ភ្ញៀវ​ប្រចាំ​ថ្ងៃ​របស់​វិទ្យុបារាំង​អន្តរ​ជាតិ​នារាត្រី​នេះ គឺ​លោក​ លៀវ គឹមឡាយ មន្ត្រី​កម្ម​វិធីសម​មូល​អប់រំ​កម្រិត​មូល​ដ្ឋាន​តាម​អ៊ីនធឺណិត ពី​អង្គការ​យូណេស្កូ។ កាល​ពីថ្ងៃ​ម្សិល​មិញ ក្រសួង​អប់រំ និង​អង្គការ​យូណេស្កូ បាន​ដាក់​ឲ្យ​ដំណើរ​ការ​មណ្ឌល​សិក្សាទី​១ នៃ​កម្មវិធី ដែល​អនុញ្ញាត​ឲ្យ​យុវជន បោះ​បង់​ការ​សិក្សា អាច​បន្តការ​សិក្សា​បាន​។ កម្មវិធី​នេះ​មាន​ឈ្មោះ​ថា​ កម្មវិធី​សមមូល​អប់រំ​កម្រិត​មូល​ដ្ឋាន​តាម​អ៊ីន​ធឺណិត ឬ ប៊ីប (BEEP)។ លោក លៀវ គឹមឡាយ លើក​ឡើង​ថា​កម្មវិធី​នេះ​នឹង​ទាក់ទាញ​យុវជន​ដែល​បោះបង់​ការ​សិក្សា ឬ​ធ្វើ​ការ​ពេញ​ម៉ោង អាច​បន្តការ​សិក្សា​បាន​។ លោក​បន្ថែម​ថា គម្រោង​នេះ​ទទួល​បាន​ការ​ចាប់អារម្មណ៍ និង​ចុះ​ឈ្មោះ​ច្រើន​តាម​រយៈបណ្តាញ​អ៊ីនធឺណិត។

នៅ​ឆ្នាំ​២០១៨ អត្រា​គ្រោះ​ថ្នាក់​ចរាចរណ៍ បាន​ថយ​ចុះ​បន្តិច​បើ​ធៀប​នឹង​ឆ្នាំ​២០១៧ ពោល​គឺ​ថយ​ចុះ​ចំនួន២៦៤​លើក ខណៈ​អ្នក​ស្លាប់​ថយ​ចុះ​ចំនួន​១៩​នាក់ និង​អ្នក​របួស​ថយ​ចុះ​ចំនួន​៧៦៩​នាក់​។ បើ​ទោះមាន​ការ​ថយ​ចុះ​ដូច្នេះ​ក៏​ដោយ ​លោក អ៊ា ចរិយា នាយក​វិទ្យាស្ថាន​សុវត្ថិភាព​ចរាចរណ៍ មើល​ឃើញ​ថា បញ្ហា​គ្រោះ​ថ្នាក់​ចរាចរណ៍​នៅ​កម្ពុជា នៅ​តែ​ស្ថិត​នៅ​ក្នុង​ស្ថានភាព​គួរ​ឲ្យ​បារម្ភ​។ និង​ថា ​ដើម្បី​ឈាន​ទៅ​កាត់​បន្ថយ​គ្រោះ​ថ្នាក់​ចរាចរណ៍ កម្ពុជា​ត្រូវ​មាន​ឆន្ទៈ​រឹង​មាំជាង​នេះ​ថែម​ទៀត។

ក្រសួង​ធនធាន​ទឹក និង​ឧតុនិយម នៅ​ថ្ងៃទី​១៦​ ខែ​កុម្ភៈ ឆ្នាំ​២០១៩​នេះ ​បាន​ចេញសេច​ក្តីជូន​ដំណឹង​ស្តីពីការ​ឡើង​កម្តៅ​ខ្លាំង​ចាប់ពី​ថ្ងៃទី​១៦ ដល់​ថ្ងៃ​ទី​២២​ ខែ​កុម្ភៈ ឆ្នាំ​២០១៩​ ។​ លោក​ ចាន់​ យុត្ថា ​ជាភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរ​ជាតិ​RFIនៅ​រាត្រីនេះ បានបញ្ជាក់ថា ការឡើងកម្តៅបែបនេះ ​បណ្តាល​មក​ពី​បាតុភូត​អែល​នីញ៉ូ ជាផល​វិបាក​មកពី​ឧស្ម័ន​ផ្ទះកញ្ចក់។ សម្រាប់កម្ពុជា​ អ្នកនាំពាក្យ​ក្រសួង​ធនធាន​ទឹកដដែល​បាន​អំពាវនាវ​ឲ្យបង្កើន​ការ​ប្រុង​ប្រយ័ត្ន​ខ្ពស់ ​ចំពោះបាតុ​ភូត​រន្ទះ​ និង​ខ្យល់​កន្ត្រាក់​ នៅ​ពេល​ភ្លៀវ​កក់ខែ​។

នៅ​ក្នុង​ឱកាស​ថ្ងៃ​នៃ​សេចក្តី​ស្រលាញ់ Valentine’s Day នៅ​ថ្ងៃ​ទី១៤​កុម្ភៈ​ឆ្នាំ​នេះ លោក តុង សុប្រាជ្ញ អ្នក​ស្រាវ​ជ្រាវ​ឯករាជ្យ ផ្នែក​សុខភាព​សាធារណៈ បាន​បង្ហាញ​របាយ​ការណ៍​ស្រាវ​ជ្រាវ របស់​លោក​ដោយ​បញ្ជាក់​ថា ការ​ចាប់​អារម្មណ៍​របស់​យុវវ័យ​ចំពោះ​ថ្ងៃ​នៃ​សេចក្តី​ស្រលាញ់​មាន​ការ​ធ្លាក់​ចុះ ក្នុង​រយៈ​ពេល​១០​ឆ្នាំ​កន្លង​ទៅ​។ លោក តុង សុប្រាជ្ញ ឲ្យ​ដឹង​ថា យុវវ័យ​ជាង​ពាក់​កណ្តាល មាន​ការ​ផ្លាស់​ប្តូរ​ឥរិយាបថ​ពី​ភាព​អវិជ្ជ​មាន មក​ចំណុច​វិជ្ជមាន​ច្រើន ដោយ​សារ​តែ​ពួក​គេ​ទទួល​បាន​ការ​អប់រំ ផ្សព្វ​ផ្សាយ និង​ការ​យក​ចិត្ត​ទុក​ដាក់​ពី​អ្នក​ពាក់​ព័ន្ធ ដូច​ជា​អាណា​ព្យាបាល​ជា​ដើម​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​នា​រាត្រី​នេះ គឺ​លោក ឡុង កែមវិចិត្រ អ្នក​នាំ​ពាក្យ​រង​ក្រសួង​ពាណិជ្ជកម្ម​។ នៅ​ក្នុង​បទ​សម្ភាស​ជាមួយ​​វិទ្យុ​បារាំង​អន្ដរជាតិ RFI លោក ឡុង កែមវិចិត្រ បាន​សម្ដែង​ការ​សោក​ស្ដាយ​ចំពោះ​ការ​ប្រកាស​​របស់​គណៈកម្មការ​អឺរ៉ុប ដែល​ចាប់​ផ្ដើមដំណើរការ​នីតិវិធី​ព្យួរ​ជា​បណ្ដោះ​អាសន្ន​នូវ​ប្រព័ន្ធ​អនុគ្រោះ​ពន្ធ EBA។ ប៉ុន្តែ​បើ​តាម​អ្នក​នាំ​ពាក្យ​រង​ក្រសួង​ពាណិជ្ជកម្ម​រូប​នេះ ការ​ប្រកាស​របស់​គណៈកម្មការ​អឺរ៉ុបនា​ពេល​នេះ មិនមែន​ជា​ការ​ដក​ប្រព័ន្ធ​អនុគ្រោះ​ពន្ធ EBA ​ពី​កម្ពុជាឡើយ​។ ម្យ៉ាង​វិញ​ទៀត លោក​ជឿ​ជាក់​ថា បើ​ទោះ​បី​ជា​លែង​មាន EBA ក៏​ដោយ ក៏​អ្នក​វិនិយោគ​នឹង​នៅ​តែ​បន្ត​ដាក់​ទុន​រក​ស៊ី​នៅ​កម្ពុជា​ដែរ​។

នៅ​ថ្ងៃ​ទី១២​ខែកុម្ភៈនេះ សហ​ភាព​អឺរ៉ុប បាន​សម្រេច​ដំណើរ​ការ​នីតិ​វិធី ដែល​អាច​ព្យួរ​ប្រព័ន្ធ​អនុ​គ្រោះ​ពន្ធ EBA ពី​កម្ពុជា​។ គណៈ​កម្មការ​អឺរ៉ុប​មាន​រយៈ​ពេល​១៨​ខែ ក្នុង​ការ​អនុវត្ត​និតិ​វិធី ដោយ​រាប់​ចាប់​ពី​ថ្ងៃ​នេះ​តទៅ ក៏​ប៉ុន្តែ​គណៈ​កម្មការ​អឺរ៉ុប​ថា ចំណាត់​ការ​នៅ​ថ្ងៃ​នេះ មិន​មែន​ជា​ការ​សម្រេច​ចិត្ត​ចុង​ក្រោយ ហើយ​ក៏​មិន​មែន​ជាទី​បញ្ចប់​នៃ​ដំណើរ​នីតិ​វិធី​ដែរ​។ លោក​បណ្ឌិត គី សិរីវឌ្ឍន៍ ប្រធាន​មជ្ឈ​មណ្ឌល​សិក្សា​ចិន និង​ជា​អ្នក​ជំនាញ​ផ្នែក​សេដ្ឋកិច្ច​នៃ​រាជ​បណ្ឌិត​សភា​កម្ពុជា​ថ្លែង​ថា ភាគី​ពាក់​ព័ន្ធ​នៅ​មាន​ឱកាស​ជជែក​គ្នា បើ​ពុំ​ដូច្នេះ​ទេ គួរ​តែ​ចាប់​ផ្តើម​រៀប​ចំ​យ៉ាង​ប្រញ៉ាប់​ប្រញាល់ ដើម្បី​ងើប​ឈរ​ដោយ​ខ្លួន​ឯង រួម​មាន​កាត់​បន្ថយ​ថ្លៃ​ដើម​ឲ្យ​ទាប ដើម្បី​ទប់​ទល់​ពី​ការ​ចាក​ចេញ​ទីផ្សារ​របស់​សហ​គ្រាស​ដែល​មាន​ប្រាក់​ចំណេញ​។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្តរជាតិ​RFIនៅរាត្រីនេះ គឺ​លោក ថៃ នរសត្យា រដ្ឋ​លេខា​ធិការ និង​ជា​អ្នក​នាំ​ពាក្យ​ក្រសួង​វប្បធម៌ និង​វិចិត្រ​សិល្បៈ។ ក្រសួងវប្បធម៌​ដែល​បាន​ចេញ​សេចក្តី​អំពាវនាវ​ឲ្យ​មានការ​ផ្សព្វ​ផ្សាយ និង​អប់រំ​ដល់យុវវ័យ​កុំឲ្យ​យល់​ច្រឡំ និង​ប្រព្រឹត្ត​ខុស​នៅ​ថ្ងៃ​ទិវា​នៃ​ក្តី​ស្រឡាញ់​១៤កុម្ភៈ​ដែល​នៅ​សល់​តែ​២ថ្ងៃ​ទៀត​ប៉ុណ្ណោះ​។ បើ​តាម លោក ថៃ នរសត្យា ឥរិយាបថ​របស់​យុវជន​ខ្មែរ​នៅ​ក្នុង​ថ្ងៃ​ទិវា​នៃ​ក្តី​ស្រឡាញ់​គឺ​មាន​ការ​ផ្លាស់​ប្តូរ ពោល​មិន​សូវ​ជា​ប្រព្រឹត្ត​អ្វី​ដែល​ប្រាស​ចាក​ពី​ប្រពៃណី​របស់​ខ្មែរ​នោះ​ទៀត​ទេ​។

ភ្ញៀវ​ប្រចាំថ្ងៃ​របស់​វិទ្យុ​បារាំង​អន្តរជាតិ RFI នៅ​រាត្រី​នេះ គឺ​លោកស្រី រស់ សុភាព នាយិការ​ប្រតិបត្តិ​អង្គការ​យេនឌ័រ និង​អភិវឌ្ឍន៍​ដើម្បី​កម្ពុជា។ អង្គការ​យេនឌ័រ និង​អភិវឌ្ឍន៍​ដើម្បី​កម្ពុជា នៅ​ថ្ងៃទី ១០ ខែកុម្ភៈ នេះ បានរៀបចំ​យុទ្ធនាការ «១០០កោដិ​សម្លេង ដើម្បី​បញ្ឈប់​ការប្រើប្រាស់​អំពើហិង្សា​លើ​ស្ត្រី កុមារ និង​ជនពិការ»។ តាមរយៈ​មេក្រូ​របស់​វិទ្យុ​បារាំង​អន្តរជាតិ លោកស្រី រស់ សុភាព បាន​លើកឡើងថា ពិភពលោក​នឹងមាន​សន្តិភាព បើ​មនុស្ស១០០កោដិ​សម្លេង ចូលរួម​ក្នុង​យុទ្ធនាការ​នេះ ហើយ​ឈប់​ប្រើប្រាស់​អំពើហិង្សា ចាប់ពីពេលនេះ​តទៅ។

ភ្ញៀវ​ប្រចាំ​ថ្ងៃ​របស់​វិទ្យុ​បារាំង​អន្ដរជាតិ​ថ្ងៃនេះ គឺ​កញ្ញា សៀង សុខចេង ដែល​បាន​បង្កើត​​វេបសាយ វប្បធម៌​។ បើ​តាម​កញ្ញា សៀង សុខចេង វប្បធម៌ គឺ​ជា​វេបសាយ​ដែល​បង្កើត​ឡើង​ក្នុង​គោលដៅ​ផ្ដល់​ពុទ្ធិ​ប្រកប​ដោយ​លក្ខណៈ​វិទ្យាសាស្ត្រ​ ដើម្បី​ជំរុញ​ឲ្យ​អ្នក​អាន​ចង់​ចេះ​ចង់​ដឹង ចេះ​សំលៀង​គំនិត និង​បើក​ចិត្ត​ទទួល​យក​មតិ​ចម្រុះ​។

គណ​បក្ស​ថ្មី​មួយ​ទៀត​ឈ្មោះ​ថា ​«គណ​បក្ស​បំណង​ពលរដ្ឋ​»​ ត្រូវ​បាន​​ចុះ​​បញ្ជី​​នៅ​ក្រ​សួង​​មហា​​ផ្ទៃ​​កាល​ពី​​ម្សិល​មិញ​។​ គណ​បក្ស​នេះ​បង្កើត​ឡើង​ដោយ​ អតីត​ សហការី​​របស់​ លោក​ ខឹម​ វាសនា ​ប្រធាន​គណ​បក្ស​​សម្ព័ន្ធ​​ដើម្បី​​ប្រជា​​ធិប​តេយ្យ។​ លោក ​អ៊ិត ​សារម្យ​ ប្រ​ធាន​គណ​បក្ស​​ថ្មី​នេះ បាន​ថ្លែងថា​​ គណបក្ស​របស់​លោក​​គឺជាគណបក្សកណ្តាលនិយម តែ​រិះ​គន់​ក្នុង​ន័យ​ស្ថាបនា​។