលា​ដំបូង​បាន​បើក​សវនាការ​ស្តាប់​ព្យសនកម្មការ​ឈឺចាប់​រង​ទុក្ខ​វេទនា​របស់​ជន​រងគ្រោះ​ទាក់ទង​នឹង​អង្គ​ហេតុ​រៀប​អាពាហ៍ពិពាហ៍​ដោយ​បង្ខំ និង​ការ​រំលោភ​សេព​សន្ថវៈ​នៅ​អំឡុង​ពេល​ នៃ​របប​កម្ពុជា​ប្រជាធិបតេយ្យ នៅ​ក្នុង​សំណុំរឿង​ ០០២/០២ ដែល​មាន​ជន​ជាប់​ចោទ នួន ជា និង​ខៀវ សំផន។ អ្នក​នាំពាក្យ​សាលា​ក្តី​ខ្មែរ​ក្រហម​រូប​នេះ បាន​ថ្លែង​ថា មាន​ភាគី​ដើម​បណ្តឹង​រដ្ឋ​ប្បវេណី​ជាង​ ៦០០​នាក់​ នៅ​ក្នុង​សំណុំ​រឿង​នេះ។ លោក នេត្រ ភក្រ្តា ក៏​បាន​ឲ្យ​ដឹង​ដែរ​ថា សាលាក្តី​ខ្មែរ​ក្រហម​គ្រោង​នឹង​បញ្ចប់​សំណុំ​រឿង​របស់​អតីត​មេដឹកនាំ​ខ្មែរ​ក្រហម ខៀវ សំផន និង​នួន ជា នៅ​ឆ្នាំ ២០១៩ ខាង​មុខ​នេះ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​នៅ​យប់​នេះ ​គឺ​លោក​ជៀម​ សុផលម​ករា ​អ្នក​នាំ​ពាក្យ​ក្រសួង​រៀប​ចំដែនដី ​នគរូបនីយកម្ម និង​សំណង់​។ ឆ្លើយ​តប​នឹង​តម្រូវ​ការ​ផ្ទះ​របស់​ប្រជា​ពលរ​ដ្ឋ​កម្ពុជា​មាន​ការ​កើន​ឡើង​ក្នុងពេល​បច្ចុប្បន្ន​នេះ ​រដ្ឋាភិ​បាល​កម្ពុជា​បាន​គាំទ្រ​ចំពោះ​គម្រោង​ផ្ទះ​ល្វែង ​ដែល​មាន​តម្លៃ​២​ម៉ឺន​៥ពាន់​ដុល្លារ​ ទៅ៣ម៉ឺន​ដុល្លារ​អាមេរិក​ សម្រាប់​ប្រជា​​ពលរ​ដ្ឋ ដែល​មាន​កម្រិត​ប្រាក់​ចំណូល​មធ្យម​ និង​ទាប​។ បើ​តាម​លោក​ជៀម ​សុផល​មករា​ គម្រោង​ផ្ទះ​ល្វែង​រដ្ឋ​ នឹង​ត្រូវ​អនុវត្ត​នៅ​ចុង​ឆ្នាំនេះ​ ដោយ​ភាគី​រដ្ឋាភិបាល​សហការ​ជា​មួយ​ក្រុមហ៊ុន​ ឯក​ជន​។ យ៉ាង​ណាមិ​ញ ​អ្នក​នាំ​ពាក្យ​រូប​នេះ ​មិន​អាច​បញ្ជាក់​ពី​ទីតាំង​ ដែល​គ្រោង​សាង​សង់​ផ្ទះល្វែ​ងរបស់​រដ្ឋ​នេះ​នៅ​ឡើយទេ​ តែ​លោ​​ក​ថា​ក្រុម​ហ៊ុន​ឯក​ជន ​និង​រដ្ឋ ​មាន​កន្លែង​ហើយ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​នា​រាត្រី​នេះ គឺ​លោក Alejandro Gonzalez Davidson ស្ថាបនិក​អង្គការ​​មាតា​ធម្មជាតិ​។ អង្គការ​មាតា​ធម្មជាតិ​ទើប​តែ​រក​បាន​របាយការណ៍​ថ្មី​មួយ​ពី​នាយកដ្ឋាន​ពាណិជ្ជកម្ម​នៃ​ប្រទេស​សិង្ហបុរី អំពី​ពាណិជ្ជកម្ម​ខ្សាច់​ជាមួយ​កម្ពុជា​។ ជា​របាយការណ៍​បង្ហាញ​ថា សិង្ហបុរី​នាំ​ចូល​ខ្សាច់​ពី​កម្ពុជា ៧៣​លាន​តោន ក្នុង​រយៈ​ពេល​៨​ឆ្នាំ​ចុង​ក្រោយ​នេះ​។ ប៉ុន្តែ​តួលេខ​នេះ ខុស​ពី​របាយការណ៍​របស់​កម្ពុជា​ដែល​បញ្ជាក់​ថា បាន​នាំ​ចេញ​ខ្សាច់​ទៅ​សិង្ហបុរី​តែ​ជិត​​៣​លាន​តោន​ប៉ុណ្ណោះ​ក្នុង​រយៈ​ពេល​ដូច​គ្នា។​ បើ​តាម​លោក Alex ភាព​ខុស​គ្នាឆ្ងាយ​ពេក​​​នៃ​របាយការណ៍​នេះ ធ្វើ​ឲ្យ​អង្គការ​មាតា​ធម្មជាតិ​សង្ស័យ​និង​ព្រួយ​បារម្ភ​យ៉ាង​ខ្លាំង​​។

ភ្ញៀវ​ប្រចាំថ្ងៃ​របស់​វិទ្យុ​បារាំង​នៅ​យប់​នេះ​ គឺ​លោក ហង្ស ពុទ្ធា អ្នក​នាំ​ពាក្យ​គ.ជ.ប។ នៅ​ថ្ងៃ​ស្អែក​គណៈកម្មាធិការជាតិ រៀបចំការ​បោះឆ្នោត គ.ជ.ប ដាក់​ឲ្យ​ដំណើរ​ប្រព័ន្ធ​បច្ចេក​ទេស​ថ្មី​មួយ​សម្រាប់​ពលរដ្ឋ ដែល​ចង់​ដឹង​ពី​របៀប​នៃ​ការ​ចុះ​ឈ្មោះ​ និង​ស្វែង​រក​ទី​កន្លែង​ចុះ​ឈ្មោះ​តាម​រយៈ​លេខ​ទូរសព្ទ​១២៨៥។ ឆ្លើយ​តប​នឹង​ចម្ងល់​របស់​វិទ្យុ​បារាំង​លោក ហង្ស ពុទ្ធា ថា​ប្រព័ន្ធ​សួរ​ព័ត៌មាន​ថ្មី​តាម​រយៈ​ខ្សែ​ទូរសព្ទ​នេះ​នឹង​ជំរុញ​ឲ្យ​ពលរដ្ឋ​ទៅ​ចុះ​ឈ្មោះ​បោះឆ្នោត​ឲ្យ​បាន​គ្រប់គ្នា។ និង​កាន់​តែ​មាន​តម្លាភាព​ថែម​ទៀត​ផង។

វត្តមាន​របស់​គម្រោង​រោងចក្រ​កាន់​តែ​ប្រសើរ​នៅ​កម្ពុជា ឬ (Better Factory Cambodia) អស់​រយៈ​ពេល​ ១៥​ឆ្នាំ​កន្លង​ទៅ​នេះ ធ្វើ​ឲ្យ​វិស័យ​កាត់​ដេរ​កម្ពុជា​មាន​ការ​គោរព​ច្បាប់​កាន់​តែ​ប្រសើរ ។ នៅ​ក្នុង​កិច្ច​សម្ភាស​ជាមួយ​វិទ្យុ​បារាំង​ RFI  ប្រធាន​ត្រួត​ពិនិត្យ​លក្ខខណ្ឌ​ការងារ​គម្រោង​រោងចក្រ​កាន់​តែ​ប្រសើរ នៃ​អង្គការ​ពលកម្ម​អន្តរជាតិ (ILO) លោក ជា សុផល បាន​លើក​ឡើង​ថា គម្រោង BFC នេះ​បាន​ជួយ​យ៉ាង​ច្រើន​ដល់​ផ្នែក​ពាក់​ព័ន្ធ​នានា​នៅ​ក្នុង​វិស័យ​ឧស្សាហកម្ម​កាត់​ដេរ​កម្ពុជា និង​មាន​ទំនុក​ចិត្ត​ដល់​អ្នក​បញ្ជា​ទិញ​សម្លៀក​បំពាក់ និង​ស្បែក​ជើង​ធំ​ៗ​ពី​ទីផ្សារ​អន្តរជាតិ។

លោក Jean-David LEVITTE គឺ​ជាទី​ប្រឹក្សា​​ការទូត​​ដ៏​ល្បីល្បាញរបស់​អតីត​ប្រធានាធិបតី​បារាំង និង​ជា​ឥស្សរជនមួយ​រូប​​ដ៏​សំខាន់ ​ក្នុង​ដំណើរ​ការ​ចរចាកិច្ច​ព្រម​ព្រៀងសន្តិភាព​​ក្រុង​ប៉ារីស។ លោក​អញ្ជើញ​មក​ស្រុក​ខ្មែរ​លើក​នេះ គឺដើម្បី​ចូលរួម​ពិធី​រម្លឹក​ខួប​ទី​២៥ឆ្នាំនៃកិច្ច​ព្រម​ព្រៀង​ក្រុង​ប៉ារីស។​ ឆ្លៀតក្នុង​​ឱកាស​នេះ វិទ្យុ​បារាំង​អន្តរជាតិ​RFI បាន​អញ្ជើញ​លោក​ជា​ភ្ញៀវ​ប្រចាំថ្ងៃ​របស់​យើង។ លោក Jean-David LEVITTE បាន​រម្លឹកឡើងវិញ​ដំណើរ​ការ​ចរចា និង​ឧបសគ្គ​ដែល​បារាំង​បាន​ពើប​ប្រទះ​។ អ្នក​ការទូត​ជាន់​ខ្ពស់​រូប​នេះ ក៏​បាន​គូស​បញ្ជាក់​ដែរថា ប្រទេស​ហត្ថលេខីទាំងអស់​នៃ​​កិច្ចព្រម​ព្រៀង​សន្តិភាពក្រុង​ប៉ារីស គឺ​គ្មាន​ភារៈកិច្ច​លូក​ដៃ​រឿង​កម្ពុជា​ទៀត​ទេ ព្រោះ​តួនាទី​របស់​ពួក​គេ​បាន​ចប់​ហើយ នៅ​ក្រោយ​ការ​បោះឆ្នោត​លើកទី១​រៀបចំ​ដោយ​ UNTAC ហើយ​កម្ពុជា​បាន​ទទួល​អធិបតេយ្យភាព និង​តួនាទីរបស់​ខ្លួន​នៅ​លើ​ឆាក​អន្តរជាតិ​វិញហើយដែរ​។