នៅ​ថ្ងៃ​ព្រហស្បតិ៍​នេះ ឧត្តម​ក្រុម​ប្រឹក្សា​ពិគ្រោះ​និង​ផ្តល់​យោបល់ រួម​មាន​គណបក្ស​នយោបាយ​ចំនួន​១៦ ដែល​មិន​បាន​ឈ្នះ​អាសនៈ​នៅ​ក្នុង​រដ្ឋ​សភា​នា​អាណត្តិ​ទី៦​នេះ បាន​ជួប​ប្រជុំ​ជា​លើក​ដំបូង​ក្នុង​ឆមាស​ទី១​នេះ ជាមួយ​នឹង​លោក​នាយក​រដ្ឋ​មន្ត្រី ហ៊ុន សែន​។ លោក ឈឹម ផលវរុន រដ្ឋ​មន្ត្រី​ប្រតិភូ​អម​នាយក​រដ្ឋ​មន្ត្រី និង​ជា​ប្រធាន​លេខា​ធិការ​ដ្ឋាន​នៃ​ឧត្តម​ក្រុម​ប្រឹក្សា​ពិគ្រោះ​និងផ្តល់​យោបល់ ថ្លែង​ថា​កិច្ច​ប្រជុំ​នេះ ទទួល​បាន​ការ​គាំទ្រ​យ៉ាង​ខ្លាំង​ពី​ប្រមុខ​រដ្ឋា​ភិបាល​ចំពោះ​ការងារ​របស់​ប្រតិ​ភូ​គណបក្ស​នា​នា​ដែល​បាន​ធ្វើ​រយៈ​ពេល​៦ខែ​កន្លង​មក​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFI​នៅ​រាត្រី​នេះ គឺ​លោក​បណ្ឌិត គិន ភា ប្រធាន​វិទ្យាស្ថាន​ទំនាក់​ទំនង​អន្តរជាតិ​នៃ​រាជ​បណ្ឌិត​សភា​កម្ពុជា​។ ជុំវិញ​ដំណើរ​ទស្សនៈ​កិច្ច​របស់​លោក​ង្វៀង ហ៊្វូជុង (Nguyen Phu Trong)​​ អគ្គ​លេខាធិការ​នៃ​គណៈ​កម្មាធិការ​មជ្ឈឹម​បក្ស​កុំម្មុយ​នីស្ត និង​ជា​ប្រធាន​រដ្ឋ​វៀត​ណាម​មក​កម្ពុជា​ម្សិល​មិញ លោក គិន ភា យល់​ថា ជា​ទស្សនៈ​កិច្ច​លក្ខណៈ​ធម្មតា​ក្រោយ​ពី​មេដឹក​នាំ​វៀតណាម​ឡើង​កាន់​ដំណែង។ ឆ្លើយ​តប​នឹង​សំណួរ​ដែល​ថា តើ​កម្ពុជា និង​វៀតណាម​មាន​ទំនាក់​ទំនង​ស្មើ​មុខ​ស្មើ​មាត់​គ្នា​ដែរ​ឬ​ទេ? លោក គិន ភា យល់ថា កម្ពុជា​ធ្លាប់​ជំពាក់​គុណ​វៀតណាម ហើយ​វៀត​ណាម​ក៏​ធ្លាប់​ជំបាក់​គុណ​កម្ពុជា​ផង​ដែរ​កាល​ពី​សម័យ​សង្រ្គាម​រវាង​វៀតណាម​ខាងជើង និង​វៀតណាម​ខាងត្បូង។

ព្រឹត្តិការណ៍​សប្តាហ៍​បារាំង ឆ្នាំ​២០១៩​នេះ នឹង​ត្រូវ​រៀប​ចំ​ធ្វើ​ឡើង​រយៈ​ពេល​៤ថ្ងៃ គឺ​ចាប់​ពី​ថ្ងៃទី​៧ ដល់​ថ្ងៃទី​១០ ខែ​មីនា នៅ​ក្នុង​បរិវេណ​សួន​ច្បារ​នៃ​មហា​សណ្ឋាគារ​អង្គរ ខេត្ត​សៀមរាប​។ ព្រឹត្តិការណ៍​សប្តាហ៍​បារាំង​លើក​ទីពីរ​នេះ នឹង​បើក​ឲ្យ​សាធារណ​ជន​ចូល​រួម​ដោយ​សេរី​។ លោក Florian Boheme មន្ត្រី​ទំនាក់​ទំនង​នៃ​ព្រឹត្តិការណ៍​សប្តាហ៍​បារាំង​នៅ​សៀម​រាប បាន​ថ្លែង​ថា​ព្រឹត្តិ​ការណ៍​នេះ គឺ​ជា​គំនិត​ផ្តួច​ផ្តើម​របស់​សហគមន៍​បារាំង ដែល​រស់​នៅ​ក្នុង​ខេត្ត​សៀម​រាប​កាល​ពី​ឆ្នាំ​ទៅ ក្នុង​គោល​បំណង​ចង់​បង្ហាញ​ដល់​មិត្តភក្តិ​កម្ពុជា បាន​ស្គាល់​ពី​វប្បធម៌​បារាំង​។

ភ្ញៀវប្រចាំថ្ងៃ​របស់​វិទ្យុ​បារាំង​អន្តរជាតិ​RFIនៅពេលនេះ គឺលោកឧត្តម​សេនីយ៍ត្រី អេង ហ៊ី អ្នកនាំពាក្យ​កង​រាជអាវុធហត្ថ​លើ​ផ្ទៃ​ប្រទេស។ កងរាជអាវុធហត្ថលើ​ផ្ទៃ​ប្រទេស​ បានធ្វើការ​ប្រកាស​ពី​លទ្ធផល​នៃការ​ស៊ើប​អង្កេត​ទៅ​លើ​ការ​ប្រើ​ហិង្សា​ នៅគ្រា​ចុះ​អនុវត្តន៍​សាលដីកា​លើ​ទំនាស់​ដីធ្លី​មួយ​កន្លែងនៅ​ខេត្តព្រះសីហនុកាលពីថ្ងៃទី២៤​ខែ​មករា​ឆ្នាំ​២០១៩។ ជា​ករណី​ហិង្សា​រវាង​ពលរដ្ឋ​និង​កម្លាំង​ប្រដាប់​អាវុធ​បណ្តាល​ឲ្យ​មនុស្ស​រង​របួស​។ ប៉ុន្តែ​ករណី​នេះ គឺ​មាន​មន្រ្តី​PM​ចំនួន​៥​នាក់​ត្រូវ​បាន​ដាក់​វិន័យ​រដ្ឋបាល​ និង​PM ​ម្នាក់​ព្រម​ទាំង​ទាហាន​ម្នាក់ ត្រូវ​បាន​កសាង​សំណុំ​រឿង​បញ្ជួន​ទៅ​តុលាការ​។ យ៉ាង​នេះ​ក្តី លោក​ឧត្តម​សេនីយ៍ ​អេង ហ៊ី បាន​ថ្លែង​ថា កង​រាជ​អាវុធ​ហត្ថ សុំទោស​ជា​សាធារណៈ ករណី​ហិង្សា​នោះ​។

នៅ​ថ្ងៃទី២៨ កុម្ភៈ សប្តាហ៍​ក្រោយនេះ ឧ​ត្ត​ម​ក្រុមប្រឹក្សា​ពិគ្រោះ និង​ផ្តល់យោបល់​នឹង​រៀបចំ​កិច្ចប្រជុំ​ប្រចាំឆមាស​ដំបូង​របស់ខ្លួន​ក្រោម​វត្តមាន​លោកនាយក​រដ្ឋមន្ត្រី​ហ៊ុន សែន។ មុន​កិច្ចប្រជុំ​នេះ​មកដល់ លោក​ឈឹម ផល​វរុណ ប្រធាន​លេខាធិការដ្ឋាន​នៃ​ឧ​ត្ត​ម​ក្រុមប្រឹក្សា​ពិគ្រោះ និង​ផ្តល់យោបល់​ក្នុងនាម​ជា​ភ្ញៀវ​ប្រចាំថ្ងៃ​របស់​យើង​បានលើកឡើង​ពី​សារៈសំខាន់ និង​ការងារ​របស់​ឧ​ត្ត​ម​ក្រុមប្រឹក្សា​ថ្មី​នេះ។ សម្រាប់​លោក​ឈឹម ផល​វរុណ រដ្ឋ​ចំណាយ​ថវិកា​លើ​ឧ​ត្ត​ម​ក្រុមប្រឹក្សា​ពិគ្រោះ និង​ផ្តល់យោបល់​នេះ​តិច តែ​ទទួលបាន​ប្រសិទ្ធភាព​ច្រើនជាង​អតីត​ក្រុមតំណាងរាស្ត្រ​បក្សប្រឆាំង​នៅក្នុង​អាណត្តិ​ទី៥ ទៅទៀត។

សមត្ថកិច្ច​បាន​ចុះ​បង្រ្កាប​នៅ​មជ្ឈ​មណ្ឌល​កម្សាន្ត​រ៉ុក​ កាល​ពី​យប់​មិញ​ ដោយ​ឃាត់​ខ្លួន​មនុស្ស​ភាគ​ច្រើន​ជា​យុវជន​ជាង​៣០០​នាក់​ ក្នុង​នោះ​មាន​ជន​ជាតិ​ចិន​១៤​នាក់​។ ​បើ​តាម​សមត្ថ​កិច្ច​យុវជន​ភាគ​ច្រើន​សុទ្ធ​តែ​មាន​ផ្ទុក​សារ​ធាតុ​ញៀន​ក្នុង​ខ្លួន​តាម​រយៈ​ការ​ធ្វើ​ពិសោធន៍​ទឹកនោម​។​ យ៉ាង​ណាក៏​ដោយ ​នៅ​ក្នុង​នាទី​ភ្ញៀវ​ប្រចាំ​ថ្ងៃ​​របស់​​វិទ្យុ​​បារាំង​​អន្តរ​ជាតិ​នៅ​រាត្រី​នេះ ​លោក​ ទឹម​ ម៉ាឡៃ ​ប្រធាន​បណ្តាញ​យុវជន​កម្ពុជា​ បាន​លើក​ឡើង​ថា​ យុវ​ជន​ទាំង​នោះ ​ភាគ​ច្រើន​គឺ​ជា​ជន​រង​គ្រោះ​ទៅ​វិញ​​ដែល​សមត្ថ​កិច្ច​​គួរ​តែ​ធ្វើ​កិច្ច​សន្យា​អប់រំ​។ ​ប៉ុន្តែ​​លោក​ជំរុញ​​ឲ្យ​​សមត្ថ​កិច្ច​​ចាត់​វិធានកា​រ​​ដល់​​មេ​ឈ្មួញ​ជួញ​ដូរ​គ្រឿង​ញៀន​​ឬ​អ្នក​នៅពី​ក្រោយ​​ខ្នង​ នោះ​ទើប​​អាច​​លុប​​បំ​បាត់​​បញ្ហា​គ្រឿង​​ញៀន​នៅ​កម្ពុជា​បាន​។

ជំងឺ​ប៉េស្ត​ជ្រូក​អាហ្រ្វិក គឺ​ជា​ជំងឺ​ឆ្លង​ដ៏​កាច​សាហាវ​ពិបាក​លុប​បំបាត់ និង​បង្ក​ឲ្យ​សត្វ​ឈឺ​និង​ងាប់​ក្នុង​អត្រា​ខ្ពស់ ដោយ​សារ​តែ​មិន​ទាន់​មាន​វ៉ាក់​សាំង​ការពារ​នៅ​ឡើយ​។ បច្ចុប្បន្ន​នេះ ជំងឺ​ប៉េស្ត​ជ្រូក​អាហ្រ្វិក​មិន​ទាន់​មាន​នៅ​កម្ពុជា​នៅ​ឡើយ​ទេ ប៉ុន្តែ​កំពុង​ឆ្លង​រាល​ដាល​នៅ​តាម​បណ្តា​ប្រទេស​មួយ​ចំនួន​ក្នុង​តំបន់​និង​ក្នុង​ពិភពលោក​។ ក្នុង​នោះ​ប្រទេស​ចិន​បាន​និង​កំពុង​កើត​ឡើង ចំនួន​២៥​ខេត្ត និង​ថ្មីៗ​នេះ ប្រទេស​វៀត​ណាម​បាន​ផ្ទុះ​ជំងឺ​នេះ​នៅ​កសិដ្ឋាន​ចិញ្ចឹម​ជ្រូក​ចំនួន​០៣ ស្ថិត​នៅ​ក្នុង​ខេត្ត​ចំនួន​០២ គឺ​ខេត្ត​ហ៊ុង​យេន និង​ខេត្ត​តៃ​ប៊ិញ ភាគ​អាគ្នេយ៍​នៃ​ទីក្រុង​ហាណូយ​។ ប្រឈម​នឹង​បញ្ហា​នេះ ក្រសួង​កសិកម្ម​កម្ពុជា បាន​ដាក់​ចេញ​នូវ​វិធាន​ការ​មួយ​ចំនួន ដើម្បី​ទប់​ស្កាត់ និង​បង្ការ កុំ​ឲ្យ​ជំងឺ​នេះ​ឆ្លង​មក​កាន់​ប្រទេស​កម្ពុជា​។ តើ​ក្រសួង​បាន​ដាក់​ចេញ​នូវ​វិធាន​ការ​អ្វីខ្លះ​?

តំបន់​រមនីយ​ដ្ឋាន​អង្គរ កំពុង​ទទួល​ឥទ្ធិពល​អែល​នីណូ ដែល​ធ្វើ​ឲ្យ​មាន​ការ​ប្រឈម​នឹង​ការ​ខ្វះ​ខាត​ទឹក​នៅ​រដូវ​ប្រាំង​នេះ​។ ក៏​ប៉ុន្តែ​លោក ឡុង កុសល អ្នក​នាំ​ពាក្យ​អាជ្ញាធរ​ជាតិ​អប្សរា ថ្លែង​ថា ទោះ​ជា​ទឹក​នៅ​តំបន់​អង្គរ​មាន​ការ​ខ្វះ​ខាត ឬ​ក៏​រីង​ខ្លាំង ក៏​មិន​មាន​ផល​ប៉ះពាល់​ទៅ​ដល់​ប្រាង្គ​ប្រាសាទ​អង្គរ​ដែរ​។ លោក ឡុង កុសល បញ្ជាក់​ថា​ការ​ខ្វះ​ទឹក​តំបន់​អង្គរ​ឆ្នាំ​នេះ ក៏​ដោយ​សារ​តែ​អាជ្ញាធរ​ជាតិ​អប្សរា​បើក​ទ្វារ​ទឹក​សង្គ្រោះ​ស្រូវ​ប្រាំង​ប្រជាពលរដ្ឋ​។ តែ​ចាប់​ពី​ពេល​នេះ​តទៅ​ នឹង​លែង​មាន​ការ​បើក​ទ្វារ​ទឹក​ទៀត​ហើយ ខណៈ​អាជ្ញាធរ​ជាតិ​អប្សរា កំពុង​ប្រមូល​ទឹក​ទុក​នៅ​ជុំវិញ​តំបន់​អង្គរ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ RFI នា​រាត្រី​នេះ គឺ​លោក ហឿន សុភាព តំណាង​សហគមន៍​ការពារ​ព្រៃឡង់ ខេត្ត​កំពង់ធំ​។ បណ្ដាញ​សហគមន៍​ព្រៃឡង់ កាល​ពី​ចុង​សប្ដាហ៍​មុន​នេះ ទើប​តែ​បាន​រៀបចំ​ពិធី​បំបួស​ដើម​ឈើ។ ជាពិធី​ដែល​មាន​ការ​ចូល​រួម​ពី​តំណាង​ក្រសួង​បរិស្ថាន​ផង​ដែរ។ បើ​តាម​លោក ហឿន សុភាព ការ​ចូល​រួម​របស់​ក្រសួង​បរិស្ថាន​នៅ​ក្នុង​យុទ្ធនាការ​ផ្សេង​ៗ​នៅ​តំបន់​ព្រៃឡង់ នឹង​អាច​ជួយ​ធ្វើ​ឲ្យ​បទ​ល្មើស​ព្រៃ​ឈើ​នៅ​តំបន់​នេះ​ថយ​ចុះ​បាន​។

នៅ​ថ្ងៃ​អង្គារ​នេះ ​អង្គការ​ស៊ីប៉ា ​បាន​ធ្វើ​កម្មវិធី​ផ្សព្វផ្សាយ​សៀវភៅ​ស្តី​ពី​ពិការភាព ​ដែល​សៀវភៅ​បោះពុម្ព​ជា​ភាសា​ខ្មែរ​ និង​អង់គ្លេស​នេះ ​បង្ហាញ​ពី​ជីវិត​រីករាយ​របស់​ជន​ពិការ ​ហើយ​ដែល​ជា​ការ​បោះពុម្ព​លើក​ទី​២​។​ លោក ​ហុក សុទ្ធិ ​នាយក​អង្គការ​ស៊ីប៉ា​ថ្លែង​ថា ​ការ​បោះពុម្ព​សៀវភៅ​ស្តី​ពី​ពិការភាព​លើក​ទី​២​នេះ ​ធ្វើ​ឡើង​បន្ទាប់​ពី​ការ​បោះពុម្ព​លើក​ទី​១​ កាល​ពី​២​ឆ្នាំ​កន្លង​ទៅ​បាន​ទទួល​ជោគជ័យ​។